السلام عليكم ورحمة الله وبركاته
بلا بداية
وين أدور في حروفي عن مكاني ؟
كيف أبنهي هالقصيد بلا بداية
شاقني للهم إحساس المعاني
لو بقى لي من أحاسيسي بقايه !
الحزين اللي من اجروحه يعاني
ما درى باللي تعشعش في حشايه
هو بقى للحزن درب ما مشاني ؟
لا ولا حتى قدر يلحق جزايه !
ربي اللي قدر القسمه عطاني
حظ يشبه زول وجهي ف المرايه !
ما شغلني من حسود لو وشاني
قد تعودنا على سمع الوشايه
هل دمعي قبل لا أبكي ، بكاني
قبل يفضحني ..سترته بالعبايه
مشهد التوديع عاقد لي لساني
والأمل فيني يلوح بالنهايه
وش رجيت من العمر لا صار فاني؟
ما وصلني من غرابيله كفايه !!
الهوى طماع و العاشق أناني
و الوفا دايم نردد به حكايه
ذي حياتي كلها صارت أماني
إنتهت في فصل حب من روايه
لا تقولوا فيني الإحساس ثاني ؟!
عفت أنا بعد المشاعر كل غايه !
ليت شعري ما كتب صادق حناني
لين يعرف دفتري معنى القرايه
من يبي يلقى قصيد في مكاني
يرجع لشعري ، يدور له بدايه ...!!
***********
للشاعرة
"عبير أحمد".