(قصتي مع أسرار القصص)
مرة من المرات رحت لحراج الخردة وكنت وقتها أدور على كتب وأشياء قديمة من التراث هوايه من هواياتي ،
المهم وأنا قاعد أدور وأشوف ، حصلت واحد باسط على كتب كثيرة أغلبها قديمة جداً وأثناء وأنا قاعد أفتش في الكتب
لفت نظري دفاتر مدرسية قديمة تعود إلى ثلاثين سنة تقريبا ، المهم إللي لا حظته على هذه الدفاتر أنها تخص أولاد وبنات من عائلة وحدة وهذا من واقع الاسماء الموجودة عليها،
وقلت لنفسي خلني أشوف كيف مستواهم الدراسي في ذاك الحين ، وبصراحه لقيتهم شئ يشرف كل علاماتهم في الدفاتر أمتياز وخطهم زين وترتيبهم جدا روعه وقلت لنفسي وانا قاعد اتفرج الله يذكر هذيك الأيام بالخير
اللي فيها حب وإخلاص للدراسة وتفاعل الطلاب مع مدرسيهم ..الخ
المهم قعدت أفتش وأقول لنفسي ليتني أجد سر بين هذه الدفاتر لهاالعيال المتميزين لعل أجد سبب في تفوقهم ونجاحهم بامتياز ،
والحقيقة أني وجدت كتب صغيره غير منهجية متناثرة من ضمن دفاترهم
وهذه الكتب الصغيرة تعود لنفس هؤلاء الطلاب واستوقفتني هذه الكتيبات الصغيرة وكثرتها وقلت لابد هناك سر في كثرة هالكتيبات الصغيرة مع هالاولاد المتفوقين وهذه الكتيبات هي عبارة عن قصص للصغار وللكبار
تتكلم عن كل شئ في التربية والثقافة والادب والعلوم والرحلات والشجاعة والدين والصبر والاحلام والامل والذكاء .......هلم مجرة
، وقلت لنفسي عز الله أنها بيت القصيد وراء تفوق هؤلاء الاولاد بعد توفيق الله . تدرون ليش أنا قلت أنها بيت القصيد !! لأني بصراحه حللتها مع نفسي وجد ت أنها كفيلة بالتربية من غير مربي وأنها تعطي الاولاد خبرة في الحياة وعبر وتعلمهم وتنير عقولهم بعد توفيق الله حيث أنها نتاج عقول علماء وأفذاذ لهم خبرة وباع كبير في هذه الحياة
بالله عليكم من منا حافظ قصة وحدة ويعرف يلقيها للاولاد بطريقة مشوقه والله أننا كل يوم مثل أمس وماعندك أحد هذا ماوجدته من حل وركيزة تساعد الاولاد على الذكاء والتفوق فهل عندكم في بيتوكم قصص لا تقل عن 100 كتيب قصة والله ما ظنتي .
يالله نبي مداخلتكم ومثل ماقلنا لكم اطرحوها على السجية .
وانا احب اخبركم اني من اليوم ورايح بروح اشتري كراتين قصص
وان شاءالله أحصل فيها تغييرايجابي لاولادنا وهذا ما اتوقعه بكل تأكيد لانه بصراحه أكثر ماكان يشدنا وحنا صغار القصص ويا ما تعلمنا منها واصبحت لنا ركيزة في كل شئ وعلى راسهم الادب والاحترام وغيرها كثير .
انا منتظر ردودكم . وقبل اختم ماتلاحظون شلون اولاد الاجانب غرفهم متروسه قصص . مو متروسه دفاتر بس وكتب منهجية . فتكم بعافيه .وجبتها على السجيه . سلام
.
.
طال السفر