السلام عليكم ورحمة الله وبركاته
والله فكره حلوووه
اختي سوار لذهب
وفرصه نرفه شوي
ومشكوره عالموضوع
بس ليش الوجه يبكي المفروض يكون كذا :d
وهذي مشاركتي
وسوري انا كتبت كذا موقف
احم واكيد باقي اذا تذكرت برجع :d
بقولكم المواقف الي اذكرها الحين
بالحج تعرفت على بنات وامهم مرره دمهم خفيف...خاصة وحده من البنات
وكنا نروح نرمي مع بعض ورحنا عرفه ومزدلفه مع بعض..
المهم اليوم الأخير وحنا رايحيين نرمي الجمرات
لقيت البنت الي معي حزنانه مرره سألتها وش فيك؟
الا قالت لي حست بيد واحد ماسكها من كتفها ومقرب منها
الا هي عطته بكوعهاااااا قوي مره
تقول بدرجة حسيت كوعي دخل جوت قلبه
المهم يوم ناظرت وراها لقت واحد شايب يتراجف باكستاني يمكن عمره 80 سنه
غصب يمشي والظاهر بقى يطيح واتكى عليها...
وهي عطته بكوعها...تحسبه واحد قليل ادب
و
الظاهر نقلوه عالمستشفى بعدها.
وجلسنا طول اليوم حزنانين عليه ونضحك استغفر الله
-
واذكر من المواقف المضحكه وانا صغيره
عندي اخت جدا شقيه
وانا صغيره كنت هبله وبريئه اصدق اي شي تقوله
المهم بيوم قالت لي
تدرين لو جبتي قارورة بيبسي وصرختي جوتها
وسدتيها بيدك وبعدها فتحتيها تسمعين صوتك؟
انا ماصدقت وجلست ليله كامله وانا اصرخ واسد فتحة قارورة البيبسي واعيد
الين الفجر
-
واذكر مره نفس اختي هذي قالت لي كلي قرن شطه خضراء وانا اعطيك خمسين ريال:(
كنت ثاني ابتدائي ..وجلست اكل وابكي.الين خلصتها
بعدها رحت لاختي شفايفي ووجهي احمر ..واقولها خلصتها
قالت لي اضحك عليك وشردت
وانا فتحت فمي بكى واسبها
-
واذكر كنت بأول ابتدائي
وكنت مشتركه بمجلس الامهات
وامي جات وجاراتها يتفرجون علي...
وكنت مشتركه بأغنيه..
والابله لبستني بلوزه بيضاااا....ومن تحت التنوره ...ورق المقوى الابيض ملزقه فيه ورق كريشه كنه كرانيش
مثل التنوره وربطته على وسطي كنه تنوره(على بالها حركه)
المهم انا جالسه اغني ومنفعله وطاحت التنوره قدام الامهات
اذكر كنت صغيره بس متفشله مو عارفه ايش اسوي
وبالاخير قررت اكمل الاغنيه
ياجبل مايهزك ريح:)
وكملتها بالبلوزه ونزلت ولا كن شي صاير
..
بعد فيه موقف اذكر رحت مع ابوي لمحل نبي نشتري كنب
المهم هو شاف ولد صاحبه
صدفه...
وانا مع ابوي عامله برستيج
واطيح طيحه غريبه عجيبه
الناس يطيحون على قدام انا طحت على ورى
مدري مو عارفه اوصف شكلي
المهم صار شكلي كني اخطبوط او صرصور منقلب على ظهره لاني اتكيت على ايدي ورجلي
والرجال يطالع حزنان وماسك ضحكته وابوي متفشل
-
واخر موقف
رحنا شاليهات احنا وبيت عمامي
المهم
انا طلعت من الفله حقتنا واخذت معي عيال خواتي ورحت للبحر
وجلست منسجمه قدام البحر
شوي اناظر والتفت الاقي الصغار تركوني
وقررت ارجع
المهم رديت للفله حقتنا
ولها باب خارجي للدور الثاني
(كان الدور الثاني للحريم مخلينه والدور لارضي مخلينه للرجال)
المهم انا قربت من فلتنا
والاقي واحد يركض وراي رجال شباب
انا طبعا مت من الخوف منه ومت من الخوف لايشوفونه اخواني
ركضت للدرج بطلع
والاقيه قرب وطلع الدرج
بعدها بديت اصرخ ياا حيوان يا منحط
اتقي الله
ماعندك خوات
وطبعا وانا اخذ الدرجه بثلاث درجات او اربع من الخرعه
وهو ولا كنه يسمع وراي بالدرج جري
واسمع يقول كلام من الخرعه مدري ايش يقول
وانا اجري وهو يجري
الين وصلت الباب الي فوق
من خرعتي ما دريت بنفسي الا والتفال على وجهه وانا ابكي واسب ومن الخرعه
لما وصلت الباب
وطبعا دخلت وصكيت الباب ومو مصدقه
اني وصلت سالمه.
وبعدها دخلت للصاله .
والاقي عود؟
مدري استغربت وتعجبت وانذهلت
وش جاب هالبلوه عندنا ومين جابه
لايكون بس جدتي باعتهاااا؟
افكار كثيره تدور براسي وانا ادور بالصاله وافتح البيبان واقفلها
استغربت مافي امي ولا جدتي ولا حريم عماني وخواتي؟
جتني حاله هستيريه افتح الغرف واقفل
والاقي ملابس شباب وثياب وحوسه
واخرتها تربعت على الارض منهاره
اكتشفت اني كنت داخله فلة الرجال الي وراي المسكين
وكان بيقولي اني غلطانه
-
طبعااااااااااا انهيار وفشله وكل شي مو حلو كنت احسه بهاللحظه
وفتحت الباب بشويش بطلع
لقيته منتظرني وميت ضحك
ونزلت اجرجر خطواتي
وانا اسمع صدى ضحكه
.ورجعت لفلتنا لان الفلل متشابهه
ووالله اول مادخلت
مثل افلام كرتون
جلست اصرخ باعلى صوتي من الفششششششششششله
وبعدها حكيت امي ولي معها بلي صار
وبعدها استكنت بغرفه الين رحنا بيتناا
