[... المدفووووق ...]
ألا يانِديمـي ليـه تآسـى علـى المدفـوق
عسى الله يبارك مـا بِقـى مِنْـه فالطاسـه
كِفى لا تِهيجنـي كِفـى مـا ذَرَفْـهَ المـوق
دمـوعٍ يِفِـتَّ اجَـا وِ سلمـى ثِقِـل باسـه
كفاني وأنا اللي يوم غيري ضناهـا الشـوق
وِ عَدَّتْ على ضلع الغـرام و رِقـتْ راسـه
أو اللي على الموضـات تفكيرهـا مطْبـوق
عَمَلْهـا تِفـرّ السـوق و تْعبِّـي أكيـاسـه
أنا حبـل تفكيـري بوضـع أمتـي موثـوق
غرسته بصدري وأسْقَتْ أشعـاري غْراسـه
سِقَى (خمسه وعشرين) عامٍ لحم وِ عـروق
وِ دَلَّـتْ بروضـه عِذْقهـا كــل ميَّـاسـه
أَطَـرِّز علـى ديباجـه القـاف و الطـاروق
و أقَطِّـع حبـال الوقـت لا طالـت بْفاسـه
نديمـي بـرد فنجالـك و لاهـوِ بْمـذيـوق
علامك سهيـت وليـه الأفكـار محتاسـه؟!!
كفانـا سـؤالٍ قاصـرِ رْواقـه وْ مشقـوق
جوابـه مهـو محتـاج تخْميـن وِ فْراسـه
نديمي مـادام المركـب اليعربـي مخْـروق
فليـه العجـب لا زاحـم المَـيّ جِلاسـه؟!!!
نديمي لا تسأل عن شِتات العرب في سـوق
علوج الصليب و زمرة ابْليـس لَـهْ ساسـه
سياسه عسى (سوق السياسه) يجيها العـوق
إذا الكـذب عملتهـا و الاوغـاد حـراسـه
مِتـى يـا مِرَجِّـي عَـدْلِ تِجَّارهـا بِتْفـوق؟
يِعَدلـونِ كـانِ انْقَلْبَـتَ (الدِّمْنَـه) ألْماسـه
أرى أمتي فيهـا هـي الخاسـر المَسْـروق
أويحـاااااه والمسـروق سيفـه وِ قرطاسـه
بَعَد سيفه اسْتوطى الكُفـر سورهـا للبـوق
وِ مِن بَعْدِ قِرطاسـه سِقاهـا الجهـل كاسـه
تَبيني أوصِّـف كيـف (كِنـا وِكنـا) فـوق
فَـأوَّاهِ مِـن مـوّال (كِنّـا) وِ مِـن نـاسـه
أنا ما اعْذِل الباكي على الماضـي المعشـوق
قرونٍ حكمنـا بَـه أُمَـم بأشْـرف سْياسـه
و أنا مثله أبكي حيثِ راع الهوى بَه شـوق
وِ من عاش صَحْو المجد يِسْتَصعِـبِ نْعاسـه
ملامي على مِن هَجِّ صيده وِهُـوْ المَحْقـوق
بِـدَل مـا يحـاول أيّـس و كَسّـر أقواسـه
فِكر من قيود(اليـاس مِنّـا) مهـو معْتـوق
تِــدق بلـحـون الانهزامـيـه أجـراسـه
وجودي على اللي للمعالـي مِهُـوْ مسْبـوق
علـى هامـة نْجـوم المقابيـل مجـلاسـه
على منهج اللْـه و النِبـي للركـابِ يْسـوق
مِجَـوِّد حبـال الديـن بِيْدَيْـهِ واضْـراسـه
على مْأشِّرَ الأخلاق سَهمَـه مهـو ملحـوق
وِ ياكَـمِّ سَهْـمٍ للأسـف مِشْهِـرِ افْـلاسـه
تِحِـسِّ بْعيونـه لا صِفَـن للطمـوحِ بْـروق
وِ تِنْبيك عـن ثِقـل الـذي يَحمِـل أنْفاسـه
مهـو خانـعٍ يائـس ولا جاهِـلٍ مَطْـفـوق
قَبِـل لا يِجيـب الثـوب مِـن بايعـه قاسـه
حمامـة سـلام وْ لا دعـا للجِهـاد شْـروق
وِ دارت رحاهـا شِفْـتِ ذيبـه وِ قِرنـاسـه
على مِثْـل هـذا تِسْتِفيـق أمتـي وِ يْـروق
غَديره عقـب مـا طيـن عِدوانهـا حاسـه
و على كَفِّ مثْلـه نِرْجِـعَ الغالـيَ المبيـوق
وِ نقطـع يميـن البايـق وْ دابـر أنْجاسـه
و نِصبَّ الهِدايه للحيـارى صبـوح غْبـوق
وِ نضرب بحكـم اللْـه وِ نَـازن بِقسْطاسـه
نِـوَرِّد لِغـدران الضيـا ظاميـات الـنـوق
و نِبثّ الخضار بْكـل عِـودٍ شِكـى يْباسـه
لا تسأل (متى) كَم في (متى) مِن ضياع حْقوق
وِيا كِثر ما ارْسل مَعْ (متى) ابْليس وسْواسـه
نَبِي (صبْر) حيث أهل العَجَل رزقهم ممحـوق
و نبي (عَزْم) حيثَ الرَّخْو ما يرْتِفـع ساسـه
بِكفّ (الرجا بالله) وَجْـه الصَعَـب مَصْفـوق
وِمِـن لا عَدَلْهـا بالرجـا اخْتـل مِقْيـاسـه
نديمـي أحِـس بْقلبـك اليعربـي محـروق
وأنـا يَعْربيَّـة قلـب مِثْـلِـك وِ حَسـاسـه
تِقهـوى فديتـك باكـر نْعَـوِّضَ المدفـوق
وِ نمـلا بعـون الله طاسـه ورى طـاسـه
ريوف الشمري