السلام عليكم ورحمة الله وبركاته
قررت اهجر السوق عقب احمراره = قررت اخلي كل الأسهم وفكه
عفت المؤشر لو زهى باخضراره = خلاص أبرحل والمحافظ بصكه
من يوم شفت اللي على الناس صاره = ضاعت عقول وصار بالحال ربكه
تحليل ثم تضليل كذب وشطاره = هذا رفعها فوق ...وهذا يدكه
قالوا وصلنا القاع هذا مزاره = وقالوا نقاط الدعم ما فيه شِكه
بركان سهمك محرياً بانفجاره = احظر تفرطبه ...ترى الناس عركه
تجميع ثم تجميع ...هذا مساره = ويبدون بالتصريف في كل سكه
وبعده كسر ها الدعم تارة وتاره = وبان الكلام اللي طلع فيه ضحكه
قالوا جني أرباح ويرجع مساره = وأثره جني أرواح فيها تذكه
نصيحتي يا ناس عقب انهياره = صف المحافظ وافرك اليوم فركه
لا لا يغيرك الطمع في قراره= وباب يجيب الريح لازم تصكه
غيرك خسر جيبه ولا تهون داره = ومعهن يجيه من المرض كم وعكه
نفسه اليا من شاف حمر الاشاره = ضاقت من أسباب الجماعي ومكه
اترك رباها وابتعد عن قماره = نصيحتي للمال يا خوك زكه
ياشين مجلاس التداول وكاره = ويا ما حلا المجلاس في وسط دكه
عنده دلالٍ مجهزه فوق ناره = بين الرجال اللي يونسك دبكه
أخير له من ربح وخساره = شريط يمشي جامعٍ كل ملكه
عفت المؤشر لو زهى بازدهاره = خلاص أبرحل والمحافظ بصكه
القصيدة للأخ الأستاذ : فهد ونس الجهيلي الشمري من اهل حايل