[عطر الوفاء]

الله يثبت أختنا أفراح ويشرح لها صدرها على الدوام ويثبتها على طريق الحق

تعرفي يالأمل بالله وياأختي أفراح لو أقول لكم حكايتي ماأتوقع أحد بيصدقها لكن حأقولك حاجه صغيرة ومختصرة والله إنو عيلتي متفككة بمعنى الكلمة وكل واحد مش طايق الثاني كفاية إنو أمي وأبوي مش طايقين بعض من يوم ماطلعت عالدنيا وأنا بأشوف أبوي بيضرب أمي وهي بتشتكيه وهو بيشتكيها عند الكل ومن غيره هم منعزلين كل واحد بغرفة وطبعا الضحية الأولاد أنا عن نفسي ماعشت طفولة مستقرة الحاجات الحلوة اللي فيها كانت مجرد لحظات مسروقة من السعادة فعلا حاجه رهيبة على أي حال أمي كانت بتسيء لي من صغري ( سب,شتايم, تدعي علي بالموت بالمرض بالقهر بكل حاجه, وإذا كان لابد كمان ضرب تخيلي في أم تخنقك تبغاك تموتي) ياحبيبتي ممكن تقولي أنا عامله حاجة بس هذا هو الحال لأنو عندها للأسف مين يحرضها علي ويعبي رأسها علآخر علي وعلى أختي الثانية وطبعا أبوي لو احتكيت فيه مايقل عنها سوء بس هو عشانه منعزل عننا من كرهه الشديد لينا ولأمنا يعني ممكن يمر شهر ماشفت أبوي مع إنه في نفس البيت

بس المهم رغم كل الظلم الحاصل إلا إني والله بأدعيلهم بالمغفرة والهداية والشفاء ( لأنو بيتنا كل الدلائل بتشير إلى إنه معمول لنا سحر ومخصوص بين أمي وأبوي وشامل لذريتهم وعلى سبيل المثال لما مره تنومت أمي بالمستشفى أبوي انقلب حاله ولأول مره بحياته يسأل عنها ويقلق يعني لما يبعدوا عن بعض يفقدوا بعض ولما بيقربوا اللهم ياكافي وكمان من غير السحر الحاصل هم تركيبتهم النفسية مش مهيأه مثلا أمي عاشت يتيمة وتعذبت عند عمها وحريمه وعادةً فاقد الشيء لايعطيه)

بس أرجع وأكد لك إنو لازم نستمد الثقة والقوة من داخلنا من إيماننا بالله سبحانه هذا كله إبتلاء وتمحيص والحمدلله بالنسبة لأمي وأبوي على الرغم من سلبياتهم إلا إني ماأركز عليها حتى ماأتعب نفسي بالعكس أنظر لإيجابيتهم حتى لو كانت صغيرة وممكن كمان تضحك

أفراح ياحبيبتي هدءي أعصابك ولاتنظري للناس بمثالية زايدة لاتتوقعي إنو ماما وبابا رمز الحنان هم اللي بيساعدوك ويدعموك ..... لا تسلحي بإيمانك وتعلمي الصبر وانظري للكأس نصف الفارغة على إنها نصف مليانة يعني الوضع اللي بتعيشه عند أهلك اعتبريه كورس تدريبي للحياة المقبلة اتعلمي واستفيدي وحتطلعي بدروس كثيرة إذا ماصبرت على أذى أقرب الناس لك بكره ماراح تصبري على أذى الصاحب والجار وممكن لاسمح الله الزوج حبيبتي تعلمي ضبط النفس (الحلم) تعلمي دفع السيئة بالحسنة ويامحلاه وإنتي بتحسني لأمك ولأبوك ( مثلا غسلي رجولهم وادهنيها , اعملي لهم مساج, اطبخي لهم أكل يحبوه , تفقديهم شوفي هم محتاجين حاجه تعشوا ولا لا؟ , أخدميهم وحاولي تبريهم وهنا أجرك مضاعف أكثر من اللي أبائهم طيبين معاهم)

لاتستسلمي للضعف لما تحسي نفسك باديه تفكري بحزن وبمساؤية لا,, انفضيها من رأسك وروحي توضي وصلي وابكي وادعي الله الحنان والحب والرعاية والتوفيق والرضا انتظريها كلها من الله سبحانه (واستعينوا بالصبر والصلاة وإنها لكبيرة على الخاشعين)
اقرأي أسماء الله الحسنى وشوفي تأثيرها عليك (الخبير الحكيم الحسيب الحليم السميع البصير العليم القادر القاهر القوي.....) ليش تتضايقي والله سبحانه كل شيء بيده صدقيني الدعاء لله بيغير كل حاجه مع نيتك الصادقة بالإصلاح كل شيء حيكون بخير الحمدلله أنا والله بعد ماعملت بهاذي الأسباب أحس إنو في شيء تغير كفايه بداخلي

حاجة أخيرة تخيلي لو إنك ماصبرت على أمك وأبوك وقعدتي تنتقدينهم وتحاسبيهم وتعيبي عليهم (والأولى ابن آدم يحاسب نفسه مافي أحد كامل) ايش يضمنك بكره لما تتزوجي يتكرر لأولادك نفس اللي حصل لك تغلطي عليهم وهم يغلطوا عليك
وكمان لاتنسي ممكن الآن الله يبغى يشوف صدق توبتك ويختبر إيمانك ويكفر سيئاتك السابقة ماتدري الله حكمته واسعة ومهما قعدنا نستنبط الأسباب يبقى تفكيرنا قاصر أمام قدرة الله


اليوم صلي وابكي وادعي الله واستغفري وبعدها ريحي بدنك حأعطيك وصفة صغيرة تهديء الأعصاب شوية حطيلك بالفواحة
3قطرات من بلسم الليمون lemongrass
2 قطرة من زيت أكليل الجبل

كلها بإذن الله بتخفف آلام الرأس والاحساس بالتعب وتنعشك وتجدد من طاقتك

أو اعملي لك أي ريحة بتعجبك وترفع من معنوياتك مثلا شمام
أهم حاجه اشحني نفسك إيجابي دائما وأبدا أحسني الظن في الله وعلقي قلبك بالله سبحانه