وعليكم السلام ورحمة الله وبركاته
اهلا فيك اختي شيخه
شوفي ياحبيبتي
مادام زوجك فرحان ومبسوط ومرتاح وما يبغى ينقل اشوف انك تأقلمين نفسك معاه وتسعين في راحته
نصيحه يا اختي لاتعطين فرصه لمشاعرك تتحجر وقلبك يقسى بقسوة الظروف اللي تمرين فيها وينتشر الروتين والملل
حبيبتي الزوجه لازم تطيع زوجها ولها الاجر من الله
قال رسول الله صلى الله عليه و سلم : ( إذا صلت المرأة خمسها و صامت شهرها و حفظت فرجها و أطاعت زوجها قيل لها : ادخلي من أي أبواب الجنة شئت )
يا اختي الصبر الصبر والطاعة من أجل ارضاء الله تعالى لانه امرك بذلك وبهذا تجعلي طاعتك لزوجك عبادة لله الواحد القهار وما زوجك الا وسيلة تستغلينها لتدخلي بها الجنة ان شاء الله.
انصحك ما توقفين عكس التيار خصوصا انك حاولتي كذا مره ومافيه فايده
خلاص اصبري يا اختي وتحملي وخليك مؤمنه بقضاء الله وقدره واحتسبي الأجر واعلمي ان الله يراك وعارف معاناتك اسعدي زوجك وريحيه وماتدرين يمكن يمن الله عليك ويكرمك بصبرك وتحملك ويجيك زوجك من نفسه ويسعى في النقل وتتيسر احوالك
وانصحك ماتجلسين مكتوفة الايدي لازم تشغلين نفسك يمين ويسار علشان ماتعطين فرصه للحزن والكدر يسيطر عليك
شوفي لك وظيفه اشغلي وقتك فيها والا سجلي في نادي وتعرفي على بنات وكوّني لك صداقات واطلعي معاهم وتزاوري انتِ واياهم اكسري الروتين وحطي لك جدول نظمي فيه وقتك واشغلي وقت فراغك والا سجلي في دورات تعليميه تعلمك فنون الطبخ او دورات حاسب او انجليزي يعني الاقرب لنفسك واللي تميلين لها ولاتستسلمين للهم وتضيقين صدرك والله انت الخسرانه في النهايه
ولاتنسين الدعاء في قيام الليل وفي صلاتك تسلي بالذكر و بكتاب الله والله لوماجاك الا حلاوة الايمان بتكفيك عن العالم
مايمنع تقومين صلاة الليل بالبقره وتكثرين الاستغفار بنيّة ان يرزقك الله الذريه الصالحه اللي تنسيك همك وتغير مجرى حياتك.
قال تعالى " وقلت استغفروا ربكم انه كان غفارا يرسل السماء عليكم مدرارا ويمددكم بأموال وبنين ويجعل لكم جنات ويجعل لكم انهارا"
اتمنى اكون نفعتك لو بشيء بسيط والله يوفقك ويسعدك ويهنيك
اختك المحبه لك قمر