[ورد الريـاض]

اهلا حبيبتي

انت اكيد في بداية زواجك صح ؟

اول شيء كويس انها مجرد ساعتين ما اشوف فيها اي مشكله مادام في البدايه كذا غالبية الازواج
حبيبتي شيء طبيعي انه يرغمك انك تروحين بيت اهله لكن صدقيني مع كل تقدم من عمر زواجكم راح يخف هالشيء تدريجياً
وخصوصا لما تجيبين اولاد تبدأ اشياء كثيره تتغير ويبدأ الاستقرار في البيت والله يادموع اعرف ناس كانوا
مثلكم يوميا طلعه وبعد كم سنه الآن بيتوتيين بشكل هذا جزء من المشكله ويبيلها صبر اوكي
ثانيا انتِ تقدرين بذكائك ماتروحين لهم كل يوم ويكون برضى زوجك ما ادري شلون اشرحلك هالنقطه مايصلح هنا
شوفي اذا كانوا اهله فعلا مثل ماتقولين ترا احيانا الاهل يسوون كذا من باب الغيره يعني اذا شافوا ولدهم ميت في زوجته بعض الاهل مو كلهم وان شاء الله اغلبهم يفرحون بس قله يغارون ويترجمون هالغيره
بمعامله مش طيبه للزوجه عرفتي فانتِ خليك ذكيه وطنشيء كلامهم طالما انهم قدام زوجك ماشين تمام
وان هذا الشيء بينك وبينهم خلاص تحملي والله يادموع بقول لك شيء انا مريت تقريبا نفس معاناتك تدرين لما يقول
لي احد شيء يضايقني والله يادموع اسوي نفسي مافهمت قصدهم واضحك معاهم واصير معهم اضم صوتي لصوتهم والله ماخليتهم يوصلون للشيء اللي يبونه ولما تعبوا تنااااااازلوا ومشوا مضبوط لاني ماحققت لهم غايتهم عرفتي وشيء حلو اننا نتظاهر بالغباء والبرود احيانا يعتبر من الذكاء ومن الحلول
حبيبتي تدرين في وضعك لازم تفضفضين لاحد بس انتبهي يكون زوجك شوفي وحده من صديقاتك او المقربه لك من اخواتك وفضفضي ريحي نفسك وخلي زوجك بعيييييييد
المهم الحين اهم شيء زوجك خلاص مو لازم تقولين له شيء وصدقيني مره مرتين راح تتعودين
ومشكلتك مو جديده تصير كثييييير بس والله يبيلها حسن تصرف وصبببببببر خليك قدامهم ياجبل مايهزك ريح
وقولي في نفسك والله ما اسمح لاحد يدمر السعاده اللي انا فيها وما راح اسمح لاحد يدمر حب زوجي لي
والله العالم هذا بعد الشيطان اللي مايرتاح الا اذا فرق اثنين وخصوصاً الزوج وزوجته فانتِ ياقلبي خليك في تحدي مع اي احد ممكن يأثر على حياتك وانا متأكده انك راح تفوزين بس بالركاده والصبر وعدم الاستعجال امسكي نفسك لما تعصبين يوم وبعدها بتبردين وبتقولين الحمد لله اني ماتكلمت احسن من ان اعصابك تنفلت وتتكلمين بكلام بعد ماتبردين تقولين ياليتني ماقلته وش استفدت

المهم حبيبتي انا اعطيك نصائح عن خبره في الحياة اتمنى تنفع معاك واي شيء تبين تسألين عنه تراني في خدمتك
اتمنى لك عيشه هاديه وهنيه
ولاتكبرين الموضوع عشان مايضيق صدرك حاولي دائما تنظرين للامور والمشاكل بأنها صغيره اريح لنفسيتك
اتمنى لك التوفيق والله يعينك حبيبتي