[ضاعت أحلامي]

صعب لا منك فشلت .. وصعب لا منك لقيـت
إن من يكره نجاحك .. يدري إنـك ما نجحـت


أمس ضقت .. ورحت أقلب ذكرياتي .. وانتهيت
عند صورة طفل صوته مثل صوتي لا انجرحت



وش مثل ؟ لا والله الا هذا انـا يـوم ابتديـت
أنطق حروفٍ تلعثـم فـي لسانـي لا انمدحـت



هذا أنا يوم الحيـاة بـنـظـرتـي عشريـن بيـت
ومسجدين ومدرسة من طين كم فيها اصطبحـت



هذا أنا .. واصبحت أتمتم (هذا أنا ) حتى بغيت
أختنق ..بس القدر عيا على موتـي.. وطحـت



وصاح صوت الطفل فيني : أنت من وين ارتميت
قلت أنا المستقبل اللي فيه كم همـت وطمحـت



أمس كنت أبيك تكبر .. بـس والله لـو دريـت
إني اللي عشت لجله ..مت عنـدك واسترحـت



لو دريت إن الزمـان يجـر رجلـي ما عديـت
ولو دريت إن البحور بـلا موانـي ماسبحـت



كان دربك لي طويل .. وكل ماشفتـك هويـت
قلت لك كبـوة جـواد وماكبيـت إلا وجمحـت




ليه تسمعني وتمشـي .. آه ليتـك مـا مشيـت
وآه ليتك من كثر عثـرات الأيـام انتصحـت



ضاعت أحلامي وظل الحزن فينـي واهتديـت
للطريق اللي يودينـي علـى دمعـي ورحـت



يالحزن ليتك مثـل دمعـي وتنـزل لا رقيـت
بس أعرفك لو مسحت الدمع تبقـى ماانمسحـت



كان حلمي في وجود إنسـان يبكـي لا بكيـت
وصار حلمي في وجود إنسان يفرح لا فرحـت



كنت أشوف الناس مثلي كل ماجعـت وظميـت
مادريت إن الأوادم ناس فـوق ونـاس تحـت



آه يا أول ذكرياتي ..خذنـي في حظنـك نسيـت
لا اسألك عن وجه ابوي اللي معه ياما سرحـت



خذني في حظنك أبغفى .. آآآآه مبطـي ماغفيـت
وان لمحت دموع عيني .. سو نفسك مالمحـت



خذني بحظنك وبعثر في جروحي .. وان قضيت
هز لي كتفي وقلي : عيب تبكـي لـو سمحـت



أضحك ..وعلم زماني من انا .. ومن وين جيت
وطق باب الحزن واصرخ فـيني لامنـي فتحـت



وضمني يمك .. وكمل ضحكتك لا من بكيـت
ودي اذكر كيف كانت ضحكتي .. لامن فرحت !





فهد المساعد