[مجهول]

جزاك الله خير اختي
ودي اضيف ان البنت ممكن تقول في غيري سوا العلاقه ونجحت معاه وعايشين مبسوطين فأرد واقولها ان انتي ماتدرين واش اللي يصير في بيتهم وحتى لو كنتي تدرين اقولك ان العلاقات ماتنجح لان اساسها باطل واللي يبنى على باطل فهو باطل واذا قلنا يمكن تنجح فنسبة نجاحها تقريبا 1% فهل انتي تضمنين انك تكونين من ال1% ؟
ممكن تقولين يمكن علاقتي تكون من ال1% طيب انا اقولك لنفرض ان علاقتك تكللت بالزواج ممكن يصير بينك وبين زوجك خلاف وفي لحظة غضب يذكرك كيف تعرف عليك مابتحسين بالقهر في ذيك اللحظه ؟تقدرين تردين عليه ؟ مابتصيب هالكلمة اللي بيقولها قلبك وتجرحه ؟ ترضين تكونين في هذا الوضع؟
بتقولين لاتفاولين عليّ
اقولك الحياة مليانه مشاكل وانتي تعرفين كيف ممكن تكون نهاية هالشي فليش ترضين فيه من البداية
واذا انتي الحين تسوين هالشي خلاص من هاللحظه اتركيه
بتقولين مااقدر خلاص
بقول ليش ماتقدرين لهالدرجة انتي تشوفين نفسك ضعيفه بسهوله ينضحك عليك ؟ ليش تقللين من نفسك تخلين واحد لعاب يلعب عليك ليش انتي لعبة ..بتقولين يقول اني اول وحده يتعرف عليها وانه اعجب باسلوبك وانه شاريك واثقه انتي ان هالكلام ماينقال لاحد غيرك بتقولين ايه واثقه لانه مره مبين لي.. انت ثقتك تعطينها كل من هب ودب ؟ هذا الشي عندك عادي؟
بتقولين مابيتركني في حالي اذا تركته
انتي من البداية غلطتي وتتحملين نتيجة غلطك ولا انتي مو قدها؟
صعبة انك ماتردين عليه ابدا واذا ارسل رساله بالجوال تتركينه؟ لاتلتفتين حتى من البداية اذا عرفتي ان هو اللي ارسل الرساله امسحيها قبل لاتكملين واذا مره زودها قولي لاهلك سندك واذا خايفه هزئيه لاترفقين عليه اعطيه الكلام على راسه والجأي لربك واكثري من الدعاء ترى الله قادر على كل شي حتى لو مسك عليك شي بإرادة الله مايقدر يضرك ماعليك الا انك تتوبين وتندمين على اللي سويتيه وتدعين من ان ربي يغفر لك
واذا قلتي بعد ايش بعد ماصار اللي صار بعد مافقدت اغلا ماعندي
بقول ليش اليأس ادعي ربك الله يقول في كتابه (( ادعوني استجب لكم )) وترى الخوف والندم اللي بتعيشين فيه هذا عقاب من ربي على اللي سويتيه وعقاب الدنيا اهون من عقاب الآخره اصبري عشان ربي بإذنه يعطيك على صبرك مو تفكرين في الانتحار او بإي فكرة من افكار الشيطان ...وحتى لو اهلك والناس عرفوا وانتي تتعذبين من نظرات الناس ومن كلامهم ونظرات اهلك ترى لسا فيه رب غفور رحيم توبي واندمي على اللي سويتيه وادعي ربك وان شاء الله ربي يكون معك
بس اهم شي لاتتمنين الموت لانه حرام بدال ماتصبرين وتاخذين اجر ان شاء الله تسوين شي حرام وتاخذين ذنب


اختي ممكن ان كلامي يكون قاسي عليك بس لازم اقوله لان مافيه مراره الا وبعدها حلاوه ان شاء الله قال تعالى (( ان مع العسر يسرى ))
وفي النهاية اقولك ان الانسان يغلط بس اتعظي وتوبي
وهذا دعاء ابكتبه للهم والحزن
(( اللهم اني عبدك ابن عبدك ابن امتك ناصيتي بيدك ماض في حكمك عدل في قضاؤك اسألك بكل اسم هو لك سميت به نفسك او انزلته في كتابك او علمته احد من خلقك او استأثرت به في علم الغيب عندك ان تجعل القرآن ربيع قلبي ونور صدري وجلاء حزني وذهاب همي))

وهذا دعاء لوقت الشده والضيق
(( ياودود ياودود ياذا العرش المجيد يافعال لما تريد اسألك بعزك الذي لايرى وبملكك الذي لايضام وبنورك الذي ملأ اركان عرشك ان( اسألي حاجتك )) يامغيث اغثني يامغيث اغثني يامغيث اغثني)




وانتي حره تختارين الطريق المورد واللي كله صفاء في بدايته ونهايته حفره ولا الطريق الوعر بدايته وكله حفر عشان تطيحك لكن نهايته صفاء وهناء


والسلام عليكم