[The one message]

السلام على جميع من يقرا كلماتي المبحوحة؛
بتمنى تكونوا بأتم الصحة والعافية
يمكن استغربتوا من العنوان...ولكن ما اظن في استغراب من الجواب لانه شبه معروف
الحقيقة انا ما كنت بدي افتح هالموضوع بهاد الوقت انما كنت حابب اقرا مواضيع مختلفة من الاعضاء ولكن..اثناء بحثي بغوغل صادفت مواضيع بتحمل كلمات منسوجة بعنصرية وحقد تجاه عرب فلسطين وعرب الداخل ومنها اقامة العرب هدول في الدول العربية او طلبهن للحصول على الجنسية بأي دولة عربية سواء مصر الاردن السعودية الامارات...
وكالعادة واسمحولي على التعبير"الجهل" المتفشي بين الناس انه عرب فلسطين ناس متل القطط الشاردة الجائعة اللي بتبحث عن ماوى او قوت ونادرا ما تلاقي!
والظلم اللي بتلاقيه من الدول العربية متل الظلم اللي بتلاقيه من اليهود اذا مو اكتر!!
والجهل الافظع انه بعتبروا عرب الداخل يهود؟!!!!!!!! بسبب انهن بحملوا الجنسية الاسرائيلية الزرقا
وهلأ بعيد عن السبب اللي خلى كل عربي في "ارض فلسطين" يكون تحت جناح الصهاينة
انا راح اوجهلكن سؤال
يا ترى هل انتوا بتحملوا هاد الحقد والمشاعر السلبية تجاه عرب فلسطين وعرب الداخل؟!
وبتعملوا كتلة وحدة مع اليهود ضدهن والا كيف؟
انا بسمع وبقرا وبشوف كتير اراء الناس حول الموضوع هاد ان كان من لبنان او سوريا او الاردن او السعودية ومصر والخخخخخخخخ ما شاء الله البلدان العربية كتيرة
هل ضاعت العروبة والانسانية؟ واصبحت الكلمة البديلة هي اللا مبالاة!
قبل فترة سمعت تصريح من الفنانة شيرين عبد الوهاب بتقول لن اغني لعرب ال48 لانهن يهود!!
وما لقيت خبر يكذب هاد الشي..فاذا هالحكي صار وطلع منها!
هدا غير عن شعب مصر كله اللي بقول عن عرب الداخل""كلاب"" وخون
وغير المعاملة اللي بلاقوها حجاج عرب الداخل بالسعودية خصوصا الشخص اللي سجنوه اخر فترة لسبب مجهول!
وفي شي تاني حبيت اخد رايكن فيه
هلأ اذا شخص فلسطيني او شخص عربي مسلم معه هوية اسرائيلية وحب يعيش ببلد عربي متل الاردن او السعودية..ممكن يعطوه الجنسية مثلا؟ او ممكن يعاملوه معاملة الاسلام الحقيقية؟
والا راح يعاملوه مجرد ضيف ما عنده حقوق..ولمعلوماتكن العرب اللي "في ارض فلسطين" او عرب الداخل عندهن حقوق من قبل اليهود..وخايف لتكون هاي الحقوق اكتر من الحقوق اللي بتعطيهن اياها اي دولة عربية اخرى..!
هدا غير اذا فكر يا حرام هاد الفلسطيني او الاسرائيلي انه يوخد جنسية عربية تانية ليكون شخص محبوب وليس منبوذ!
راح يدوق المر والحنظل حتى يوخد الجنسية هاد اذا اخدها في ظل التعجيزات المحطوطة في قانون منح الجنسية!!!!!!!!!!!!
واذا سالتوا اي شخص ليه عم يطالبوا انهن يسحبوا الجنسيات من هدول العرب او يعملوا تعجيز او رفض...راح يكون الجواب لحتى نساعدهن يحافظوا على عروبيتهن وعلى حق العودة والخ...
ولكن هل هاد صحيح؟
راح اترك الاجوبة للجميع لعل وعسى نقيم الغشاوة عن هاد الموضوع
وهيك انا بكون عبرت عن بعض اوجاع هاد الشعب اللي بروح من حيط لحيط ومن قضبان لقضبان
في انتظار الاخوة العرب...