[ورد الريـاض]

السلام عليكم
الرسول صللى الله عليه وسلم يقول فيما معناه لو امرت احد يسجد لاحد لامرت الزوجه تسجد لزوجها
في نظري ان الزوجه العاقله المحبه لزوجها والحريصه على مملكتها قادره انها تعيش بسلام وهدوء مع من اختاره قلبها
ورضت به شريك لحياتها وابو لعيالها
المشاكل ممكن تنحل والتصرفات ممكن تتغير كل شي في هالدنيا له باب او طريق يوصل له
والمفروض على كل زوجه انها تستخدم اسلوب الذكاء مع زوجها تستخدم نقاط الضعف فيه عشان تبقى المشاعر جياشه على طول
طريقة الزوجه هي اللي تملل الزوج وطريقة الزوج هي اللي تملل الزوجه واذا انعدم التفاهم بين الزوجين انتهت حياتهم غالبا مايكون الزوج راكب راسه بس بصراحه انا انتقد الزوجه اللي تركب راسها وتعاند وتقول عزة نفسي ماتسمحلي
علشان تمشي الحياة ويكون كل شي حلو لازم الزوجه تضحي وتتنازل وتتفاهم
وعلى ان الزوج في الغالب اكبر سنا فاعتقد ان الزوجه لازم تكون اكبر عقلا
ومتى ماعاملت الزوجه زوجها وكانه واحد من عيالها في الحرص والاهتمام والرعايه وعاملته كملك في الاحترام والامر والنهي ملكت قلبه حتى لو كان اقسى مخلوق وصبرت عليه وعاملته بذكاء ودهاء الحريم مصيره يرجع لها يبوس رجولها
صدقوني الحياة الزوجيه من السهل انها تكون رائعه
واحب انوه لشي مهم جدا جدا جدا
اللي هو استشاره من هب ودب في الامور اللي تكون بينك وبين زوجك هذا اكبر غلط
والله مايدهور الزوجه مع زوجها الا كلام باقي الحريم ونصائحهم
اذا بغت الزوجه تشاور في شي تنسى اهلها واقاربها وصديقاتها انا انصحها قدامهم ماتجيب طاري لزوجها نهائيا حتى لو حاولت اي انسانه تثير اي موضوع وتعرضت لزوجك اسفهيها ولاتعطينها وجه لانك ماتدرين ايش قصدها ومبتغاها
اذا بغيتي مشوره أسالي مشايخ او اخصائين وبس
وكذلك شي مهم جدا ولاحظته في بيتي وبيوت المقربين حتى اني كنت انصح في هالشي وكانو بعد مده يقولون لي والله انك صادقه
اللي هو الزوج دائما تنعكس عليه معاملة زوجته له وتلاقيه بعد فتره يتطبع بطبائعها وتصرفاتها
يعني ممكن اي زوجه ترسم المعامله اللي تبي زوجها يعاملها بها وتعامله فيها سنه سنتين وبعدها تشوف ان المعامله هذي رجعت لها سبحان الله حتى في الكلام دائما الزوج يتأثر بكلام زوجتها اوتوماتيك يصير مثلها بدون مايحس
فاشوف ان هذا شي حلو وفي صالح الزوجه الذكيه اذا عرفت كيف تستغل هالنقطه لانها يبيلها صبر
وممكن ان الزوجه تربي زوجها بطريقه غير مباشره كأن تعلم اولادها او اخوانها الصح والخطاء قدامه وتذكر الاسباب
يعني اياك اعني واسمعي ياجاره هذا اسلوب حلو جدا في التعامل الناجح في الحياة الزوجيه

وفي الاخير متى ماكانت الزوجه حاطه في بالها انها راح ترعى مملكتها وتسعدهم عرفت توصل للشي هذا
والعكس صحيح
وماننسى نقول ان الدعاء امر اساسي للعلاقات الزوجيه الحميمه ومن اسهلها
اللهم سخر لي زوجي وسخرني له وغيره الكثييير
طلب اللي تستفيد من نصيحتي تدعي لي