منتديات موقع بشارة خير

المرايا..
صدق ينطق..
في نوايانا الدفينة

طعن صادق ..
يفضح الزيف وسنينه

المرايا..والله العالم
هي اصدق شي
في عالم كذوب

في زمن مظلم وظالم..ماتلاقي ضي
ينبض بقلوب الدروب

المرايا..
عشق ساكن داخل قلوب الكثير من الصبايا
إلا نورة..
بنت غاية في الجمال
حسنها ياخذ من يمناك..
لحدود الخيال

يوم نادت أمها وبصوت عالي 000
(يمه..يمه..بسرعة تعالي)
لما جتها أمها..
قالت :علامك..؟
نورة.. قالت:
يمه أرجوك بقيامك
ابعدي هذي المرايه
ابعديها00
وإلا اقلك00
يمه..تكفين اكسريها
ماابيها00ماابيها

ولو سألتوا..
ليه هي قالت كذا..
وايش العلاقة...؟!
قلت:شوفوا..
ماأقدر اخبي..
لذا نورة(معاقة)

شلل نصفي..
سرق منها طفولتها
سرق حتى ابتسامتها
تشّرب جسمها الطاهر على غفلة
ولا قدّر براءتها وهي طفله

حواليها كثير أطفال
بنات العم..والجيران
عيال الخال

تراقبهم..تتابعهم
تشوف احمد..وهو يسحب شعر سلمى
وعلي يلحق مها وبيده مسدس ما
وخالد قاعد يحاور حسام بعلبة البيبسي

ويكسر ظهر هالمشهد
حزن نورة ..وهي تبكي على الكرسي
تحاول قد ماتقدر
لاجل تخفي مدامعها
وثار الدمع واتحدر
وبدت رعشه بأصابعها
تزم يدينها لكن..
يديها ماتطاوعها

وتكبر نورة..ويكبر
معاها الهم
ويجري حزنها الاقشر
بمجرى الدم
وياصل عمرها العشرين

وفي هالعشرين..
تغيّر كل شي فيها
ملامحها..مع إن الحزن ماسحها
أمانيها..ولو ماعاد تعنيها
سوالفها..بعد ماالهم والفها

في هالعشرين
على نفس الألم..تصبح
وعلى نقس القهر..تمسي
على الكرسي..!!

في هالعشرين..
ابد ماتابعت موضة
ولا تعرف( جيفنشي) او ( كريستيان ديور)
او (فيرساتشي) وعروضه..
ولامكياج ولا إكسسوار..
وحتى عطور..

تضج تثور..
إذا قالوا لها:
نورة..شرينالك عطر
شوفي بعد فستان
يانورة البسيه الحين
ترى بيطلع عليك جنان
بسرعة بس ..لاتبطين

تجاوبهم..
بسرعة ليه..
وإلا لمين..؟!!
وهو من كثرة العرسان..!

تقاطعها أمها..
نورة.. وش تقولين..؟!
ترد نورة..
يمه..يمه
كفاية ..واسمعيني زين
أنا عمري ترى عشرين
ترى ماعادني طفله..

ياناس المسألة سهله
مثل ماواحد وواحد يساوي اثنين
معاقة.. خير..! ماتفرق

وفي هاللحظه00بدت لحية أبو نورة..
تلم الدمع من عينه..
وبدت تغرق!

يبه ..يمه..أنا مليت من روحي
نعم مليت
تعبت أداري جروحي
وياما أخطيت
خطاي إني تصنعت السعادة..
لاجل خاطركم
لاجل ماتنجرح فيكم
مدامعكم

يبه..تدري..؟!
كنت أتمنى من صغري..
وهذي أمنية عمري
وإلا الحين هي منوه
تمنيت احظنك بالليل
الا من جيت من شغلك
أبوسك فوق راسك حيل..
وأفك الجزمه عن رجلك
أروح اجيبلك قهوة
واجيك اجري

وحتى أنتي ياأمي..
لو تدرين كم عانيت
كم اتمنيت..
اخفف عنك شغل البيت
مثل مانجوى تساعد مرت عمي

يبه..يمه..
تراني ضقت
وربي ضقت من نفسي
ياربي شقد طفشانه
وتبغوني بعد البس..!البس من عشانه..؟
ابد لاتصدقون إني
ابتزوج..واجيب عيال..
والله عال..!!
من اللي في هالزمن هذا..
بيرضى أكون له زوجه
ويتزوج معي كرسي..!!

يبه انسى
وحتى أنتي دخيل الله يايمه..
بعد انسي..

وهذي سالفة نورة..
ياهي بنت مقهورة
مضى من عمرها عشرين
وهي باقي على هالحال
حكايتها انتهت الحين
وخلت داخلي ثورة

وأنا مابيهدالي بال
الين اعرف
من اللي بوقتنا رجال
ويتزوج مثل نورة..؟؟

للشاعر محمد بن عويضة اليامي