منتديات موقع بشارة خير - تنكروا له فدعاء عليهم

حبيت اهديلكم ذا القصه وهي كلها عبر وفوائد وهي عن العاقيين والظالمين لأبوهم والعياذ بالله:-

وهذي قصة رجل وله ثلاث عيال ماتت أمهم وهم صغار وعيا الأب يتزوج

ثانيه خائف على عياله من المرأة الثانية تعذبهم وتشقيهم و المهم

الرجال رباهم وتعب عليهم وكان يطلع من الصبح ولا يرجع إلا بالليل

ونوبات يتأخر كله هذا على شأن يوفر لهم الأكل وكان كل ما طلع

خلاهم عند جاره يلعبون مع عياله وإذا جاء من المقناص سوالهم

العشى وعشاهم وكان ما يتعشى إلا إذا شبعوا عياله ويأكل من بقايا

أكلهم.

ودار الزمن وكبروا العيال وزوجهم أبوهم وشاب الأب الطيب ولا عاد يقدر

على القومة والطلعة إلا بالمساعدة المهم قامن حريم عياله يتشكن منه

لا زواجهن الين اجتمعوا العيال وكل يقول للثاني خله عندك حتى اجتمعوا

على رأي واحد أنهم يطردونه.
الأب مالقا غير جاره وعياله الأولين الطيبين

ورعوه وكرموه وطيبوا مكانه كأنهم عياله وقال الأب القصيده المذكورة

ودعوته المشهورة فيها المهم عياله ماتوا كلهم ولا واحد منهم خلف له

ولد وانقطع ذكرهم ونسلهم فحسبي الله عليهم ناكرين الجميل

والمعروف والعشرة وعاقين الوالدين .

وهذه القصيدة - :

قال الذي يقرا بليا مكاتيب = ياللي تقرون العمى من عنـاكم
يا عيالي اللي تشرفون المراقيب = تريضوا لي واقصروا من خطاكم
خذو كلام الصدق مابه تكاذيب = مثل السند مضمون للي وراكم
يا عيال لا صرتوا ضيوف ومعازيب = ترى الكلام الزين ملحه قراكم
وتروا السبابة من كبار العذاريب = وهرج البلايس ما يطول لحاكم
المذهب الطيب فهو مذهب الطيب = والمذهب الخايب يـــبور نساكم
يا عيال ما سرحتكم باللواهيب = يا عيال ما عمر المعزب ولاكم
ياما توليت القبايل تـــقل ذيب = من خوف لا ينقص عليكم عشاكم
وياما شريت السمن من عرض ما جيب = يفز قلبي يوم يـــبكي حداكم
وياما قطعت من الفيافي العباعيب = ندور من صيد البراري غذاكم
يا عيال دوكم لحيتي كلها شيب = هذا زمان قعودنا في ذراكم
قمت أتوكا عوج المصاليب = قصرت خطانا يوم طالت خطاكم
عطوني القرضة عليكم مطاليب = عطوني القرضة جزى من جزاكم
لابد يوم عاوي دوني الذيب = بالقبر ما أفرق طيبكم من رداكم
ماني بفاضحكم بوسط الأجانيب = با عمالكم يدرون كل أقرباكم
لو كان تدرون الردي والمعاييب = صرتوا مع المخلوق مثل خوياكم
خوالكم بالطيب تروي المغاليب = ولو تتبعون الجد محد شناكم
وش علمكم يا تاركين المواجيب = حسبي عليكم هالردى وين جاكم
يالله عسى أعماركم شمسها تغيب = يعتم قمركم ثم تظلم سماكم
يا علكم في حاميات اللواهيب = ياللي على الوالد خبيث لغاكم
شفت الجفا والحيف والغلب والريب = بضلوعكم لا بيض الله قراكم
أطلب عسى نساكم ما تحمل ولا تجيب = ولا احد من الوغدان يمشي وراكم
اخسوا خسيتوا يا كبار اللغابيب = اهبوا هبيتوا يقطع الله نماكم