يا صالح البحث خله واترك الماضي = عوج الليالي عسى ربك يعدلها
لا تتبع النفس ترث فيك الأمراضي = وادع الحواسيس عنك ولا تخيلها
واعمل لدنياك واخرتك وكن راضي = وارزاقنا عند رب العرش كافلها
واسلك طريق سليم فيه تعتاضي = بعض المواقف تبيض وجه فاعلها
واحذر تسارع على الهرجة وتقتاضي = ودعوة تعداك لا تشرح بقايلها
عندك خبر بالعلوم اطوال واعراضي = ما تنقضي الحاجة اللي ما تقوم لها
وافطن لوقتٍ رمى راعيه بالحاظي = دنيا لشروى الفهد تنصب حبايلها
الوقت هو الوقت ولافراض الافراضي = هذي نجوم السما وهذي منازلها
ما به تبدل ومد البحر ما فاضي = تبدلن الضماير من يحللها
لو تنصف الناس ما تحتاج للقاضي = تلقى المحاكم خفيفاتٍ مشاكلها
ولو ما الغنايم تحي وهبات وحظاظي = كان اكثر اللي تشوفه ما يصلحها
ومن راقب الخلق يكسب الهم بالفاضي = كل هدومه على قده يفصلها
والختم اصلي عدد ما بارق ناضي = على نبي بدا بالسنة وكملها