منتديات موقع بشارة خير

قصيدة لشاعر إماراتي يشكي الحال

و الحال من بعضه

تو .. طين

وش عاد يا دار ٍ بهـا صـار ( توطيـن ) و في مكتب التوظيف سوسن و ميسـون !
مديرهـم مـدحـت و نائبْـتـه نسـريـن و على الرسبشن حمّص و فول و زيتـون !
كل ما اتصلت اسمع ( الـو مرحبـا ميـن ؟ بدّك وظيفه ؟ .. مين دلّك علـى هـون ؟ )
اقـول انـا لـي اتصـل صـار شهـريـن و انتـوا وعدتونـي متـى بـس توفـون
اسمي ( مواطن ) ( جامعي ) طيب و زيـن كنـي ابخـطـب عنـدكـم و اتّغـلـون !
عنـدي شهـاده طايحـه بجبـدي سنيـن عشش عليها شـي لـه ستـة عيـون !!
لو للشهـاده لسـان قالـت ( علـى ويـن ناوي تودينـي .. تلـف فينـي الكـون ؟ )
مـن كثـر مـا صورتهـا غـارق بديـن للهندي راعـي المطبعـه صـرت مديـون
لا ليلـي ليـل ولا نهـاري نـوى يبـيـن دقيت راسـي ليـن مـا صـرت مينـون !
مطلـوب خبـره عالأقـل فـي مجالـيـن ولا تجينـا بواسطـه و سيـر مـدهـون !
ولا انثبـر فـي بيتـك .. افـرك بكفـيـن يومـك يشابـه امسـك و عيـش مغبـون
اعـدادنـا ويّـاهـم اربــع مـلايـيـن و اهل البلد للحين مـا صـاروا مليـون !!
ويـلاه مـن باكـر اذا وضعنـا الحـيـن و احنا اقل مـن الربـع حالنـا شجـون !
و اللي ابتسـم لـه حظـه والله مسكيـن !حصّل وظيفه .. بس في وين .. تـدرون ؟
ساكن في راس الخيمه .. حطوه في العين !! و اللي سكن في الذيد .. في السلع مدفون !!
يشوف اهله بـس فـي الأسبـوع يوميـن و اذا حسبتوا الدرب كم ساعـه .. تبكـون
يعنـي فـي كـل احوالـه ذاق الأمـريـن شغّـال محـزون و بـلا شغـل مـحـزون
و الأجبنـي اللـي راتبـه فـوق عشريـن فلـه و سيـاره و تذاكـر .. و طـاعـون
عنـده بـدل كـل شـي عالراتـب الفيـن حتى بـدل معجـون اسنـان و صابـون !
و من بعد ما يجمـع مـن بـلادي فلسيـن ويربّي من القعـده علـى الكرسـي بطـون
و يصير في بلاده غنـي و عنـده برجيـن يرحل و هو جاحد .. و كم مثلـه ملعـون !
و حتى الجماعـه قـوم مدحـت و نسريـن وردّهــم لبـلادهـم لــو يـطـولـون
يرضـون بشويـة دراهـم .. و شفتـيـن صبح و عصر .. لو حتى في الليل يرضون
بس لـو سمعتـوا همسهـم بينهـم بيـن وسـط القهـاوي يلعنـون و يسـبـون !
لا تحسبونـي عنصـري .. كلنـا طـيـن و الخـل لـو عاتـب محبيـنـه يـمـون
داري و انـا اولـى بهـا مـن الغريبيـن مـا يوصلـون لحبـهـا لــو يمـوتـون
و ( الأقربون اولى ) .. كلام ٍ مـن الديـن ما جبته من شعـري مـع الهـام و ظنـون
ولـد البلـد مـا يبغـي لبـلاده الشـيـن بالـروح بـالـدم يفتديـهـا ولا يـخـون
لكن سؤالـه يـوم قلتـوا لـه ( توطيـن ) يا كيف بيـد الغـرب توظيفـه يكـون ؟؟!!
شعارهـم معـروف ( راجعنـا بعـديـن ) و بايـن مـن التأجيـل .. انهـم يخافـون
اذا معك خبـره .. يـا اهليـن و سهليـن و اذا شهـاده بـس .. عنـك يـصـدون
مـا عندنـا شاغـر .. و بطلنـا تعيـيـن ولو تحرق الهاتـف تـرى مـا يـردون !
من وين اجيب الخبره ؟ من وين من وين ؟دام الوظيفـه عنـد سوسـن و ميسـون !
عنـدي بمطبـخ بيتنـا خبـره سنتيـن ! تنفـع اذا صـاروا المطاعـم يوطنـون ؟؟!
ولا اهاجر و آخـذ الخبـره فـي الصيـن ؟ صـح العيـون صغـار .. لكـن يقـدْرون
سـؤال يـا دار ٍ ..صراحـه بترضـيـن ؟ اني اسافر و اطلـب الغـرب لـي عـون ؟
و سؤال يا ناس ٍ علـى الـراس و العيـن صدق الوظايف واسطه و سيـر مدهـون ؟
امـا الجـواب الشافـي يجينـي الحـيـن او هاتوا تأشيره .. اذا كنتـوا ترضـون !

وسلامتكم

http://www.ibrigate.com/vb/images/smilies/copy.gif http://www.ibrigate.com/vb/images/smilies/copy.gif