منتديات موقع بشارة خير - قدام تلبس عبايه

عهدي بها قدام تلبس عبايه
............................وانا بعد قبل البس شماغ وعقال
طفلين نتهجى حروف القرايه
............................الله يامجمل سواليف الاطفال
كانت لنا في كل شارع حكايه
............................وكنا نقول علوم ماهي بتنقال
وكنت اتقاسم مامعاها معايه
............................من عسكريم التوت لا علك ابو ريال
وكانت بعكسي شاطره بالقرايه
............................تقراء جزء عم وطه والانفال
وانا لك الله من مواري غبايه
............................مدري ابو نقطه هو الذال او الدال
وكانت لابويه تشتكي من شقايه
............................وتعلمه كيف اربط الباب باحبال
ياما على ظهري كسر من عصايه
............................يقول لي خلك وانا ابوك رجال
وامي تقول ادع لولدك الهدايه
............................خوفي يصيبه كثرة الضرب بهبال
لا شفتها مع اول الدرب جايه
............................مدري انا اللي ملت والا الوطا مال
احس قلبي يرتجف في حشايه
............................ماكنه الا الضيف لا هز فنجال
ياما عن السعلي تخبت ورايه
............................لا خوفوها فيه ثم شافت اضلال
تقول خلك يامحمد معايه
............................واستانس العب عندها دور الابطال
واغار حتى من عيون اصدقايه
............................لا طالعوها قلت تكفون ياعيال
...........لا طالعوها قلت تكفون ياعيال................
محمد النفيعي