منتديات موقع بشارة خير - ( . . .اثنين والثالث يبا المعبــــار) من الحكم

حسبت عشران الرخا ساعة الرخـــــا
وجدتهم عند الحســــــــــاب كثــــــار

وحسبـــتهم عند الشـــــداد وجدتهـــم
اثنين والثالث يبــا المعبـــــــــــــــار!!

لابارك الله في صديقن صــــادقـــــته
في حــــاجه وبحاجتك بـــــــــــــــوار

صديقك صديقك ساعة الضيق والكدر
ولا الرخــا فيه الربوع كثــــــــــــــار

دارن توريـــك المذلــــة خلهـــــــــا
تـــــلقى بـــدل دار المذلـــــــــة دار

لو انها خضر تمــــــايل غصونهـــا
ماتنقبل من دون عــــــــز وكـــــــار

من عـــاش بالذلـــه ويرضى مذلته
راحت حياته بين ذل وعـــــــــــــار

الله يقطع راس مـــــا فيه نخـــــوة
ولا فــــيه شيـــــمه ولا مـــــــــقدار

من عاشرأصحاب الردى عاش الردى
ولا بــد يفجـــر صاحب الفجـــــــــار

تــرى الردي بيتن رديــــن ســـاســـه
لابــــد مع طـــول المدى ينهــــــــــار

وليا تبعت الهـــــون هـــانت قيمـــتك
يضفي عليـــك من الهـــون استــــــار

احذر خضوع النفـــس ولا تهينــــــها
إلا لوجه الواحـــــــــــــــــــد القهــــار

والعز عـــز النفس والصمـــت حكمة
والهـــذر يضــعف قيمة الهــــــــــذار

واهل القشر لا عــــاد تتبع طريقهـــم
ان جو يمين الدرب صد يســـــــــــار

اتبع طريق الطيبين اهـــــــــل الشرف
اللي لهم عند الـــــــــــلزوم اذكـــــــار

من صاحب الاشراف شرف نفســــــه
عمار يا اصحاب الشرف عمـــــــــــار

من صد عنك اجزه وجازه بصدتــــــه
صبرن على المبغض لهيبة نــــــــــار

اللي يوريــك الجفـــــا لا تصاحبــــــه
تجفاه وانكر صاحب الإنكــــــــــــــار

ومن مااستشارك لو تشوفه ضــــــايع
خله بوجهه عامي الاشـــــــــــــــــوار

واجعل سلاحك دايمن في جانبـــــــك
عن العدو ترى العدو غــــــــــــــــدار

قديم العداوة مايخلي عداوتـــــــــــــه
عدو الليـــــــل اصيحب بالنهــــــــــار

لو يعجبك هــــــــرجه وضحكة سنه
قلبه عليك من الغــــــــــــضب دوار

أنا ناصح العاقل بتقوى الخــــــــالق
اتق وليـــــــــــــك سر والاجهـــــار

صل الفروض الخمس والصوم والحج
وحذراك لا تنو الدنـــس بالجــــــــــار

واحفظ لسانك لا تجيبه زلـــــــــــــه
عن كلمتن تضحك بهـــــــــا الاشرار

وان شفت لك عورات غمـض وزلها
لاتصير لاحوال البشر سبـــــــــــــار

ترى فيك عورات كثير عدهــــــــــا
والناس فيها ألسن وفيها ابـــــــــصار

هذا وانـــــــــــــــا ماني وكيلن موكل
ولاكاشف عن الستير استـــــــــــــار

يارب يامعبود يالفرد يالصمــــــــــد
باسمــــاك ياوهاب ياجبـــــــــــــــار

اطلبك عفوك واستجيـــــــــــر بظلك
عن فتنة الدنيا وعذاب النــــــــــــــار

ياربي ارحمني ونور قـــــــــــــبري
من رحمتك نور علي انـــــــــــــوار

نهارن أطش بحفرتـــــــــي وحداني
في حفرتي داخل رمل وجـــــــــدار

حطوني الصدقان واقفوا عنـــــــي
مالي سوى رحمتك ياغفــــــــــــار

صلاة ربي عد ماذعذع الهـــــوى
على النبي المصطفى المختـــــــار

****

سبار:أي تبحث عن الشيء الخافي.
أطش: أدخل قبري

للشاعر نــاصر عياضة الرشيدي