الله يرحم حبنا اللي قتلتيه

جفت دموعي والبقا في حياتك

ياللاسف كل الاسف مابكيتيه

انتي الغرور اعماك مع حب ذاتك

انتي بديتي الحب وانتي نهيتيه

اقري عليه الفاتحه في صلاتك

انتي رعيتي الحب وانتي طعنتيه

توني دريت ان الغدر من صفاتك

انتي شريت الحب مني وبعتيه

عسى الثمن يكون سبت غناتك

انتي بنيتي الحب وانتي هدمتيه

الله اكبر من يسوي سواتك

انتي رسمت الدرب بس مامشيتيه

اعماك عن درب الغرام التفاتك

انتي كتبت العهد وانتي مسحتيه

محاولة تزوير في ذكرياتك

مرة لبستي الحب مرة فصختيه

هذا الهوى لاتحسبينه عباتك

قلتي احفظه تذكار واقول مابيه

تذكار حبي هو شهادة وفاتك

خلي جمالك ينفعك واستغليه

روحي ورا اللى قال لك ياحلاتك

اخذي الهوى وياك ليش احتفظ فيه

يمكن يجي له يوم يهدم حياتك

لشاعر طلال السعيد