منتديات موقع بشارة خير - اقرأوا هذا الحوار

حوار بين اتنين سمعهم تقيييييل

تخيلوا لو اتنين سمعهم ثقيل اتكلموا مع بعض !!.. ايه اللي ممكن يحصل ؟ تعالوا نشوف اتنين من دول ، واقفين على محطة الأتوبيس ودار بينهم هذا الحوار :
الأول : الأتوبيس ده بيروح مصر الجديدة ؟؟
الثاني : على الحديدة !!.. ليه إنت طالب إحسان .
الأول : بذرة الكتان !! لا .. دي تلاقيها عند العطار .
الثاني : جزار !! آه قولي كده .. عايز تشتري لحمة .
الأول : معاك حق .. الدنيا زحمة .. علشان ده ميعاد خروج الموظفين .
الثاني : نور الدين !! لا والله .. ما عرفوهش .
الأول : ما بتشربوش !! ليه ؟.. كفا الله الشر .
الثاني : رأس البر !! .. ده مصيف هادي .
الأول : عايز تركب للمعادي .. دي منطقة جميلة .
الثاني : بليلة !!إنت شكلك كده جعان .
الأول : عيان !! أي والله . إنت باين عليك عيان .. طيب ما تروح للدكتور .
الثاني : الحنطور !! ده أحسن من الأوتوبيس ، وبيوصلني لحد الباب .
الأول : هباب !! وأنا اللي كنت فاكرك محترم .
الثاني : اتخرم !! هو مييين ؟؟
الأول : عاوز اسبرين !! ليه إنت عندك صداع ؟؟
الثاني : قراع !! ينهار أسود . ده مرض خطير .
الأول : لا والله مش عايز . وبعدين مش بأحب الفطير . تقيل على المعدة وتمنه غالي .
الثاني : خالي .. إنت تعرف خالي ؟؟ ده راجل كبير في السن .
الأول : الجن .. نهارك مش فايت .. إنت عليك عفريت ؟؟.
الثاني : لا والله .. ممعاييش .. إنت عايز الكبريت ليه .. عايز تولع ؟
الأول : أدلع !! أدلع عليك إنت ؟؟ إنت ما تملاش عنيا .
الثاني : يقبضوا عليا !! ليييه ؟
الأول : إنت غريب يا راجل .. إنت شكلك شحات ، ( يدفعه من القميص ) روح اشتغل شغلة تاكل منها عيش .
الثاني : خيش !! والله ده صوف انجليزي .
الأول : بنتك زيزي !! ربنا يخلي .
الثاني : إنتاج محلي !! ده مستورد .
يمر شاويش من بتوعنا .. يلفت انتباهه الحوار : بتعمل إيه يا جدع منك له ؟؟ !!
الاتنين : إيوه يا شويش .. احنا مستنين الأوتوبيس .
الشاويش : نهاركم مش فايت ... جواسيس !! قدامي على القسم .