|
للمتزوجات المجروحات الغافلات 0000 شوفوا نصرة ربي لي بعد صراع دام ست سنوات
بسم الله الرحمن الرحيم السلام عليكم ورحمة الله وبركاته ( الموضوع منقوووووول للإستفادة ) للمتـزوجات المجروحات الغافلات ... شوفي نصرة ربي لي بعد صراع دام ست سنوات اليوم وبعد " معاناة ست سنوات " أنامبتسمه بعد ماكنت بمحنه مايعلم بها إلا الله سبحانه وأقرب الأشخاص لقلبي هي أختي إلي تصغرني بأربع سنوات أول شئ أقول الحمد لله الذي بمكارمه تتم النعم اللهم لك الحمد على نعمة الأمن والأمان ووالله الأمان النفسي مامثله أمان ... قصتي طويـــله طويله طويله تحمل من الالم والهم والحزن الكثير لكنها تهون عندما أخذ نفس عميــــق وأقول وكلي يقين اللهم أجرني بمصيبتي وأخلفني خيراً منها ... ياعزيزاتي تبدأ قصتي بزواجي الي مر عليه 13 عام والله يجعله زواج الدنيا والأخره ولا يفرق بيني وبين زوجي ولا أي أخت في الله وزوجها ويبعد عني وعن أخواتي المسلمات المسالمات الحافظات والطائعات لله ورسوله شر فتن بنات إبليس اللهم آمين ... هذي القصه القصد من نشرها الفائده لكل من جربت واللي ماجربت شر فتنة بنات إبليس ... تزوجت أكيد ومثل ماكان سائد بهذاك الوقت في عائلتنا البنت ماتعدي سنه أو سنتين على الدوره إلا وهي ببيت زوجها ... تربيتي عند أهلي كانت تربيه للهم لك الحمد على الستر والحفاظ أولا وأخير على نفسي ولكن كنت أعاني من بعض القعد مثل عيب تتزينين كثير ... الضحك كثير مو زين ومن هالسوالف الي أثرت فيني وفي شخصيتي علشان كذا أقول لكل أم دلعي بنتك خليها إنسانه تحس بإنوثتها وجاذبيتها ولكن بعتدال مو تضيعينها وتقولين علشان ماأحرمها .... المهم تزوجت رجال صاحب دين اللهم لك الحمد فرحت به كثير مثل أي بنت تتزوج ولكن خلفيتي في الزواج ماكانت ذيك الخلفيه إلي كنت أشوفه مع أمي وأبوي الي كل بنت تشوفه من أهلها ... وكنت أفكر هذي هي الحياه الزوجيه إلين تزوجت وطحت بالمطب الاول ... قلة خبرتي في الاهتمام بالزوج كشخص . ماكنت أعرف كيف أهتم فيه أبداً أبداً لأني فتحت عيني على أمي وهي تركض من المطبخ للعيال للحوش للزراعه ولما يجي أبوي تحط له القهوه كلمتين وكلن راح يخلص شغل وطبعاً لاننا ننام من وقت مادري كيف أمي تتزين لبوي الله يرحمه ولليوم ماأعرف للعلم ... أمهاتنا وأبائنا كانت حياتهم شفافه جداً والزوج ماكان كثير الشروط مثل هالزمان والي يتشرط ومايشوف فيها فايده يتزوج وكانوا قبل يتزوجون لأسباب معينه كالبحث عن العيال أو لأن زوجته مريضه او متوفيه فقط ... أما اليوم فيه رجال والكثير منهن مايبون صدعة رأس وزوجه ثانيه وقرقعه وأسلم طريقه هي العشيقه المهم زوجي كان يكبرني بست سنوات يعني شاب يبي يحس برجولته يحس بعاطفة زوجته واهتمامها ورعايتها له ولكن والله والله والله ماكنت أعرف شئ غير الطبخ وترتيب غرفة نومي وصبري على أمه الله يسامحها على أفعالها وبس ... جبت أول ولد وبعدها بنت وزوجي كان كثير الصمت الصمت بالبيت مايسولف نهائيا معي ولا أنا كنت أهتم لسوالفه لاني ماأعرف شو أقول له غير تبي أكل وقت النوم تعالوا شوفوا حالتي الشعر منكوش ومربوط بشباصه والجلابيه مفتوح الزرار كامل ومتجهزه فقط للارضاع ... وأنا عايشه حياتي على هالوضع ... هالوضع ...المهم كنت كل ماأقول لزوجي وديني لبيت أهلي زوجي يركض بي يركض يبي يفتك مني وماألومه والله ... ماأقول إن زوجي ماحاول يصلحني لا والله الرجال كان يلمح لي لكني كنت جاهله وماأعرف الي يبيه وأحسبه يلمح لان أهتم أكثر في البيت وكنت أشتغل شغل الين يوصل الليل منهد حيلي ... وصار البعد بيني وبين زوجي النفسي والعاطفي ولكن الجسدي كان فيه إتصال بيننا ...الين جاء اليوم الي وقف فيه هذا الاتصال الجسدي في البدايه ماأهتميت ولكن لما زاد الموضوع وبطبيعة كل أنثى حنيت له جيت له لكن شفت منه الصدود . كان ينام معي عادي ولكنه يمتاز جونا بالبرود ومو هو الي متعودته قبل منه هنيه شكيت وقلت زوجي متغير حطيت همي بقلبي وسكت وسكت وسكت ولكن طال السكوت وكبر الهم وكبرت الفجوه بيني وبين زوجي الي أحبه حب خيالي ولكن ماأعرف كيف أجذبه لي الي أعرفه كنت أطبقه وخلاص ... الين اليوم الي رحت فيه لبيت أهلي وعندي من الاخوات خمس ... اللي أصغر مني طبعها غيور وماكانت تحاول تساعدني بشئ وكل ماأقولها أنا متضايقه تقول لي شو أسوي لك وتتركني بحزني المهم أختي اللي أصغر مني بأربع سنوات وكانت هذيك الايام بثالث متوسط شافتني بالليل أبكي بالحوش من حرقة الالم اللي فيني ... سالتني ليش تبكين قلت متضايقه شوي قالت ليش ... قلت لها أمور حريم ماتفهمينها قالت لو تبيني أسمعك بس بسمعك ... والحقيقه كنت محتاجه لمن يسمع شكواي وقلت لها كل شئ وهي تسمعني ومن القهر جلست تبكي معي قالت ليش ماتسئلين أمي قلت سألتها وقالت إصبري كل الرجال نفس الطبع ... لكني مليت من الصبر هذا الكلام صار وأنا حامل بالطفل الثالث وحملي كان تعب بتعب قالت لي أختي أنا ودي أقولك شئ بس أخاف تزعلين مني قلت لها ليش أزعل منك ؟!! قبل لاأقول لكم الي قالته لي أختي ...أحب أعرفكم على شخصيتها ... شخصيتها ...إنسانه جداً مرحه وضحوكه وصاحبة مقالب غير كذا طيبوبه وتتميز بذكائها ولماحه جداً ماشاء الله دومها متميزه بكل جميل من كانت صغيره وماكانت تهتم للتعليقات لما يعلقون على ضحكتها أو تزينها كانت تهتم لنفسها عكسي تماما كنت أخاف إن أمي تتضايق مني فما كنت أحط أي شئ يخلها تتضايق ... المهم أختي قالت لي قومي قدامي قمت معها ورحنا لغرفة ملابس أخواتي هالغرفه بعد زواجي بثلاث سنوات أخواتي سووها وكانت كلها مرايا كبيره كنت لما أدخل أحس إني بنادي رياضي المهم قالت لي طالعي شكلك طالعت نفسي وقلت شو السالفه قالت ماتدري شو السالفه ركزي بشكلك وتخيلي الي قدامك وحده ثانيه مو أنتي وقولي لي شو تشوفين قدامك إبتداء من شعرك لرجولك وأنا بكتب لك اللي تقولينه كله ... قلت لها أشوف وحده لابسه شيله سودا شعرها أسود حاطه على راسها طوق ملون ولابسه حلق ذهبي لابسه ثوب واسع لونه كحلي وبس قالت وجهها بشو مزينته طالعت بوجهي قلت ولا شئ سالتني فيه كحل قلت لا فيه روج قلت لا فيه كريم قلت لا... قالت منظره صحي مشرق قلت لااااا شاحب تعبان من السهر والحمل والولاده قالت خلي عنك الاعذار الوهميه طالعتها وأنا مستغربه من كلامها ... قالت كملي نوصل لليدين فتحت يديني وطالعتهم شو ميزت يدينك قلت عادي مثل كل الناس قالت قولي مثل كل الخدامات طالعتها بحزن قالت قلتي ماراح تزعلين مني صح ؟! قلت إيوه قالت نكمل نوصل للرجول وماأبي نتعمق لتحت الملابس وصلت أنا للي تقصده أختي ولكن أنا ماأعرف أهتم بهذي الاشياء قالت أختي أكيد فهمتي الي أقصد صح قلت أنا ماأعرف قالت كلنا مانعرف لان محد علمنا وهذي ثاني نقطه أنبهها للامهات علمي بنتك أمور النظافه علمي بنتك أمور الاهتمام بشعرها بوجهها بجسمها علميها لاتخلينها حرام عليك تظلمينها وتخلين أجمل أيام عمرها تروح بتعليم وهم ونكد خليها تتزوج وهي فايف ستار قالت أنتي مشكلتك إنك كنتي خوافه وإنطويت على نفسك كثير نحن يوم أنتي تزوجتي كنا أصغر منك بشويه وأذكر هذاك اليوم الي قالت فيه أختنا اللي بيننا الله يعين هالزوج على هالبليده . أنا ماأقول أنتي بليده بالعكس أنتي إنسانه مميزه والدليل تمييزك بطبخك وإهتمامك بعيالك وترتيب بيتك ونظافته ولكن فيه أمور ماتعلمتيها ولازم تتعالميها وأظن هذا اللي خلى زوجك يبتعد عنك ... وهنا بديت أركب أول درجه من سلالم التغيير في حياتي ... وكانت بداية إنطلاقتي على يد أختي الله يوفقها ويخليها ويهنيها بزوجها وعيالها .. للحديث بقيه فاإنتظروني إن شاء الله |
المهم سالتني أختي كم سؤال عن أمور النظافه والصراحه إنحرجت منها لأنها أصغر مني وكانت أحسن مني قلت لها أنتي كيف تعرفين هالاشياء قالت أنا اقراء قلت تقرين هالامور ضحكت قالت الحين كل شئ ينكتب في الكتب والمجلات وهي تتكلم تذكرت إني مامسكت كتاب أقراه من ست سنوات كان كل وقتي كله كرف وشغل طبعا أم زوجي لعبت دور بنحت شخصيتي كيف ماتبي كانت تبيني مجرد خدامه عندها ومتناسيه إن ولدها كان ممكن يضيع عادي أهم شئ راحتها وراحة بناتها ... عطتني أختي ثلاث كتب كل واحد يتكلم عن شئ للمرأه وكيف تكون أنيقه وجذابه ولكن ماطبقت أي شئ منهم ابدا ... مافيه وقت عندي للقرأه أبداً من بينظف البيت وبيخلص غسيل سجاجيد عمتي وحوشها ويطبخ أكلها وأكل أولادها ... كنت أبي أتغير لكن الوضع مايساعدني وأذكر هذاك اليوم الي رجعت فيه من المستشفى والدكتوره عطتني توصيات بعدم الحركه كثير لأن المشيمه تحت والطفل فوق وأنا بالشهر السابع وممكن تصير ولاده بأي لحظه لان المشيمه نازله كثير تحت تبون الصدق كنت أحس بالم في ظهري ولكن من رحمني أم زوجي قالت ماعليك من هالكلام كله خرابيط دكاتره يلا يلا قومي إشتغلي بس وقمت أشتغل كنت أخاف منها كثير مع العلم في البيت شغاله لكني إشتغلت لما رجع زوجي من العمل شافني أغسل السجاده مع الخدامه عصب علي وقال ليش تغسلين قالت أمه أنا قلت لها قال أنا أمنعها تتحرك وضعها خطير وأنتي مش مهتمه قالت ماراح يصير لها شئ وإن صار بنات الناس كثير بنزوجك حسبي الله ونعم الوكيل على كل ظالم هالكلمه هزتني بالكامل مسكني زوجي من يدي ودخلني الغرفه وقال لو سويتي شئ ياويلك قلت زين وجلست العصر هو طلع أول ماطلع جاتني قالت تعالي خمي الحوش والخدامه بتصب الماي عليك نظفيه معها قلت زوجي بيعصب قالت ماعليك منه قمت لأني خفت منها ورحت اخم الحوش وأنا أخم أحس ظهري فيه حراره من الالم ولكني خميته ولم قربنا نخلص وصل زوجي وشافني وأنا أغسل عصب مره ثانيه المهم ماوصلنا لوحده بالليل إلا وأنا بالطوارئ نزل دم وصارت الضجه فكروا الحبل السري إنقطع داخل الرحم ولكن الحمد لله جات سلميه وهنيه عصبت أمي وأعلنت أحسن وأعظم إعلان قالته بحياتها بنتي ماترجع لبيت هلك تبيها حط لها شقه ولا طلاقها بتموتون بنتي تنومت بالمستشفى إسبوعين في هالاسبوعين جات محاضرات معتبره لزوجي من أبوي الله يرحمه ماتبي بنتنا نحن نبيها رجعها لنا والله ماتدخل بنتي بيت أهلك إلا للسلام فقط غيره ماتعيش فيه ثانيه ... وطلعت من المستشفى لبيت أهلي وكلها شهر وأنا بشقتي ... وفي هالشهر كان التغيير في بعض الافكار ... عطتني أختي دفتر صغير مدون فيه معلومات كاتبتها هي لنفسها لأنها كانت بتتزوج هي وأختي الثانيه بعد ماأخلص الاربعين ... مسكت الدفتر وفتحته كان مرتب ومقسم كل شئ بقسمه ... قسم للملابس في البيت ونوعيتها قسم للملابس الداخليه ونوعيتها قسم لملابس النوم ونوعيتها قسم للعطور والكريمات والبخور << ماكان عندها شئ ابدا قسم للعنايه بالنظافه الشخصيه والجسديه ... وقسم خطير خطير جدا كان عنوانه "مفاتيح الرجل " وقسم كيف تكونين حبيبه ومميزه عند زوجك ... كنت أقراء فيه مستغربه أنا كنت وين والعالم وين كنت أتسائل مقعوله أنا من القرن العشرين ؟!! أول شئ إهتميت بتغذيتي بما إني حامل وببشرتي وأخذت أول نقطه من النصائح إنتبهي لحركاتك جلست قومتك ضحكتك زوجي لاحظ إني ماصرت أقوم وأجلس مثل الهمجيه ولاأكل بهمجيه ولا ضحكتي ضحكة وحده مادري من وين صرت أضحك بصوت هادي وأحاول أنعمه ... من ضمن النصائح للصوت كان إختاري ضحكه تميزك وأنتي تضحكين شدي بطنك للداخل علشان تطلع الضحكه أكثر جمالا وبالفعل وبالفعل سويتها وكانت ضحكتي حلوه وكل إلي يسمعها يقول ضحكة دلع الله يرحم أيام القهقه والتكركير مشيتي الي كنت أدبك الارض برجولي وبين كل خطوه وخطوه مطبه خليتها من مترين لذراع وأحيانا لزوم الدلع شبر المهم والاهم زوجي صار يركز فيني ويطالع فيني ولكن ماسالني عن سبب تغييري وماكنت أبيه يسأل أصلن ...لأنه إمتاز بالشفافيه المطلقه والي بقلبي على لساني وأختي كانت محرصه عليه ماأقول ولا شئ له أخليه يطالع وبس ... المهم قربت ولادتي وكنت محتاره من بيهتم بالبيت وولدي وبنتي وزوجي إلي يحب فنون الطبخ ... لمحت له بالشغاله أول رد علي ليش عندك عشر أطفال ومو قادره تشتغلين قلت لا بس أخاف أتعب وخاصه إنه كل ولاده اللهم لك الحمد والشكر تجيني حمى لمدة إسبوعين يارب لا تحرمني أجرهم ومن أطلع للمستشفى للشغل والتنظيف يعني ما فيه راحه وبيني وبينك يا زوجي أنا أبي أرتاح ظهري يعورني وأبي أهتم فيك أكثر قال أنا كذا مرتاح أهتمي ببيتك وعيالك وماعليك مني هالكلمه عورت قلبي كيف ما أهتم لك قال أفهميها مثل ماتبين وطرت طيران للتيلفون وأكلم أختي تصدقين قال هالكلمه شو يقصد بها قالت يقصد وجودك مثل عدمه بقلبه قلت لا تقولين هالكلمه وبكيت قالت نحن إتفقنا من البدايه بدون زعل قلت والحين قالت ما عليك منه أنتي صغيره وحلوه وكلها شهر شهرين وهو لازق فيك قلت أتمنى الحين أبيك توفرين عدة أشياء في ولادتك قلت لها مثل شو يعني قالت إشتري ملابس غير الزبايل الي بدولابك عصبت عليها لأنها سبت السبابيح الي معي السابيح اسم يطلق على خلقان العجائز بقاموس أهلنا وسكرت بوجهها وما صار المغرب إلا وهي عندي بالبيت جايه تعتذر عن غلطتها الشنيعه في حق خلاقيني الي المفروض أوديها لاأقرب متحف ... بس رحمتهم وكنت بعطيها للشغاله ولكن أختي قالت بترميهم بوجهك الأفضل سويهم فوط ههههههههههه .... يتبـــــــــــــع إن شــــــــــــاء الله |
المهم قالت أختي شو رأيك نروح أنا وأنتي مع أخوي نشتري ملابس للبيبي ومنها تأخذين شئ لنفسك لأني بروح أشتري شوية أشياء ناقصتني تدرين قرب موعد العرس
قلت زين قلت لزوجي بروح معهم فرح لأني بفارق وجهه قال روحي قلت أبي فلوس قال شيلي الي تبينه كان عندي إحساس إن عنده شئ ويبي يفتك من وجهي لكن قلت كلمه وأنا كنت حالفه إني أسويها أحب راسه أحبه حتى لو كلفني هالشئ عمري المهم أعيش مثل أي وحده متزوجه بحب وأهتمام لاني أستحق هالشئ وأنا الاولى ... رحنا معهم وكنت مو متعوده أروح أشتري كان هو إلي يشتري لي حتى الملابس الداخليه ما كان يحب يأخذني معه لاي مكان لما شفت الاسواق شو فيها من بلاوي وكيف البنات يلبسون وكيف الناس عايشه جلست أقول من كذا ما يطالع فيني يشوفني ما أنتمى للعالم الإنثوي أبدا ... المهم أخذت للبيبي ملابس ورحت أشوف شئ لنفسي وإختارت لي أختي ملابس الوانها حلوه وفاتحه وعليها حركات دنتيلات ما أشوفها إلا بالافلام بس أخذت كم واحد وسيع علشان البسهم الين ما أولد والبقيه لبعد الولاده وكل لبس طقمت معه ملابسه الداخليه وقالت قمصان النوم بعد الولاده إن شاء الله ... إشتريت عطر وكريم والي ناقصني ومو موجود معي كله ورحت للبيت فرحانه وأول ما دخلت لقيته معصب لاأني تأخرت قلت كنت في السوق مسك الباب وطلع برا حطيت الاغراض ورحت أغير ملابس ولدي وبنتي وسويت لهم سندويش وحليب أكلوا وناموا وسويت له العشاء ورتبت البيت وبخرته من البخور الي إشتريته دخلت أخذ شور وغيرت السبابيح ههههه ولبست واحد من الي أخذتهم مشطت شعري وتعطرت وجلست أنتظر الزعلان يوصل رجع للبيت 12.5 بالليل متأخر موعادته العاده يطلع من بعد اذان المغرب ويرجع 11 الظاهر طلعته تعويض عن الوقت الي أنا كنت فيه بالسوق المهم لما دخل شم ريحت البخور قال من وين هالبخور قلت إشتريته قال وينه شافه وكتب إسمه شم العطر فيني قال أنتي متعطره قلت إيوه قال رحيته حلوه هاتي أشوفه وريته بعد كتب إسمه وأنا مستغربه من حركاته ... غير ملابسه قلت تعال تعشاء قال مابي ونام وما علق أي تعليق على ملابسي أبداً أبداً ولا على أي شئ أخذت بخاطري ورحت أتعشاء سألت نفسي مقعوله زوجي في حياته غيري ورديت على نفسي لا لا مستحيل زوجي ملتزم ومستحيل يخونني ورحت أنام ... المهم جاء اليوم الي فيه بعد تبدلت الموازين يوم ولادتي تعسرت الولاده وقدر الرحمان الرحيم أولد بعمليه جراحيه المشيمه كانت بتنزل قبل والولد بخطر وصارت العمليه وجلست بالمستفشى 15 يوم عمليه بالاضافه للحمى المعتاده وهنيه صار غصب يجيب خدامه كيف بتحرك وبشتغل والبيت بدون خدامه وأنا بعمليه قيصريه ... طلعت من المستشفى جلست أربع أيام وأمي معي المسكينه تشتغل وفي اليوم الخامس وصلت الاندونوسيه ... وحمدت ربي قلت رب ضارة نافعه ... جلست شهر وأنا التوي من التعب وخاصه إن العمليه التهبت علي وعانيت معاناه وكان عصبي لانه ما كان يقدر يطلع ويخليني وهالحركه جات بحسابه لاني حسيت إني شئ مهم عنده خلصت الشهر وهذيك الايام كان عرس أخواتي .. وأخواتي تولن موضوع تفصيل ثوب العرس لاني ما كنت أقدر أتحرك خلال فترة الاربعين كنت مهتمه بصحتي إهتمام خيالي الاشياء اللي تضر العمليه وقفتها وقللت أكل الاشياء الدسمه وظليت على السوائل والسلطات اللحوم فقط لم جاء يوم العرس رحت لاخواتي في الصالون وهناك لابست فستناني وتمكيجت وسويت تسريحتي ورجعني أخوي للبيت علشان أخذ ولدي الي كان ماسكنه زوجي قلت للخدامه لبسي الاولاد ودخلت عليه لم شافني زوجي كان بيطيح من الكرسي وهذيك الساعه مو هامني يطيح ولا لا ... همني ولدي الي بيده كان همي أكثر قلت إنتبه للولد حطه بسرعه على الكنبه وجاني يركض والابتسامه بتشق وجهه قال ثلاث كلمات وراء بعض" وين من كيف " وهو يطالعني وشويه من الفرحه بيطير قلت بسم الله عليك شوفيك قال الظاهر مو أخواتك العرايس شكلك أنتي العروس طلعت هذيك الضحكه إلي تقطعت حنجرتي وأنا أتمرن عليه وعطيته ظهري ورحت أتمشى لتسريحتي البس الذهب وهو مصمت مكانه قلت له بنروح ولا لا قال لا اقصد ايه قلت بسرعه وراح يلبس وكل ما يمر يحط وجهه بيني وبين المرايه يطالع فيني ... الصراحه حسيت بغصه كنت ببكي حسيت إني بالغباء الي كنت عايشته وعدم معرفتي حرمته من أروع الامور وأحلاها أقلها كحل يشوفه بعيوني ولكني أخذت عهد على نفسي إني أتعلم فنون المكياج علشان أتعدل ليل نهار له ... المهم رحنا للعرس وكل شويه يرسل يلا بنروح قلت شو فيك حتى العرايس ما دخلوا الصاله إصبر قال زين خلاني عشر دقايق وأرسل يلا بنروح أخر شئ طنشته وأول ما زفوا العرايس جيت أدور زوجي علشان أروح ما لقيته ... سألت أخوي قال طلع من ثلاث ساعات قلت غريبه وين راح المهم طلبت من أخوي يوصلني ورجعت للبيت كلها ساعه إلا وهو داخل طالعته بنظرة عتب قلت وينك قال كان واحد محتاج لي ورحت له وراح ينام هالحزه مو حسيت إلا تأكدت إن أحد في الخط وقلت الحين بدأت الحرب ولازم أنتصر لو بالحلال مو مشكله بقول نصيب لكن المشكله لو كان الموضوع حرام بحرام ... رحت غيرت ملابسي مسحت مكياجي وأنا أسأل نفسي كان مشتاق لي متلهف لي ليش الحين مو مهتم ونام غيرت ولبست ملابس النوم وركضت لدفتر أختي الحبيبه أشوف يمكن أحصل إجابه لسؤالي ولقيت هالسطر... ...إذا طلب الزوج من زوجته بشوق عليها أن تلبيه وإلا لو كان في حياته إمرأه فانها ستكون السابقه حتى لو كانت عشيقه من عشرين سنه لانه في وضع ما يتحمل الإنتظار إنتبهن أخواتي للنقطه هذي في أي وقت زوجك يطلبك للفرش لا تهمليه روحي ولا باب الحرام موجود ... عدينا ليلتنا على خير ... وكان القلب يحترق من الشك والغيره .. ثاني يوم أختي سافرت لشهر العسل وبكذا عانيت الامرين لاني ما كنت أعرف كيف أتصرف ..... يتبـــــع |
أخواتي لا تستعجلون النهايه قلت لكم قصتي طويله لكن العبر الي فيها بتخليكم تختصرون مشاكل نفس مشكلتي من بدايتها مو مثلي جلست ست سنين ثانيه الين وصلت للي أبيه
وصلت معكم الين أختي سافرت وبسفرها إشتعلت بقلبي نار الغيره وما أقدر أتحكم بنفسي وكنت أعصب على أتفه الأسباب وفي نفس الوقت كنت أتزين با لحدود الي أعرفها لكن أنا قدام البنات الي برا أساوي صفر على الشمال مهما سويت كنت بدائية جداً جداً ... عشت شهر ونص أحترق وأكتوي كل ساعه الين أختي رجعت من السفر من شافتني قالت هالوجه ما يبشر بخير طالعتها وعيوني من القهر قالت إستهدى بالله لكل مشكله ربي حاط لها حل قلت تعبت والله قالت توك ببداية المشوار وصدقيني بتشوفين الي يرضيك وعلمتها عن إحساسي وعن الي أشوفه على زوجي وطلعاته الي تستمر خمس ساعات يوميا قالت تعتقدين متزوج قلت عندي إحساس قالت أوكي فتشي شوفي أكيد بتحصلين دليل الإدانه وإشتغلت المحقق كونان وأول مره اكتشف إني كنت نايمه على وذاني زوجي الحبيب كانت وحده بحياته ومو أي وحده وحده كان عاشقها قبل الزواج ولكن أهله رفضوا يزوجونها إياها لانها ............. مو لازم نذكر دول بنختصر الكلام لأن عاداتها مو مثل عاداتنا وعلشان يعقلونه قالوا له بنزوجك وسوت أمه المستحيل علشان تفرقه عنها ونجحت بأنها زوجته وحده ما أقول فيها من ملامحها ولكن كان شكلي قريب لهذي النوعيه من البنات ... صح الشكل قريب لكن الاسلوب بعيد كل البعد وهذا الي خلى زوجي يرجع لها ... ولأنه خايف من أهله كان الزواج بالسر ولأنها بالليل تشتغل بالكوفي كانت ما تنام معه يعني مسموح الحبيب من الليل ومكتفيه بالخمس ساعات من المغرب الين عشر وهي تداوم من عشر ونص الين ثنتين والغريب إن زوجي كان مطمن لها وعطاها الحريه الي كان حارمني منها بالدخول والخروج من البيت وبعد هذي نقطه ثانيه أضفتها لرصيد حسابه لاني حسيت إني درة غاليه عنده بتقولون كيف عرفت الحين بعلمكم كيف عرفت هالموضوع وأنا افتش بموبايله لقيت أرقام ومنها رقم بيت ورقم محل هذولا مسجلهم باسم أبو هيثم هذا الرقم يوميا له إتصال صادر ولا وارد يوميا وبالساعات والمسجات منه شئ عجيب كتبت الأرقام وحطيتهم معي وقلت لأختي ندق لهم قالت إصبري شو فيك يمكن رجال قلت شو أسوي قالت لاحظي بالسياره في شئ بملابسه في أي شئ امممم ملابسه كان لما يرجع للبيت مستحيل يرجع يلبسهم ولم يطلع من عندي يلبس جديد ومكوي ومرتب وجلست أترصد بملابسه إلين شفت إلي حطم قلبي من مكانه روج على طرف الفانيله من وراء الرقبه وأنا ما عندي هاللون هنيه إحترقت وتهورت ورحت لزوجي بسرعه وأنا معصبه وقمت أصارخ كشفتك يالخاين كشفت الاعيبك الحين عرفت ليش أنت ما تهتم فيني الحين عرفت ليش ما تطالع فيني وماافي كلمه ما قلتها وهو ساكت يطالع فيني ببرود قال شو فيك قلت شو هالروج قال المطلوب الحين بعد ببرود قلت طلقني ضحك قال أوكي روحي لبيت أبوك وبتجيك ورقتك كلمته سوت رنين بأذني وجلست أردد كلامه مثل المهووسه أروح بيت أهلي وورقتي بتجيني إتصلت لاأختي أعلمها قالت ليش تهورتي لكنت صبرتي نعرف شو الموضوع قلت ما أبي أفهم أبي أرجع لبيت أهلي ما عاد لي جلسه هنيه قالت لا تسوينها أنصحك قلت مـــابي ركبت راسي وأخذت عيالي ورحت لبيت أهلي سألني أبوي رحمة الله عليه شو الي صار قلت تهاوشنا وولما عصبت طلبت الطلاق قال روحي لبيت أبوك وورقتك بتوصلك قال أبوي أوكيه إجلسي حياك الله الين نشوف حل لموضوعك الله يرحمك يابوي المهم لا زوجي جاني ولا الورقه جات ويحطني ببيت أهلي خمس شهور ... تعبت نفسيا ولكني كنت أكابر وأضحك على نفسي ... يتبع |
تعبت نفسيا ولكني كنت أكابر وأضحك على روحي وأقول خليه يولي ...
أنا مو خسرانه شئ وتبون الصدق كنت خسرانه وخسرانه بعد بأسلوبي هذاك فتحت له المجال وخليته يأخذ راحته معها أكثر ... أخوي الكبير لما شاف الموضوع زاد عن حده وهو ما قام يسأل لا عني ولا عن عياله إتصل فيه قال فلان وينك نشوفك طولت قال مشغول مشغول وقفل موبايله تضايق أخوي وراح له لبيته قال له إسمع الحرمه ما تنركن وبنفس الوقت ما تنمسك قال شو القصد قال القصد أختي شاع عنها بين الناس إنك مطلقها وأمس جاني واحد من عيال العم الي ميته زوجته ويبي وحده عاقله وفاهمه ومو مشكله تكون مطلقه يعني يبي يتزوجها ... قال زوجي كيف يتزوجها وأنا ما طلقتها من الإساس أنتم تبون تخترعون نظام جديد من عندكم تزوجون وتطلقون على كيفكم قال نحن ما نخترع شئ بس أنت حاطها للكلام الي رايح والي جاي وأنت مو حاس قال خير خير بجي بكره أكلم أبوك وبرجعها ... أخوي كان ماسك نفسه بالغصب ويحلف كان ودي أضربه الين ما يتأدب ولكن قلت مابي أخرب عليك لو فيه أمل ترجعين لزوجك ... أخوي ما علمني إنه راح له انتظر أخوي يوم إثنين إسبوع الين وصلنا لثمان شهور وانا ببيت أهلي وهو ولا سائل فيني ولا حتى يمر يشوف عياله قال أخوي أنا الي بعلمه الأدب وراح أخوي يستكشف مكان عمل هالمخلوقه من الرقم الي عندي ويقول أخوي لما شفتها كان بيغمى عليه ليـــت كل الحريم مثلها هذي أنوثتها مو طبيعيه هالانسانه قال أنتي وين وهذي وين يالعربجيه لو أنا مكان زوجك أمسح بك البلاط مو أخليك ببيت أهلك ولا أحطك مداس لرجولها <<< إنقهرت من كلام أخوها .... قال لكن والله لأدبه هو واياها زوجي عسكري وطبعا نظام كل بلد ما يتزوج إلا من بلده وكان زواجه بالسر ... وقام أخوي يشيع بين الضباط عن سالفة زواجه الثاني الين يوم اطلبوه وسالوه عن الموضوع وأنكر زوجي قال لا أنا متزوج من بلدي بس وحس زوجي إنه بيخسرعمله لكنه واصل معاها المهم كملت سنه وأنا ببيت أهلي وهو لا سائل فينا أنا شو الي سويته بهذي السنه إهتميت بنفسي كثير أكلي شربي غيرت وايد في نظام حياتي حذفت الي ماله داعي وبديت أتعلم حركات الدلع وأخذت ثلاث دورات مكثفه بالمكياج تخيلوا وقبل كل هذا رحت لاأقرب مستشفى أخذ حبوب مهدئه لأن النفسيه منحطه جداً جداً ... وأذكر هذا اليوم الي بعد عمل نقله رائعه بحياتي كان 10 شعبان وكانت في محاضره دينيه في المسجد الي بمنطقتنا ورحت مع أخواتي وبنات الجيران علشان نسمعها لانها كانت تتكلم عن رمضان وجلس الشيخ يتكلم عن أهمية الدعاء والتقرب الي الله وأن الإنسان لازم يصفى قلبه وكل الأعمال ترفع لله إلا ثلاث ومن ضمنها مشاحن حسيت كلامه كأنه موجه لي لكن كان صوت بقلبي يقول أنا ماغلطت عليه هو غلط علي هجرني حرمني لكن دست على قلبي وقلت لازم استغفر ربي ما أبي عملي ما يقبل مستحيل أنحرم هالأجر ومن طلعت من المسجد وأنا أبكي رحت لأمي قلت لها سامحيني لو غلطت عليك قالت مسموحه مع إنك ما غلطتي بشئ رحت لحبيب قلبي الله يغفر له ويرحمه لقيته جالس بحديقة البيت يفكر بمشكلتي قلت له أبوي تدري إن رمضان قرب قال أدري قلت تدري إن المشاحن ما يقبل عمله قال ايه قلت شئ بقلبك عليه إبتسم الله يغفر له ويرحمه قال ليت في عيالي إثنين من نفس طينتك لكنت مرتاح ومن يومها توجهت لرب العباد بالدعاء إن الله يفرج همي وينصرني على من ظلمني ويأخذ بحقي طول بعرض ودخل رمضان وبدخوله كملت أكون وصلت للشهر 11 ببيت أبوي وما شفت فيه زوجي ولأني ولدت ولدي الثالث بشوال كملنا سنه وأبوه شافه بس لما كان بشهوره الاوليه... المهم إقترح علي أخوي أكمل دراستي ما دام إني فاضيه لا شغل ولا مشغله وكان أحسن إقتراح إقترحه علي أخوي لانه هنيه مشيت أول خطوه في مشوار الخروج للعالم الخارجي الي كنت ما أعرف عنه كثير بما إني فقست من البيضه ببيت زوجي ... يتبع |
درست مسائي وهالصفوف للمتزوجات والبنات الشابات كنت بصف ثالث متوسط لما دخلت أول يوم الصف أول كلمه قلتها
أنا بمدرسه ولا بصالة عرض أزياء كنت أفكر نفسي إنسانه شيك وقمه بالتمييز باللبس<< فرحانه بكم التنوره اللي عندها لقيت نفسي على عتبه وبعد بيني وبين عتبة البدائيه مترين ونص سلمت وردن السلام كنت أبي أجلس ولكن ما كان فيه مكان فاضي إلا أول كرسي وأنا ما أبي هالكرسي بالذات لانه قدام طاولة المدرسه قالت المدرسه تفضلي إجلسي طالعتها بارتباك وجلست من الخوف الي فيني وكتمت نفسي ولا نفس << تفكر نفسها بصفوف الصباحي ونظام قاسي وأوامر وحركات المهم قالت المدرسه يلا عرفونا على أنفسكم وقاموا البنات والحريم يتكلمون وكانت تختم الكلام بسؤالها طالبه عندنا ولا مستجده وكم صار لك فتره تاركه الدراسه وكانوا يجابون سنه سنتين ولا تاركه الدراسه ثلاث الين وصلت عندي عرفتها بنفسي وقلت لها مستجده ولي سبع سنين ما درست بققت عيونها المدرسه سبع سنين ليـــــش مع إنك صغيره قلت لها تزوجت قالت إنتي متزوجه قلت إيوه وأم لثلاث أطفال إبتسمت وقالت ما شاء الله بس الله يعينك وتقدرين تكملين أحس الموضوع صعب عليك وأنتي ما درستي سبع سنين قلت التوفيق بيد الله ... وقالت يلا نبدا معكم أول يوم بشوف فيها مقدرتكم الاملائيه كانت مدرسة عربي وأنا هالماده لو يخدروني ويخلوني أحضر الحصه بقوم من التخدير وبهرب ما أحب هالماده خير شر لكن قلت يلا شو ورانا خلينا نكتب هالاملاء والمدرسه تملي علينا وطبعا عيونها على ورقتي بما إني أول كرسي وطاولتي بجنب طاولتها كانت تملي وأنا أكتب بارتباك وأقول لازم أغير مكاني ما أبي هالمكان لما خلصنا وقالت سلموا الاوراق عطيتها ورقتي وسالتني أنتي متاكده إن لك سبع سنوات ما درستي قلت إيوه سالتني عن الترتيب لما كنت بنت قلت لها الخامسه قالت يعني من الاوائل قلت لها سابقا قالت مبين بتواصلين مسيرتك بتمييز ... قلت أتمنى والله كلمتها شجعتني كثير على إني امشي للامام وما أطالع الماضي أبدا ... هالمدرسه بالذات ما بين كل المدرسات حبيتها كانت تبدأ حصتها بالتذكير الدائم بوجود الله وإن الإنسان محاسب على كل أفعاله وإن لازم دائما وأبدا نستحضر وجود الله في كل خطوه نخطيها وأن الانسان مبتلى بهذه الدنيا وعليه يصبر ويحمد الله في السراء والضراء ... وإن أساس كل نجاح هو التفاؤل والانسان ما يوصل للي يبيه إلا بالطموح والاهداف الواضحه والخطط السليمه والثقه في النفس لانها أساس كل إبداع وكانت تقول يا بنات أنا لي حصه من الاداره يوميا للي تبي إستشاره زوجيه أو أسريه أو إجتماعيه الي محتاجه لاي نصيحه تتفضل ... المهم حبتها هالمخلوقه حب مو طبيعي درسة نص سنه نسيت فيها كل حزني لو إن قلبي كان ينغزني لم أتذكر حبيب قلبي بس الشكوى لله صابره في هالنص السنه تعلمت أشياء كثيره من البنات منها كيف اختار شنطة اليد الي ما كنت معترفه فيها نهائيا وشو الي أحط فيها وأذكر كلمة وحده من الدارسات كانت تقول أخوي يقول إن البنت اللي ما تملك شنطة يد ما أعتبرها إنسانه يطلق عليها أنثى شو يقول عني وأنا كنت الم كم الغرض الي لي لما أروح لاهلي بكيس نايلون ... كيف أختار لبسي الي يناسب سني وشو الالوان الي تناسبني وتناسب جسمي البنات كانوا خدومات وكل وحده تنصح الثانيه لو اكتشفت شئ جدبد كانوا يتكلمون عن الاتكيت وطرق التعامل مع الناس وعن العطور وماركاتها وكانوا يرددون إسم محل ما عرفته إلا من أربع سنوات وما دخلته إلا من سنه ذى بودي شوب المهم بطلعتي هذي عرفت الكثير وأهم شئ عرفته والي اذكره لليوم إن في وحده كانت تربط شعرها بطريقه جذابه وهي كلها جذابه كل يوم تجي بلبس وشكل مختلف والصراحه ما شفت في شياكتها أحد ولا بنعومتها ولا أخلاقها بعد ما كان ينقصها إلا عباية رأس وكانت بتكمل والكمال لله أتمنى من الله إنها تكون بخير وعافيه وربي مييسر أمرها بزوج صالح المهم قربت مني وجلست قدامي وهي مبتسمه قالت شعرك حلو إلا يجنن إبتسمت لها وقلت أنتي اللي شكل شعرك يجنن ضحكت قالت أنا شعري خلاص مات من كثر الصبغات والتلوين والسحب والشد والطرق <<< ماده فلزيه لكن أنتي شعرك مبين عليه صحي قالت إفتحيه أشوفه قلت لها لا لا استحي قالت من من تستحين كلنا حريم وبنات أخذت لفه بعيوني على البنات لقيتهن جالسات عادي اللي شيلتها طايحه على كتوفها واللي شايلتها حاطتها على الكرسي يعني مريحات نفسهن وأنا لافه شعري لف بالشيله وكل ما تبان شعره أدخله هههههههه هذيك الساعه تذكرت أختي لما تقول لي شو فيك زامه هالشيله زم كانك قماشه ريحي فروة راسك شويه ما قدامك إلا اخواتك وأهلك .. المهم فكيت شعري علشان تشوفه قالت شعرك يهبل بس قصي أطرافه علشان يتساوى وقربت منيولا أقولك على حركة تغري زوجك وتخليه يركض وراك طالعتها وأنا أضحك قلت قوليها قالت روحي اليوم للصالون قولي لها ساوي لي شعري وطرفه قصيه لي على شكل مثلث من نهايته قلت لها اشمعنى مثلث قالت مره شغالتي قالت لي هالحركه تغري الزوج وتفتنه وخاصه لو الشعر أسود وناعم وكنت أسويها لزوجي قبل لا يطلقني وكان مجنون ومتيم ويقول لا تفتحين شعرك لي إلا وقت النوم قلت لها صار اليوم بروح أقصها وبالفعل خبرت أختي على هالحركه ورحنا أنا واخواتي الثنتين وقصينا شعرنا بنفس الطريقه وثاني يوم جيت للمدرسه وفي الفسحه سالتي هاه سويتي الي قلته لك قلت إيوه قالت شو قال أبو الشباب قلت لها مالاحظ قالت مستحيل أنتي متغنجتي قدامه أكيد قلت ببالي هو موجود أصلن هههه الله يخلف بس ورحنا للصف وجاتنا مدرستنا الحبوبه وطبعا كانت كل يوم تبداء لنا بتوجيه نصائحها الحلوه ومن ثم ندخل الدرس على يدها حبيت الماده الي كان يجيني دوار منها وأخر حصه كانت عندنا فراغ وجاتني نفس الحرمه وقالت لي فكي شعرك أشوف كيف قصيتيه وريتها قالت تمام قالت تعالي معي وبيدها كيس قلت لها لوين قالت شو فيك خايفه ما راح اكلك تراني حرمه مثلك رحت معها وأنا والله خايفه صدق وصلنا للمرايات الي بدورة المياه الله يعزكم وقالت أنا ملاحظه إنك مش مبرزه جمال شعرك أنتي هذا نظامك بالبيت قلت لها ايوه فتحت شعري ولفته لي بطريقه خياليه وطلعت من كيسها مشبك كبير وثبتت شعري وقالت شو رايك الحين قلت لها روعه قالت يلا جربي قدامي كيف تسوينها مرتين ونجحت بالملطوب ورحت للبيت لكن المشبك بالكيس لاني متحجبه والبس عباية راس وهالمنظر كان مو لايق لي بما إني متدينه المهم رحت للبيت ولفيت شعري بالطريقه الي هي علمتني إياها ونزلت خصل من شعري وراء وقدام وكان شكلي روعه ... و مثل ما قلت لكم درست عندهم نص سنه وبنصف العام الدراسي تذكر زوجي إن له زوجه وأولاد وجاء لابوي يعتذر عن الي حصل وقال أنا أبي زوجتي وأولادي قال أبوي ما لك عندنا إلا أولاد تبيهم خذهم اما بنتي خليها خذ أولادك وبس قال شو القصد ما تبيني أخذ زوجتي قال إيوه ما بيك تاخذها أولادك أنا أحسنت عليهم وأعتبر مصروفي عليهم صدقه مني لهم لاني أعتبرتهم أيتام أما البنت ما تطولها لو تموت قال أوكي بنتك خلها لك وهات أولادي وقال أبوي لأخوي هات العيال جاني أخوي وقال جهزي العيال لأبوهم قلت أنا شو عندك قال أبوي قال يروحون لابوهم قلت لا عيالي أبيهم قال هذا كلام أبوي قلت أبوي الله يرحمه وأعرفه ما يحط الكلمه إلا بمكانها أنا كلي ثقه إنه ما راح يضيع لي حق الله يرحمه ... وجهزت أغراض عيالي حبيابي وأخذهم أبوهم وأخذ الخدامه معهم وجلسوا اسبوعين جننوه تجنين نبي أمي على الرايحه والجايه وهو يقول أمكم بتجي اليوم بكره بعده الين وصل الموضوع إسبوعين أخر شئ ... يتبع |
أخر شئ جاتني أمه <<< من كم سنه ما شفتها حتى بولادتي على ولدي الي بالعمليه ما شفتها
وجات تتعذر لابوي عن اللي حصل وطلبت إنه يرجعني علشان عيالي على الاقل وإن الأطفال ما لهم ذنب يفترقون عن أمهم قال أبوي يعتبروا أمهم ماتت وأنتي قايله من قبل بنات الناس كثار ليش ما تزوجي ولدك وحده ثانيه غير الي عنده ... قالت ما راح أحصل له وحده مثل بنتك ولدي وأعرفه ولا أحد قدر يصبر على طبعه إلا هي ... قال أبوي أنا آسف بنتي ما لها رجعه لولدك ... الظاهر الرجال إشتكى لامه وتدخلوا كبار من عائلتنا وعائلتهم لحل الخلاف وكنت أنا من يوم ما أخذ عيالي أصلي إستخاره لو كان لرجوعي له خير لي ولعيالي يا رب تعجله كنت بموت من شوقي على عيالي وصار الحل النهائي بعد ما إبتدى الفصل الدراسي الثاني كنت أروح للمدرسه بوجه شاحب وذهن شارد ولما صار الحل النهائي برجوعي له وبشروط أبوي وكان أول شرط أكمل دراستي الثاني يخصص لي مصروف شهري وقدره والثالث أتعلم السواقه مو شرط يكون عندي سياره لكن يكون عندي رخصه الرابع يشتري بيت ملك ويكتب باسمي كضمان لمستقبلي والخامس والخطير إني ما المس حبة رمل ببيته يبي يجيب عشرين خدامه ولكن انا حتى شعري ما أربطه بيدي وختم كلمته الله يرحمه أنا زوجتك بنت ناس وأبوها رجال معروف مو لعبه لك تلعب عليها براحتك الاول ذلتها أمك والحين دورك أنت عاجبتك الشروط أهلن وسهلن مو عاجبتك بنات الحلال كثار تزوج قاموا الرجاجيل الموجودين يرددون كلمة عزالله واصل عزالله واصل الظاهر إنحرج زوجي يرد كلام الرجاجيل قال عاجبني المهم كان القرار إني أرجع للبيت لكن أبوي الله يرحمه قال أول شئ أنقلي أوراقك لاقرب مدرسه لك وهذا الي صار ولما رحت أودع البنات جات المدرسه الي علمتكم عليها وقالت لي اليوم وجهك أحسن من أمس قلت لها الحمد لله عطتني رقمها وقالت أنتظر إتصالك متى تخلصين نقل قلت لها إن شاء الله ... وقبل لا أطلع من بيتي مسكني رحمة الله عليه قال بتروحين قلت إيه قال الله يحفظك ولكن إياني واياك أشوفك راجعه هالبيت مره ثانيه إلا ورقتك معك تعليق ما أبيك فاهمه قلت فاهمه سكت شويه قال بنتي أنتي ببداية حياتك << الله يرحمه تذكرت كلماته وأنا أكتب لكم والله فقدته المهم قال أنتي ببداية حياتك بتشوفين كثير وبتسمعين كثير والرجال رجال مثل الشمس تشرق من الشرق وتغرب من الغرب متغير ما له أمان لكن أنا أقولك زوجك صدقيني فيه الخير وأحسن من غيره بيجيك اليوم الي تقولين فيه كلام أبوي صح قد ما تقدري دوسي على نفسك وتذكري إن الإنسان خلق في كبد ما تبين أجر الأخره تبين حياة رخاء بدون تعب هذي مو في الدنيا هذي مكانها في الجنه ولكن ما يمنع إن تعيشين سعيده ... أخر نصيحه واللي لليوم أرددها قال عيشي حياتك كيف ما تبين ولا تهتمين لاأحد محد يعجبه شئ هذي أطباع بشر لكن إذا جيت تغلطين تذكري الله وأمك وأبوك الي تعبوا عليك وكل همهم برغم جهلهم إنك تعيشين سعيده ... إنتهى كلام ابوي الله يرحمه ويتغمد روحه الجنه .... ورحت لبيتي الحبيب بعد عام من الغياب .... راجعه لكم قبل لا أروح كنت بتحنى وبتزين وبعدين قلت ما بي يحمد ربه إني رجعت له بعد ... المهم أخذت حمام عميق عميق وتنظفت زين ولبست لبس محترم ... كنت أبي أخوي يوصلني لكنه قال الأفضل تروحين معه ... طلعت لزوجي وركبت السياره ولا قلت أي كلمه قال هو السلام لله طنشته قال السلام عليكم رديت رد داخلي وما عطيته وجه ... قال تدلع الحرمه قلت ببالي أنت عطيتني فرصه أجرب الدلع لكن بفرضه عليك فرض ... من ركبت وأنا أفكر وين الثانيه وليش رجعني كنت خايفه من الاحداث الي بتصير بعدين ... توكلت على الله وقلت باذن الله بيكون أمري كله خير لي والخبر الي اليوم بفلوس بكرى ببلاش وبينكشف كل شئ ليش استعجل على رزقي ... المهم وقف السياره قدام فندق قال يلا إنزلي قلت ليش قال بنجلس إسبوع من قدك حتى بأول أيام زواجنا ما دخلناك فندق قلت ما دام في البدايه ما جاني حتى الحين مابي إنصدم من ردة فعلي قال أنا حاجز قلت أنا ماأبي أدخل فنادق أبي أروح البيت قال البيت ما راح يطير قلت عيالي قال عيالك عند أمي قلت وديني لعيالي طالع لي وهو مستغرب من إسلوبي بالكلام وللعلم كنت متغطيه ما كشفت وجهي بالسياره قال إذا ما نزلتي الحين ما رح تدخلين معي فنادق مره ثانيه قلت أنا لما رجعت لك مو لاني إشتقت لك ... غيابك عندي كان مثل وجودك يعني أنت والغياب تساوي العدم أنا رجعت علشان عيالي ما ينحرمون من وجود أمهم وأبوهم ما دام خايف على إنك حاجز ودافع وخايف تخسر فلوسك هات حبيبتك وتمتع معها إسبوع كامل ومتى تخلص تعال أنا موجوده بالبيت ... سكت أصلن عجز يرد أخذ عشر دقائق بذهول ... دخل الفندق جاب الاغراض اللي مجهزها لي هناك والغى الحجز ووداني بيت أهله قال إنزلي بتسلمي وبعدين وبناخذ العيال قلت ما لي نفس أنزل تعبانه أبي أنام هات العيال وخلينا نروح نزل جابهم ورحنا للبيت سنه ونص غايبه عنه ليقت الشغاله منظفته ولكن مو بالطريقه الي أبيها وقلت بأجل الموضوع لوقت ثاني جلس هو بالمجلس فاتح التلفزيون ومسوي روحه مش مهتم وأنا اشوفه محترق يبيني أجيه أقوله كلمه طنشته عشيت الاولاد ونومت حبيبي الصغيرون للعلم هذا فطمته من الرضاعه لاني كنت استخدم حبوب مهدئه للاعصاب قويه وكان بتاثر عليه والدكتور نصحني أفطمه دخلت غرفة نومي غيرت ملابسي وكان لهذيك الساعه ما شاف وجهي ولا حط عينه بعيني جاني وأنا حاطه راسي أبي أنام قال ما تبين عشاء قلت ما لي نفس سكت وطلع رجع قال أختك على التيلفون تبيك قلت زين قمت من نومي وكانت هذيك اللحظه أول مره يشوف وجهي من بعد سنه ونص طالعته إبتسم لي أخذت الروب وعطيته ظهري كلمت أختي قالت كيف شو سويتي قلت ولا شئ حست بحزن بصوتي قالت صار شئ قلت لها أحس اني كارهته قالت شعور طبيعي لانه جرحك لكن سامحيه سكت قالت لازم تسامحيه أبو عيالك زواج صغرك ورفيق الدرب ما راح ترتاحين وأنتي حاطه بقلبك شئ قلت أوكي بحاول وسكرت عنها وجاني بالمكان الي كنت فيه قال أدري إنك ماخذه بخاطرك علي وزعلانه وإني غلطت عليك وإني جرحتك وإني وإني وقال كلام كثير شئ أذكره وشئ ما أذكره طالعته ببرود وبنفس النظره الي نظر لي فيها قبل سنه ونص قلت حصل خير قال أنتي زعلانه قلت لا قال وليش ما تبين تتعشين معي قلت ما لي نفس قال أنا لي نفس وأبي اتعشاء قلت تعشاء أحد ماسكك قال بعدك بخاطرك شئ إبتسمت له قلت لا ورحت معه أتعشى بعدما ما ترجاني أروح معه ... وعدت ليلتنا على خير ... الحين بخبركم ليش سويت حركة التمنع والرفض زوجي ما أقول لكم إنه مش إنسان محترم بالعكس ولكن قلبه متعلق بوحده غيري يعني أنا عنده والعدم واحد ليش رجعني هالموضوع بخبركم عليه بعدين ... لكن زوجي وكل رجل لما يحب ينسى نفسه وما يهمه أحد بالدنيا إلا نفسه يعيش جوه وهالكلام أكيد مو جديد عليكم هالكلام قالته لي الدكتوره اللي تعالجت معاها نفسيا ... قالت الرجل ما يفكر الا بلذته وإذا لقى راحته مستعد يحارب علشان يحافظ عليها .. ولكن أنسب علاج مو هجره وتركه لانه ما راح يهتم أصلن شو يبي من النكد اللي مع زوجته وخاصه لو كانت مثل طينتي السابقه الزوج يحب التجديد والتشويق ولا ليش الاسلام حلل له اربع لانه يقدر يعيش مع هذي وهذي وهذي وهذي وهو بنفس الشخصيه ما تغير نفس الرجل لكن من يحب وحده منهم تكون قلبه وعقله وكل تفكيره تحصلين رجل متزوج من ثنتين وكل الي عند هذي عند الثانيه ولكن حبه مستحيل يعطيه إلا لوحده منهم وأكيد اللي يحبها تدري وتحس به لانه مريحها ومعيشها ملكه باحساسها ... قالت زوجك أنتي يبيك لبيته ويحس إنك ركيزه عظيمه وما يبي يخسرك لإنك أم عياله ولكن لإنك ما وفرتي له الجو المطلوب طالع لغيرك وأحسن علاج لزوجك ولكل زوج خائن تحسسيه إنه إنسان غير مرغوب فيه لأنه لما يشوف هيام وعشق زوجته فيه يقول خلاص أهم شئ بيتي وعائلتي بأمان عادي أخذ راحتي ولكن لا تتركين له البيت ولا تهملين نفسك أبداً أبداً إهتمي بصحتك بجمالك بكل شئ فيك ودوسي على قلبك ولا تنامين وتناسين أفعاله لا شغلي كيد ومكر النساء ولا أنتي مو منهن هههه بالفعل كنت مو منهن ولكني صرت منهن الحين ... وهذا أول شئ سويته حسست زوجي إن سبب رجوعي له عيالي بس وإني ما أبي شئ من هالدنيا إلا إني أربي عيال صالحين هالشئ خلاه يحس إني مو مهتمه له ابدا وخلاه يحرص يعرف شو سبب تغيري من مجنونه في حبه لانسانه مو مهتمه وما دام بداء يحرص معناته أنا بديت أشغل تفكيره وأكيد ما راح يفكر بالثانيه وإن فكر تراه ما راح يكون مرتاح لأن أساس البيت بدا يغير ركايزه ... يتبع |
مر شهر على رجوعي لبيتي وأنا أشوف زوجي مو نفس الشخص الاولي
صمت مطبق وإنسان مجروح ولكن كان يداري جرحه بالصمت وعيونه على الموبايل طنشت كأني ما أشوف شئ ... وما كنت أسأله شو فيك متضايق تكلم أهلن بكلامه سكت فر علي علشان ما أندمج كثير ... قمت بواجباتي الزوجيه كامله ولكن قللت اللهفه والشوق والكلام ... كان كل يوم مساء يوديني للمدرسه ويرجعني وكنت أفكره بهذا الوقت يروح لها لكني إنصدمت لما قالت لي خدامتي إنه يرجع ينام ... غريبه الظاهر ماتت هههههههههه .... جاني فضول غريب أبي أعرف السالفه ولكن ما كنت أبي أفتح الخط بيني وبينه كثير وللعلم بشخصيتي هذي حبني أكثر حب تجددي حب غروري وتمنعي منه وكنت لو أطلب قلم رصاص يركض ويطيح علشان يوفره ... بهذا الاسلوب سويت لنفسي دولة ذات حدود وقوانين وهذا أكبر غلطه تقع فيها المتزوجات المفروض تتذكرين إنك مثل ما لك جسم مختلف ويحتوي كل شئ مختلف حتى بينك وبين أختك الي أمك جايبتها لازم تتاكدي إنك وزوجك شخصيتين مختلفات الإختلاف التام ... علشان تفهمون هالمقطع أنصحكم بكتاب النساء من الزهره والرجال من المريخ بلإضافه لكتاب لا تهتم لصغائر الأمور للازواج وللمراءه المهم الزوجه لا تقول أنا وزوجي روحين بجسد وكلام الافلام الي ما له داعي غلــــــــــط أنتي مختلفه عن تمام إختلاف دائما إجعلي لنفسك خصوصيه وتامه لبعض الامور الشخصيه مو لازم كل شئ يعرفه وتصيرين أنتي قدامه كتاب مفتوح ومن كذا يمل الرجال ويدور له على كتاب جديد يقراءه عشي مع زوجك إمـراه بوقت وأم بوقت وزوجه بوقت وحبيبه بوقت وصديقه بوقت وأنتي ذلك الشخص الذي بداخلك والذي يخصك لوحدك بوقت ... إجعلي لحياتك نمط يخصك أنتي أنتي المسؤله عنه ولا تصيرين صوره وكل من هب ودب يحط لها برواز بروزي شخصيتك بالذي يناسبك ويريحك أنتي وصدقيني زوجك بيحترمك أكثر لانه هذي ميزتهم هم يحبون النساء ذات الدول والحواجز علشان يقتحمون عالمها وكل فكوني ذات غموض .... المهم إنه وبعد شهرين من رجوعنا لبعض إكتشفت إني حامل الصراحه تضايقت وبكيت كثير وخاصه إني جايبه طفل بقيصريه والغلطه غلطتي ما فكرت أستخدم موانع <<< تفكر نفسها ترضع الحبيبه وضامنه ما تحمل المهم هو فرح كثير ... لما مر على حملي شهر ونص وكنت راجعه من المدرسه شفت كرتون كبير في السياره وراء شافني إنتبهت لها إنتظر سؤالي لكن الانتظار طال بطلت التدخل والفضول الزايد كاني ما شفت شئ في البيت شفته ماخذ الكرتون وللمجلس رحت للعيال وأخذت حمام مضبوط وجيت لزوجي شفته يركب المدعو بالكمبيوتر هذا نعرفه بالكتب لكن عيني عينك ما شفته الا اليوم قلت زين تطورنا شوي وهو يركبه كان يركبه بسلاسه فتأكدت إن له خبره بهذا الجهاز حطيت العشاء وجلس ياكل وقال عندنا بالدوام واحد وقلت باخذ واحد نتسلى فيه بالبيت بما إني فاضي طوال العصر وأنتي مشغوله بدراستك << عذر اقبح من ذنب طالعته ببرودي المتعاد قلت له بالبركه الله يعطيك خيره ويكافيك شره ثاني يوم وصل شئ ثاني الانترنت وبعد ما كنت أعرف شو هذا قال هذا الاتصال يخليك تشوفين كل العالم قلت زين كان يجلس على النت بوقت ما أكون بمدرستي ولما أرجع يقغله لو ما جاء له نوم يجلس عليه شفت إن زوجي شوي شوي بدا يرجع لطبعه قلت الظاهر في شئ عند هالمخلوق شئ جديد ما صدقنا نفتك من القديم ... المهم بيوم من الايام جاني أخوي زياره ودخلته المجلس وشاف الكمبيوتر قال عندكم نت طلع أخوي يعرفه قلت إيه قال من يجلس عليه قلت زوجي قال كيف هو معك الحين قلت رجعت حليمه لعادتها القديمه ولكن شو نسوي صبرنا لله ... قال إصبري لا تنسين عيالك وأنتي حامل يعني إصبري وبس قلت هذا الي بيصير ... المهم شوي شوي ولا الزوج بدا يسهر للصبح على النت ياسلام شوي شوي حول فراشه معه وينام هناك وردينا لمثل أول وأخس وأدهى وأمر ولكن هالمره بالبيت لكن الميزه الجديده في الموضوع إنه كان يحترمني ويقدرني ويخاف لو تضايقت وهذا كان يحصل نادرا ... جلست أفكر الحين هالجهاز بيكون بدال الحبيبه وقلت لنفسي لا تكون حبيبته بالداخل بس << تفكر على قدها ... قلت لو خليته على هالوضع بيرجع مثل قبل وبيبداء يطنشني أكثر مع إنه محترم للحين لكن أخاف تتكرر السالفه ... وكان هذيك الايام قربت مناسبة عيد زواجنا ولأول مره أسوي في هذاك اليوم شئ مميز فرحت سويت شويت حركات على القد لكن كان لها طابعها وأخذت له هديه قلم << تعترف بأهمية المقوله زمان العطاء بلا مقابل ولى وراح أخذت له قلم ماركه ولكن ما كلفني كثير لأنه هو ما يكلف نفسه كثير بهداياه الي شفت منها عطرين بعد رجوعي له ... إنبسط معي هذيك الليله ولكن أخر الليل راح للكمبيوتر ... قلت لازم أكتشف شو عنده هناك وهذا الي حصل .... يتبع |
حرام عليك كنت منسجمة
ليه ماكملتي القصة |
ثاني يوم لما راح للعمل قلت بدخل أشوف شو حاصل هناك ورحت أتعبث باهلجهاز واشتغل
لكن أول ما شتغل ولا أنا أسمع أصوات تنبيه خفت قلت شو صار قلت بسكره ما عرفت وخفت إرتجفت أخر شئ طفيته من الفيش ولا كن شئ صار وهديت نفسيا لكن ... مازلت أبي أعرف شو موضوع هالسهر وأنا أفكر تذكرت مدرستي الحبيبه قلت خليني أتصل فيها يمكن أحصل شئ رد شافي معها يريح قلبي ... سلمت عليها قالت إنتظرتك وطولتي علي قلت سامحيني تدرين البيت وأموره وقالت أمري خبرتها بالموضوع قالت أكيد إما إن حبيبته مسافره لبلدها وهو يكلمها عن طريق النت ولا هو يدخل شات قلت شو هذا شات بعد قالت برنامج محادثه الصراحه هالموضوع جديد علي قلت والحين والحل قالت باقي عن الإمتحانات إسبوعين ركزي على إمتحاناتك وتأكدي إن الله ما يضيع عباده كل ما تحسين إنك ما تقدرين تتحملين حركاته إتصلي فيني ولا في أي إنسانه ترتاحين لها وفضفضي ولا تقربين صوبه لانه ما راح يسمع لك لانه مو محتاج لشكاويك هو يبي يرتاح ما يبي شكاوي ونكد خلي جوك يتسم بالضحك والتسلي مثل ما أنتي عليه قلت أوكي مرت الايام والامتحانات خلصت اللهم لك الحمد نجحت وبتفوق فرحت كثير ولما ركبت معه في السياره كنت بطير من الفرحه وأنا جايبه الشهاده قلت عليك سهره لا لا عليك ومطالب بيومين أغير فيهم جو نفسيتي تعبت من الاختبارات فرح لما طلبت هالطلب قال وين تبين قلت أي مكان المهم نغير جو قال أوكي نروح البيت ونقرر المناسب قلت زين رحنا البيت وكنت فرحانه كثير وأضحك وأتكلم وهو جالس يسمع لي ويضحك معي قلت شوف بنوم العيال وبنطلع أنا واياك نتمشي شويه شو رايك قال صار يلا روحي رحت أرتب أمور عيالي ودخلت غيرت ملابسي ورتبت نفسي بهذاك الوقت هو جلس على النت ولما جيت أدق له الباب قال لحظه بجيك قلت زين رحت إنتظرت عشر دقايق ما جاني رحت أشوفه مره ثانيه قال جاي جاي قلت الظاهر طار الطير من يدي قلت خلاص خذ راحتك ما أبي أطلع بنام وأنا رايحه لغرفتي فتح الباب قال لا خلاص بنروح قلت ما بي أروح وجلست بغرفتي زعلانه تذكرت تصرفي قبل سنتين نفس الحركه خليته لها بغبائي والحين نفس الحركه سويتها ولمت نفسي على الفعله وأنا الوم نفسي جاء لي قال يلا بنروح طالعته بهذيك الابتسامه وقلت يلا قال تعجبيني لما ما تتضايقين قلت ما تضايقت بس كنت أبي أشوف غلاتي معك << نصابه كنت أتقطع من العصبيه ولكن تذكرت نصيحة الدكتوره إذا حسيت بزوجك إن في شئ شاغله لا تتهورين وتتركينه لانه ما راح يهتم لك أبداً أبداً لانه عايش جو سعيد ومرتاح فيه لكن هو أهتم لي وجاني هالمره مو لسواد عيوني ولا لأني أفضل من الي جو عنده لاني أنا تغيرت وما دامني تغيرت علشانه كثير فصار عنده إحساس بالذنب وهذا المطلوب من كل وحده لا لا لا تهملين زوجك أبداً أبداً لو حسيتي إن في وحده بالخط ليش تعطينها فرصه تتغلب عليك إذا جاك لا تصدينه وتقولين له روح للي شاغلك بيروح أكيد لان هناك ما فيه نكد ولا بوز ممدود ... إذا حسيتي إن في وحده بحياته لا تهملين جمالك وقوي ثقتك بكلمه ردديها أنا صاحبة السياده أنا ملكة قلبه ما فيها شئ أحسن مني ومن يدخل للبيت إبتسمي له ورحبي به وهلي وساعديه بخلع ملابسه جيبي له عصير ماي أي شئ المهم خليه يحس بالذنب خليه يشوف جمالك الداخلي والخارجي الي فيك من حره وقهر خليه مكانه وابلعي كل شويه معكب ثلج وفوق هذا راقبي وضعه وبكل حذر خربي عليه جوه ... المهم قال نتعشى برا ولا نتعشى أول وبعدين نطلع قلت له نفسي بكنتاكي إبتسم إبتسامة مقهور قال تستاهلين زوجي سألني تبين عشاء برا ولا بالبيت لو قلت بالبيت بيتعشى وبيقول خلاص ننام وخليها بكرة وبيمثل علي دور المشتاق علشان يعجل بدخوله للنت ولكني قلت بطلع أحسن طلعت في البدايه حسيته متضايق ولمحت له لو في شئ شاغلك بنرجع للبيت إرتبك قال بصوت مرتبك شو بيشغلني عنك يالغاليه قلت أشوفك ساكت قال أفكر وين بنروح اليومين الجايات قلت زين تراني أبي طلعه حلوه نعوض فيها فترة غيابنا عطاني إبتسامه صفراء فهمت مغزها المهم رجعنا البيت متأخر وغيرت ملابسي وجيت له قلت بتنام قال بجلس شويه على النت قلت أوكي دقايق إلا وهو جاي الظاهر خربت عليه شئ والله يعين بكره ما يطنشني أكثر ههههههههههههه المهم بدأت إجازة الصيف وأنا لهذاك اليوم ما أعرف شئ عن زوجته وشو مصيرها طلقها ماتت إختفت ما أعرف شو موضوعها إلين سمعته مره يتكلم بالموبايل يقول وين حصلتوها أها خلاص أوكي أنا جاي لكم قريب بس لا تبينون لها إنكم كشفتوها خلوها أنا جاي لها خلال هاليومين سكت ولا كاني سمعت شئ ورحت جبت له عصير وجيت لقيته يفكر شارد ذهنه قلت تفضل العصير أخذه وقال أنا صار عندي ظرف طاري واحد من أصدقائي المقربين صار له حادث ولازم أسافر له كنت متوقعه يقول هالكلام قلت يالله عساه ما تعور قال ما أدري بس لازم أسافر أطمن عليه قلت خلاص حبيبي روح الله يحفظك بس إنتبه لنفسك فرح بردة فعلي ما كان متوقع إني أقبل سفره بهذي السهوله وبالذات لهاذي البلد لانه يدري إني أدري عن زوجته لكني سويت نفسي متاثره جداً وخايفه على صديقه المزعوم وأصلن أنا كنت أبي أكتشف سر هالكمبيوتر ما دام مو هي إلي يسهر معاها الليل فمن هي الجديده ... جهزت شنطة زوجي بثياب مرتبه ومبخره ومعطره حطيت لوازمه بشكل أنيق حرصت كل الحرص إني أحط لمساتي فيها علشان يتذكرني حتى لو ما يبي وأهم شئ سويته حطيت صورتي الي صورتها قريب مع عيالي الله يخليهم وهو ما يدري عنها كتبت من الخلف لأننا نحبك نريد البقاء بجوارك دائما وأبداً وراح زوجي بحفظ الله ورعايته وكلمت مدرستي الحبيبه قالت روحي على الجهاز وأنا معها بالتيلفون شرحت لي كيف أفتحه وشو الي لازم أعمله إكتشفت إن بالجهاز في برنامج يسمونه الماسنجر أكيد تعرفونه مو لازم أشرحه المهم كانت فيه وحده من نفس طينة الي قبل ومتواجده عندنا في البلاد ولكنها كانت تمثل على زوجي تحفظها فكانت ماخذه راحتها معه بالماسنجر قالت لي مدرستي كلميها على أساس إنك أنتي زوجك وشوفوا الكلام الي جاني ولا الصور الي أرسلتها وأنا إستقبلتها لها بأوضاع مختلفه هذيك الايام الماسنجر ما تتطور وما كان فيه مكان لعرض الصور لكن كان فيه صوتي بس حسيت إني إنهرت تماما صج تعبت تعبت نفسي وقلت أنا ما أصدق افتك من مطب لمطب بنفس اليوم بالليل إتصل لي زوجي قال من فتح الكمبيوتر قلت ولا أحد قال كيف أقولك من فتحه قال محد شو فيك قال أوكيه أوكيه مع السلامه ومن يومها ما عادت تدخل الظاهر إتصل فيها وخبرته إن في أحد على ماسنجره فمنعها من الدخول علمت أخوي بالسالفه قال جايك أخذ الايميل ومثل عليها أخوي إنه واحد يبي يتعرف وإنه حصل الايميل بموقع تعارف قالت له أنا إنسانه محترمه وما حطيت إيميلي بمكان وأخوي يمين يسار مسكها زين وتعرف عليها بالماسنجر الين سحب منها كل معلوماتها وعرف كل شئ عنها حتى رقم موبايلها قلت زين هذا الي نبيه بعد تعمق معها نبي صور شهر وجاب أخوي كل شئ عنها حتى صورها وأرقامها وأرسلهم لإيميل زوجي هديه معتبره لما وصل زوجي من سفره كنت أنا مرتبه له كل شئ جاء ورحت له أجري من الفرحه علمتني صديقتي عن حركات أسويها علشان أستقبله بها وبالفعل كانت الحركه أدت مفعولها بنجاح ... هذا اليوم رتبت بيتي وعدلت أمور وسويت عجايب كأنه مسافر دهر مو شهر وأهم شئ لبست فستان لوني أرجواني هاللون يطير مخ الرجال المهم جلس زوجي وفي أخر الليل قال إسمحي لي بس بشوف الكمبيوتر حتى وهو تعبان ومنهك قلت تفضل يا قلبي تبيني أسوي لك شاي ولا نسكافيه قال لا لا نامي إرتاحي أنتي قلت أوكيه تصبح على خير أخذ نص ساعه ودخل الغرفه ومسك الموبايل وطلع قلت أكيد شاف رسالة أخوي له وشاف المحادثات والبلاوي والصور والارقام وإنكشفت له حبيبته الخائنه وكانت رقم إثنين تلعب نفس اللعبه ... ما طلعت أشوف شو قال لأني عارفه شو بيقول جلست بفراشي وجلست أنتظره الين ما رجع للنوم وشفته مقهور مو قادر ينام وتبون الصدق أنا ما قدرت أنام بعد طالعة فيه قلت سلامتك فيك شئ قال أبد نامي .... ونمت وصحيت الصبح لقيته طالع قبل لا أقوم قلت وين طار هذا لما رحت أشوفه بالمجلس ما لقيته قلت مو مشكله برتب شنطته فتحت الشنطه طلعت الملابس ولقيت ظرف فكيته قسيمة زواج وطلاق وحكمين صادرين بحقه من المتهمه زوجته الحراميه والمحكمه مصدره أمر بلزم دفع له كل مبالغه الي ما أدري شو قصتها ... قلت زين إفتكيت من ثنتين بحجر واحد والحمد لله أحلى شئ شفته إني لقيت صورتنا مبروزه ببرواز على شكل قلب وللحـــــــــــــــديث بقيــــــــــــــه ... |
رجع زوجي من برا وكان منهك
قلت سلامات شوفيك وكان بيده رمل وبملابسه قال جهزي لي شئ أكله وقولي للخدامه تجهز ملابسنا بنروح بيت أهلي قلبي دق شكل زوجي كان يخوف من التعب والانهاك رحت وراه قلت شوفيك صاير شئ قال خليني في حالي الحين عورتني ركبي من الخوف سويت له أكل وأنا أرتجف ما أدري شو الحاصل جهزنا أغراضنا وسمعته لما سكر باب غرفته رحت له لقيته يصلي ويبكي قلت هذا أكيد مسوي مصيبه يوم خلص صلاته قلت شو صاير شو إلي حصل طمني ما قدر يتكلم وراح للمجلس وحاط وجهه بين كفوفه رحت سحبت يده بقوه شو فيــــــــــك حرقة أعصابي سويت شئ قتلت أحد؟!! أحد من أهلنا صار له شئ قال أبــوي مات عمي الله يرحمه أبو زوجي أعظم رجل عرفته بحياتي صديق أبوي والسبب الرئيسي الي خلى أبوي يوافق على زواجي من ولده ولا نحن بنات ما يطلعونا أبداًاًاً خارج القبيله عمي الله يرحمه إنسان حنون جداً وحكيم ليت زوجي جاب ظفره لكن للاسف ولا طبع أخذه الا طبع الزواج الله يغفر له ويرحمه رحنا لبيت أهل زوجي وجلست شهر مع أم زوجي نسيت كل اللي سوته فيني وقلت الحين ظرف يبان فيه الصديق ولازم أثبت وجودي صح عمي ما كان إسان موذي بالعكس إنسان حليم وصبور ومحترم الله يغفر له ويرحمه ويرحم أموات المسلمين ... بعد شهر قالت أم زوجي لزوجي الحين أنت تشوف الوضع وكيف حالنا ونحن نبيك تسكن معنا إخوانك صغار ... جاني وقال هذا كلام أمي وأنا أشوف أمي محتاجه لي شو رايك قلت أنت تدري إن رجوعنا بيسبب مشاكل نحن بغنا عنها وبعدين إخوانك كبار أصغر واحد عمره 16 سنه وإخوانك 2 متزوجين وعندهم بالبيت ... شاف ما في فايده مني راح لابوي الله يرحمه قال بنتي روحي مع زوجك إرضيه نفسيته تعبانه وما يحتاج تكونين قاسيه معه ... قلت أمرك يا أبوي ورحت أخذت أغراضي ورجعت لبيت أهل زوجي وما كملت إسبوعين الا أم زوجي الله يسامحها كشرت عن أنيابها وبدأت تضايقني بالكلام وتلمح إني أخذت ولدها وحرمته منها طنشتها وشوي شوي رجعت المشاكل مره ثانيه لكن الي رحمني إني كنت مضيعه وقتي بالمدرسه المهم بدا العام الدراسي ودخلت أول ثانوي وهنيه صار التحدي الكبير لإثبات وجودي لأن ولدي دخل أول روضه وكنت أبي أتفرغ لتدريسه وثاني الحال أنا حامل والثالث أم زوجي الله يسامحها أبدعت بأصناف العذاب أول شئ سوته طفشت خدامتي مني قلت عادي أنا أقدر أخدم عيالي والبيت أصلن فيه خداماتهم على التنظيف بيساعدوني لكن هذا تمنى وكلام أصدرت مرسومها إن ولا خدامه تدخل قسمي أنا بالذات ما بين حريم العيال نهائيا طنشت قلت عادي إتصلت بمدرستي الحبيبه واستشرتها قالت حولي لنظام الصباحي أحسن لك قالت الصبح تطلعين ولما والعصر تكونين متفرغه لتدريس ولدك قلت لكن أنا عندي ولد وبنت ما دري من بيهتم فيهم قالت خليهم عند أمك وهذا الي صار ورجعت حياتي التهيت بعيالي ودراستي وهم أم زوجي اللي سوت بعد قرار جديد على كل وحده من حريم العيال دور للطبيخ وبما إني أدرس أخذ العشى يوميا وهن يتناوبن الغداء كل يوم وحده شوفوا العدل بس قلت أوكيه المهم أفتك من حشرتها ولو تدرون نظامي كيف كان الصبح أنزل أسوي الفطور لي ولعيالي ولزوجي وأنا طالعه أودي عيالي لأمي واروح لمدرستي وارجع أشيلهم والحق أرتب شويه واحط الغداء يرجع زوجي وولدي يتغدون أحاول أريح جسمي بس النوم مستحيل وأنا عندي طفلين صغار يبون رعايه والعصريه أذاكر لولدي أول شئ وبعدها أرتبهم وأنزلهم يلعبون أرتب غرفي وأجلس اذاكر للمغرب أخذ عيالي سبوح عشاء نوم على عشره يجي زوجي يتعشاء وينام زوجي ما كان يطلع لكن كان يروح بغرفة إخوانه يطالع معهم التلفزيون ينزل من العصر ما أشوفه الا قبل النوم طبعا هالنظام خلى حليمه ترد لعادتها القديمه شوفوا مع إني كنت أضغط على نفسي البس أتنزين أرتب البيت وأتعدل وأسوي كل إلي يريحه ويفكني من الكلام ولكن زوجي العزيز قرر إنه يتزوج هالكلام وصلني عن طريق أخته جاتني تركض الحقي زوجك بيتزوج قلت لها بالبركه ورحت قالت تراني ما أمزح قلت بذمتك شو تبيني أسوي له يعني أربطه ولا أمنعه أنا شفت رجاجيل مثل أخوك ما شفت يعني أنا أكرف ليل مع نهار وهو ولا حاس غير كذا مهتمه له ومنظفه بيته وعياله ومتزينه ومتعدله برغم إني بالشهر التاسع وهو يقول بيتزوج يا أختي يتزوج خلاص مليت منه مليت ورحت أبكي بفراشي قلت شو اللي بقى وما سويته له تغيير وتغييرت من إنسانه همجيه لنعومه ... إنسانه ما تفهم باللبس صرت البس ... لوحده مش مكمله تعليمها وكملت ... وعيالي ومهتمه بهم وبيتي ومهتمه وهو هذا أنا أتزين وأترتب وأسوي كل الي أقدر عليه شو الي باقي ودي أفهم ... قلت بعلم أبوي عليه وبعدين قلت لا ماأبي أضايقه على مشاكل تافهه أحسن أحلها بروحي ... فكرت أتصل بأختي قلت لا أختي هي بعد بشهرها وما أبيها تضايق نفسها وتتعب فضلت إني أسكت وأسوي نفسي ما أعرف عن السالفه وأطنش وأشوف نهايتها ... وللحـــــــــــــــديث بقيــــــــــــــه ... |
المهم حانت ساعة الصفر وعلامات الولاده بينت فيني
كان المساء أول علامه شفتها قلت بصبر أخاف أتورط بعمليه ثانيه جلست بالبيت التوى من المساء الين الساعه تسع الصبح ولا حد داري إتصلت فيه قلت أنا تعبانه قال إنتظريني ساعتين وبرجع عصبت قلت تبيني أولد بالبيت قال أنتي ولادتك مرض الله يمرضك وسبني وسكر بوجهي التيلفون جلست نص ساعه ما قدرت أصبر إتصلت فيه رد علي قال جاي جاي وسكر للمره الثانيه قلت الله موجود وما ربك بظلام للعبيد وصل الحبيب الا وأنا خلاص تعبانه تعب خيالي دخل وهو معصب يلا جهزي نفسك قلت جاهزه إسبقيني للسياره بجيك رحت للسياره وأنا أدعي ربي سترك ما أولد بالسياره بس قال بتمرين لأمك قلت ما في وقت جلس يهز رأسه مستهزيء بكلامي قال تصدقين أنتي نحيسه حتى بولادتك سكتت عنه وجلس يتكلم ويتكلم وأنا التوي من الالم صرخت بوجهه قلت شوف لا تخليني أرفع يدي وأدعي عليك ربي وأنا بهذا الوضع الي فيني وأنا إنسانه مظلومه وإنظلمت وأنت متأكد إني مظلومه وأنت تعرف رد ربك على دعوت المظلوم إسكت ووفر كلامك ويصير خير بعد الولاده وصلت للمستشفى ودخلت أسابق الريح نسيت الالم لأني خلاص على وشك وما أبي أولد بالشارع أول ما دخلت مسكت يد الممرضه قالت فايل مدام قلت لها خلاص تعبانه دخلتني للغرفه علشان تشوف ولاده والمسكينه ما لحقت تلبس القفاز الا وأنا والده والحمد لله بدون عمليه . نص ساعه وحولوني لغرفة بالعنبر جا زوجي وهو ما يدري شو يقول مستحي من إسلوبه قال ما كنت أدري إنك تعبانه قلت يكفي إني أدري وطلعت بعد ما أخذت إسبوعين بالمستشفى طلعت من المستشفى تعبانه وأمي طبعا جاتني زياره وراحت ما تقدر تجلس ببيت عمتي فيه .. قلت لزوجي أبي خدامه قال البيت فيه ثلاث خدامات قلت أوكي هات وحده منهن تجلس أربع وعشرين ساعه تحت خدمتي لحد ما أقوم من فراشي قال متى تحتاجينهم أطلبي الي تبينها من ماسكك قلت أمك ... مانعه خداماتها يدخلن قسمي وأنت تدري ماله داعي كثرة الكلام وإسمع ما دامني محترمتك إحترمني ... قال إحترمتيني بشو بذمتك ما يكفي اني صابر عليك قلت صابر علي ؟!! بشو صابر يالصبور قال خلاص فكينا من الكلام شغاله وبنجيب لك وطلع كلامه رن بأذني ولثاني مره أسمع منه كلمه تسوي رنين باذني صابر عليك صوت صدى براسي والله من قوتها ... قلت أكيد في خلل بالموضوع يا أنا مو صاحيه يا هو الي مجنون عشرة أيام وجات الشغاله جابها عندي فوق وقال هذي المدام علمتها على نظامي وكيف تهتم لبنتي كملت شهر رجعت لدراستي وقلت ما دامني ما فلحت مع زوجي خليني أعوض على نفسي بدراستي أبرك لي وللحـــــــــــــــديث بقيــــــــــــــه ... |
ورجعنا أنا وزوجي نفس الشئ ولنفس الحاله وخطب زوجي بالفعل وحده أمه إختارتها له وتمت مراسيم الخطبه وأنا مطنشه تبون الصدق أمثل إني مطنشه ولا قلبي يحترق ويغلي من النيران إلي فيه ...
إتصل فيني رحمة الله عليه والدي يطمن على حالي بعد ما درى بالموضوع قال هاه كيف حال القلب قلت الحمد لله على كل حال قدر الله وما شاء فعل قال هذي هي تربية يدي الي بفتخر فيها كذا أبيك بنات العرب يتعادلون ولو إني ما سويتها لأمك ضحكت قلت وليش ما سويتها قال ما تهون علي بنت عمي قلت الحمد لله أنت قدرت بنت عمك وأنا يعوضني الله بصبري بعيالي قال ويخلي لك أبوهم قلت أمين قال أقولك فيه خير صدقيني بس أنتي لليوم يا بنتي ما مسكتي مفتاح قلبه ... قلت والله ما خليت شئ يابوي أنت تشوف تغيري الي مسويته له قال هذا الي سويتيه لنفسك وبس تلبسين فهو لك تتزينين بعد لك تتعطرين برضوا لك <<ياعمري على كلمة برضوا لما تطلع منه تشق القلب من حلاتها قلت وهذي الاشياء ماتجذبه قال بس الرجال يبي حرمه قلت وأنا شو بالله عليك مو حرمه قال إسالي نفسك قلت فهمني قال ما راح أفهمك شئ أنتي فكري وشوفي شو أقصد ... وسكر عني الله يرحمه ... وقمت وقفت قدام المرايه شككني بنفسي جلست أحوس وأفكر وأبي أوصل لسالفة الرجال يبي حرمه كيف يعني حرمه كيــــــــــــــــــــــــــــــــــــــــــــــــ ـــف ... وما عرفت الإجابه وخليت هالكلمه بقلبي وكنت كل ما أقراء شئ أدور معنى كلمة حرمه <<< جالسه تكتب وتضحك على نفسها وتفكيرها المهم ياعزيزاتي خلصنا أول ثانوي على خير وبتوفيق من الله والحمد لله كانت النتيجه أحسن من الي قبلها ... زوجي في هذيك الفتره ما كان معترف بي نهائيا ولا تسالوني كيف تحملتي تحملت وخلاص وأهم سبب إني ما أرجع لبيت أبوي إلا وأنا مطلقه وكيف أطلب الطلاق وأنا لي أربع أطفال ولا أبشركم خلصت أول ثانوي وبنتي عمرها شهرين ونص وحملت بالخامسه يعني ثبتت مضبوط وما في فكه من زوجي ... في الإجازه طلبت من زوجي يأخذني للعمره قال خليها الصيف الجاي قلت ليش قال ما تدرين هالصيف وراي عرس قلت أهاااا <<< ما كانت كلمه قالها كأنه جاب كوايه ومرره على صدري من قوه الكلمه دموعي نزلت من حرارة قلبي رحت توجهت لربي يا رب خفف علي نار الغيره ما أقدر على إني أتحمل أكثر يا رب .... جلست بقسمي وعند عيالي وعندي الكمبيوتر كل مره أقراء موضوع ومن موقع لموقع قريت مواضيع كثيره وإستفدت فايده عظيمه من نصائح البنات جزاهم الله الف خير وبينما أنا غرقانه أتصفح شويه وأسمع دق باب غرفتي قلت تفضل وإلا أشوف عمتي جايه إستغربت دخولها لقسمي والإبتسامه شاقه وجهها قلت هلا عمه قالت إنزلي تحت ضرتك تحت ... قلت أوكي بلبس وبنزل قالت لا تتزينن كثير علشان ما تغار منك هههههه ضحكتيني قلت حاضر قلت شو فيها عمتي تستهبل علي شو تغار مني المفروض أنا الي أغار مو هي المهم نزلت لتحت دخلت لمجلس الحريم سلمت على الحريم قلت أكيد العروس راحت عند أخوات زوجي يمشونها بالبيت جلست قالت عمي هذي زوجة فلان ولدي قالوا كيف حالك قلت طيبه الحمد لله وقامت عمتي تعرفني عليهم وحده وحده الين قالت هذي فلانه طالعت فيها إبتسمت لها سبحان الله شئ مثل الصاروخ دخل بقلبي لما شفتها هالصاروخ كان منظف نظف قلبي من الغيره ما أدري ليش إرتحت لها قلت لها كيف حالك قالت تمام وشوي جات الخدامه تقول البيبي مدام واستأذنت منهم ورحت لبنتي... وللحـــــــــــــــديث بقيــــــــــــــه ... |
نص ساعه وجاتني العروس فوق
قالت ممكن أدخل قلت تفضلي جات البنت وجلست معي ما تدري شو تقول قلت لها تكلمي ليش محتاره قالت أدري إنك حزينه لأن زوجك بيتزوجني قلت لها لا طالعتني قالت لا قلت إيوه قالت بس أنا سمعت إنك عارضتي زواجنا قلت من قالك ؟! قالت سمعت وخلاص قلت إشاعه أنا إنسانه مؤمنه والزواج قسمه ونصيب ولو لك نصيب مع زوجي ربي بيتممه عليكم قالت ما توقعتك إنسانه طيبه قلت ليش وصلتك إشاعه باأني شريره قالت سمعت كلام بس فلان يقول ما فيه مثلك في هالدنيا حرمه وأنا سالته ما دام ما في مثلها حرمه ليش تتزوج عليها قال خليني أحتفظ بالسبب لنفسي إبتسمت لها وقلت لا تسائلين كثير أحسن لك عيشي حياتك ... وراحت المسكينه من عندي ... حسيت إنها مجبره على الزواج من نظرتها الحزينه ... وكان هذاك اليوم أخر يوم أشوف فيه وجهها الين سمعت عن وفاة أبوها رحت عزيتهم مسكتني على طرف قالت بطلبك طلب ممكن قلت أمري قالت علمي فلان إني ما أبيه طالعتها قلت أسفه لا تحرجيني بالموضوع ورحت لبيتي ما أدري أفرح ولا أحزن لكن قلت الحمد لله ... هي ما تكلمت بالموضوع مع أحد وإنتظرت أمها الين تخلص عدتها كنت أنا هذيك الساعه في الشهر السابع بحملي وكان المفروض أكمل دراستي لكن لا الظرف الصحي ولا النفسي ساعدني ففضلت أهتم ببنتي الصغيره وبحملي وبعدها خير ... المهم ولدت على بنتي وبعد ما خلصت الاربعين سمعت خبر فسخ الملكه من أخت زوجي هي نفسها الي زفت لي الخبر وبنفس الشهر تزوج أخو زوجي على زوجته تبون الصدق إنصدمت بزواج أخو زوجي على زوجته وأصلن الكل إنصدم بزواجه وجاتني زوجته تدق بابي بقوه وتقول الله يخليك سامحيني بس خلاص ما أقدر أتحمل أكثر يكفيني اللي صار لي قلت لها سلامات شو فيك يا بنت الحلال قالت لي أوعديني تسامحيني أول شئ قلت لها أوعدك .... أنا إختصرت لكم الاحداث كلها علشان أخلصكم وأخلص لأن وراي سفر بكره ... باقي أخر جزء بالسالفه وهو أهم جزء ... |
قالت أنتي وعدتيني إنك تسامحيني
قلت لها وعدتك قالت إحلفي قلت بتتكلمين ولا لا قالت إحلفي قلت ما راح أحلف بكت وترجتني قلت يا بنت الناس حيرتيني معك شو سالفتك بالله عليك ... قالت تعرفين إن سبب مشاكلك مع عمتي أنا السبب فيها قلت أدري إنصدمت من ردي قالت تدرين قلت إيوه أدري وأدري إنك كنتي تزنين على راسها علشان تزوج زوجي وأنتي الي تخليها تهاوشني وإن منع الخدامات بأمر منك وحتى عزومة العروس للبيت كانت من تدبيرك علشان أنقهر وقالت ليش ما كنتي تتكلمين قلت ماله داعي أدري إن ربي بينصرني على من ظلمني وليش أنا أدافع عن نفسي وعندي ربي ما راح ينساني ... قالت بخبرك شئ ولازم تعرفيه عمتي حاطه برأس زوجك إنك إنسانه مو مريحته قلت ومن مريحه قالت هي كانت يوميا تقول له زوجتك مو بنت ولو تبي تتأكد تزوج بنت وبتكتشف إنها كانت مو عذراء إبتسمت لها وقلت جزاك الله الف خير وأنتي أنا مسامحتك دنيا وأخره وما كنت أتمنى أبداً إن زوجك يتزوج عليك ولكن قولي قدر الله وما شاء فعل ... وأم زوجي كل أفعالها مسموحه فيها إلا هذي الكلمه أبيها تتحمل وزرها علشان تعرف ترمي المحصنات الغافلات الحافظات لفروجهن ورحت توضيت وصليت ركعتين إستخاره ورحت لزوجي لقيته منسدح بغرفة التلفزيون تحت سكرت التلفزيون وقلت له فلان قال نعم قلت كم جبت لك عيال قال هاتي من الأخر قالت من الأخر هذولا مو عيالك ما أدري كيف وقف أنا شفته طب وأقف وسكر الباب بقوه وسحبني من يدي لعنده شو تقولين فكيت يده مني بقوه قلت الي سمعته وقال تقولينها بكل وقاحه قلت إيوه أقولها بكل وقاحه هالعيال عيال أمك مو عيالك لاني يوم تزوجت الظاهر والله أعلم إن أمك كانت داخله علي مو أنت سكت تجمد وجهه من قوة الفشيله قلت الظاهر إنك يا أهبل ولا تستهبل أنت ماخذ ثنتين مو وحده لو ما كنت أنا العذراء فاكيد الثانيه كانت العذراء الشريفه وأكيد كنت بتعرف من فينا الطاهر يا طاهر عموماً الكلام واقف ولنا وقفه عند أبوي وللاسف راح أبوي قبل لا أخبره هالموضوع |
مات الله يرحمه في نفس اليوم المساء الله يغفر له ويرحمه ورحت لبيت أهلي جلست مع أمي فترة الحداد كامله وما كان بيننا أي نوع من أنواع الإتصال كان يجي يزور أمي وكنت أطلع لما يجي يزورها ...
طيلة هذيك الفتره كنت أفكر أرجع له ولا أطلب الطلاق وأريح نفسي جيت جلست عند أمي خبرتها بالموضوع بعد ما خلصت عدتها قالت أمي ما عليك منها يا بنتي بيتك وعيالك لا تنسين عندك خمس عيال ومحتاجينك قلت وأنا والإهانه والجرح قالت ربي بيعوض صبرك خير صدقيني قلت أمي تعبت صدقيني من كل يوم يبي حرمه وأنا لليوم ادور معنى كلمة حرمه وما فهمتها قالت وأنتي شو مو حرمه وهي تضحك قلت والله هذا الي أعرفه قالت أنتي من قال لك إن زوجك يبي حرمه قلت أبوي الله يرحمه وجهه أمي صار بهذا الشكل وقالت وأنتي جلستي تدورين المعنى قلت إيوه قالت المعنى الرجال يبي يحس بوجود زوجته بفراشه يبي يحس إن الي عنده حرمه قلت أهاااا قلت زين الحين فهمت ورحت لغرفة أخواتي لقيت أخواتي المتزوجات وقلت لها ممكن سؤال؟ كيف الرجال يبي يحس بزوجته إنها عنده بالفراش جلسن يضحكن علي وقالوا أنتي لليوم ما عرفتي قلت لو كنت أعرف ما كان زوجي كل يوم يركض يبي زواج ... وأخذت درس محترم من أخواتي وفهمت المطلوب ... وجا زوجي وقال يلا بنروح للبيت قلت زين ركبت أنا وعيالي للسياره وأنا أشوف الطريق مو هو طريق بيت أهله قلت لوين رايحين قال للبيت قلت أي بيت قال البيت سكت عنه قلت هذا للحين يستهبل ... وقفت سيارتنا قدام بيت غير بيت أهله قلت بيت من هذا قال بيتك الي أبوك الله يرحمه شرطه علي وهذا أنا جبته لك وهنيه أكتفي بهذا القدر عن حياتي وأقولكم أنا الحمد لله سعيده ومرتاحه اللهم لك الحمد ... |
أخــــــــــــــــــــــواتـــــــــــــــي 1ـ الزوج لما يتزوج ما كان يبي ديكور إضافي لبيته ولا شغاله ولا غساله كان يبي أنثى بكل ما تحمله هذه الكلمه من معان ... أنا ما كنت أعرف أمور كثيره وتعلمتها لأنه لازم أتعلمها ما أقول أمي قصرت لكن أمي جعلها مع خوفي كمل الموضوع زين ... تعلمت فنون كثيره نفعتي بحياتي الزوجيه صح جات متأخره لكن لعل هذه حكمة من ربي علشان نعيش حياتنا أكثر سعاده ... الحياه الزوجيه بتشوفين فيها كثير وأول نصيحه وأهم نصيحه لا تتركين بيتك لأي سبب إجلسي وإصبري وتحملي ما دام زوجك مو مسبب لك أذيه باليد أوشرب المنكرات ... 2ـ إهتمي بصحتك بتنفعك ... بصحتك بتكونين حرمه بكل قوتها بصحتك بتنفعين عيالك وبصحتك بتقومين لعبادتك... 3ـ إقري وتثقفي بأمور الحياه الزوجيه ولا تتوانين تستشيرين أحد من المختصين لأن هذا زواج ويبي ناس فاهمه تساعد لا تتخبطين يمين يسار... 4ـ الزوج إنسان له إحساسه ومشاعره مو تقومين تجيبين لك درزن عيال ولا نص درزن وبعدين تقولين يالله أقوم أربي عيالي الحين وهو براحته أنا بفضى له ولا لعياله ...العيال بيكبرون وبيتزوجون وبينسونك مثل ما نسينا أهلنا وعشنا ببيوتنا وما نذكرهم إلا بالاتصال أو الزياره ... أما هو رفيق الدرب وأنيس الوحده تقربي منه بالأسلوب اللطيف والكلمات الرائعه لا تدخري أي كلمه تعرفينها إغرقيه بحنان وحب وبتشوفين كيف بيذوب بين يدينك وإن حسيتي في أحد يبي يخطفه منك كثفي الحنان جرعه زياده وشغلي مكر النساء لا تنسين تفكرين بعقل ولا تخطين أي خطوه إلا وأنتي دارسه نتائجها... 5ـ سامحيه سامحيه سامحيه على كل زلاته ولا تتركيه وتروحي لبيت أهلك ما دام قلبك مملوء بالبغضاء عليه ... 6ـ حبي زوجك بشكله وطباعه ولونه هذا نصيبك وإرضي به ما دام هو قايم بما يرضي الله ما عليك من الباقي وإعتبري الباقي إبتلاء من ربك وإصبري... 7ـ وهذي سر قربن بقولها لكن تدرين إن ملامح وجهك تبين له إذا كنتي تحبينه ولا لا من نظرت عيونك وإشراقة إبتسامتك وصوتك وحتى بضحكتك |
هذه أسئله سألوها بعض الأخوات صاحبة القصه
فتابعوني أخواتي وإصبروا معي لأن الأسئلة أكثر من القصة بكثير جداً... وها أنا أنقلها لكم لتتم الفائده لأني أنا شخصيا إستفدت منها وأتمني أن تنال إعجابكم تقول الأخت وصلتني رسائل كثيره فيها أسئله متعدده وهي . ممكن أخبركم كل شئ وقبل لا أتكلم في الموضوع مسموح نقله مباح محلل دنيا وأخر والهدف لله وإني أبي الأجر وما في داعي نذكر الاسم أو المصدر إنه مني الموضوع لله وفي الله . كيف هي حياتك الآن ؟ حياتي مثل حياة كل إنسان وبما إني أنتمي لهذه الفئة من الذين خلقهم الله سبحانه وتعالي فأكيد ينطبق على ما جـاء في محكم آياته َ"لَقَدْ خَلَقْنَا الإِنسَانَ فِي كَبَدٍ" اللهم لك الحمد والشكر ولكن هذا مو معناته إني مش مرتاحه بالعكس الحمد لله مرتاحه ومرتاحه بقوه لأني أعرف كل هم يخترق صفو حياتي بأجره . فلما الحزن على هدايا القدر وهي تتكفل بمسح الذنوب والآثم عنا وذلك مصدقا لما قاله صلى الله عليه وسلم :"ما يصيب المسلم من هم، ولا حزن، ولا وصب، ولا نصب، ولا أذى حتى الشوكة يشاكها إلا كفر الله بها من خطاياه" رواه مسلم. كيف قدرت أتقبل زوجي بعد كل اللي صار بيننا ؟ بتوفيق من الله . ما أنكر لما الشيطان يذكرني بالماضي إني ما أحزن لا والله أحزن وأبكي وايد . واللي يحزني إني كنت أخدمه بعيوني وهو ما قدرني ولكن دائماً وأبداً تكون الغلبة للاقوى وأنا بفضل الله ومنته الاقوى اليوم إنتصرت على الكل اليوم أجبرت الجميع إحترامي وتقديري بالعقل والتصرف الصحيح مو بالمشاكل والفوضى . مثلا :أم زوجي كانت كل ما تتكلم مع الحريم تقول أنا مش نظيفه اليوم ودي أمسك رأسها وأبوسه وأقول لها عمتي الحبيبه من بعد فضل الله وتوفيقه لي ومن ثم بسبب كلامك الذي لن أصفه الغير صحيح ولكن كان ظلم وبهتان في حقي . اليوم أنا أتفوق على كل نساء العائلة بالنظافة والتنسيق وحسن التبعل وإستقبال الضيوف فمن هي مثلي اليوم منهن ؟! كلامك عني جعلني أثبت لنفسي ولك وللغير إني مميزه . أخواتي لما نستفيد من المواقف الشينة بحياتنا ونضبطها في صالحنا نطلع بنتائج مبهره . صدقوني بحياتنا صارت مواقف مؤلمه ولكن لكل شئ بهذي الدنيا له حكمة . زوجي تقبلته لأني أبيــه قبل لا يكون لي زوج أب لعيالي عندي عيال وما أبيهم يتبهدلون والسب كلام أفلام وجرايد وأصرخ وأقول كرامتي ما تسمح لأجلهم كل شئ يهون وهالكلام ما ينطبق على الزوج الي مواصل خياناته وحركاته هالكلام اللي يقول الله حق ومحترم بيته وزوجته وعياله . هل ما زلتي تحبينه ؟ وعن إني أحبه أكيــــد أحبه ما لي غيره زوج هو شريك الحياه وهو الحبيب الله لا يحرمني منه ولا يحرمكم من أزواجكم ويرزق كل وحده ما تزوجت بزوج صالح اللهم آمين . الحين هو كيف معك ؟ زوجي معي ههههه سؤال ضحكني مثل ما هو زوجي الاولي ما فيه شئ تغير لا تتوقعون صار قيس بن الملوح ولا روميو وأنا صرت وجوليت ... الفرق الوحيد إنه صار محترم لأني صرت أحترم نفسي . صار ما يعصب لأني ما صرت أضايقه . ما أتصل فيه وينك وشو تسوي الحين وليش تطلع وليش ما ترد على إتصالي وليش وليش وأسوي مشكله من لا شئ . يعني لو فيه ضروره دقيت له ومن أول رنه يرد تدرون ليش ؟ لأني مو كل شويه أدق له أدق له لو صار شئ فصار يفرح بالإتصال . وأصلن صار هو يدق لي ويقول ما إتصلتي فيني اليوم سلامات لا تكوني مريضه أقوم أسوي نفسي مسكينه وأقول ما أبي أضايقك بإتصالي أبيك تأخذ راحتك حبيبي بطلعتك "ما يدري إني أصلن مو مهتمه بالإتصال أصلن بيني وبينكم عندي شغل وايد تدريس عيال وإن خلصت أهتم بترتيبات البيت وإن خلصت أشوف صحتي وجمالي ونظافتي " من بديت أشوف شغلي وأموري وما خليت زوجي أول أولوياتي عرفت معنى الحياه وجمالها . عرفت كيف أعيش الثانية بروعتها . إستمتعت بصلاتي وبقرأتي للقرآن . إستمتعت بجلوسي مع عيالي أذاكر لهم وقرايب المغرب نردد مع بعض أذكار المساء . إستمتعت بطبخي وبكل شئ احبه إستمتعت وأنا اعبئ البانيو بماء دافئ فيه ملح وبابونج ولا نعناع مجفف وأسترخي فيه نص ساعه أرمي فيه تعب يوم كامل من العمل وملاحقة أمور الاطفال وأقول بيني وبين نفسي هذا وقتي الآن وقت راحتي . استمتعت بقرأتي لكتبي الحبيبه يتبع إن شاء الله |
أخواتي المعذره على تأخير كتابة الأسئله والله تبون الحقيقه تعبت إيدي وعيوني من كثر الكتابه لي يومين وأنا أكتب ولكن إذا شاء الله بكمل فلا تنسوني وصاحبت القصه من الدعاء وشــــــــــــــــــــــاكره مرور الجميع أختكم همســــــــــة حق |
مشكوره حبيبتي
على الموضوع من جد مشوق لكن القصه حقيقيه حقيقيه؟؟؟؟؟؟؟؟؟؟؟ |
اعاننا الله وإياكم على ذكره وشكره وحسن عبادته
|
جزاج الله خير
اكثر من نص ساعة وانا اقرا الموضوع وضحكت في بعض المواقف .. ودمعت في مواضع اخرى الله يهني الجميع ويحفظ كل بيوت المسلمين لكن ليش تعبت ايدج ؟؟ .. سوي كوبي وبيست |
بدر البدور زوجة مبتعث ود 2000 الودق مروركم أنار متصفحي بارك الله فيكم ونفع بكم الودق الشغله ماهي نسخ ولصق علشان كذيه تعبت واااايد فاالمعذره على التأخير |
بصرااااحه أول مره أقرأ مثل هالكلاااام ..
بكيييت كثير .. :frown: ياعمري عليها أسأل الله أن يجعل كل ماأصابها رفع لدرجاتها .. إنسانه حكيمة ماشاءالله عليها .. وترد الإساءة بالإحسان .. الله يجزيها خير بعملها .. والحمدلله أهم شيء إنها الحين عايشه بسعاااادة .. الله يتمم عليها يارب ويسعدها دنيا وآخره .. ويخلي لها أبو عيالها و عيالها .. همسة حق.. كل الشكر ع هذه القصة الراااااااااائعه .. لاعدمناكِ يارب :redface: |
|
همسة حق الله يجزاك خير حبيبتي ونفع بك يابعد كل غالي ....ومشكورة الف شكر على النقل المتميز والمبدع يالله ياهمسة حق اثرتي فيني مشاعر وشجون غريبة لا استطيع ان اصفها اضحكتني وابكتني في نفس الوقت ,,
فعلا الحياة عبارة عن طقووس والوان وكل لون يندرج بسلبياته وايجابياته ولكن اظل احارب الزواج المبكر وخاصة لما تكون الاسرة على غير علم ووعي بما يحدث وبما سيحصل وهو مااثار شجني لاني في يوم ما كنت ساصبح مثلها ولكن رحمة الله فوق كل شـي ....اعيد واكرر شكري عالنقل المتميز واذ كان في بقية ياعسل لاتقصرين ,,,,ودمتي بود |
رحيل همي قرآني ضي جوزيتم خيراً وكفيتم شراً ونفع بكم شرفني مروركم أبشروا متى تاحت الفرصه كملت الأسئله لأنها بصراحه قصه مؤثره وفيها من التجارب والإستفادات وااايد وااايد حتى أنا شخصياً إستفدت علشان جذيه قلت تستفيدون أنتم لأنكم أخواتي وتهموني الله يكتب الأجر |
ما شاء الله عليكي ...............الله يوفقك ويسعدك في الدنيا والاخرة ويحفظلك اولادك وزوجك ويخليكم لبعض ويديم السعادة والهنا عليكم ......امين يا رب العالمين
|
همسة حقــــــــــــــ
وش سويتي فينا .........؟ سبحان الله عشت القصة وكأني معهم .......،، لكن فعلا الوحده فينا لازم تعيش لربها ولنفسها .......،لازم تستمتع بحياتها وتعيشها بالطول والعرض مادامت ماتتعدى حدود الشرع ........وماننكر ان الزواج لابد يكون فيه تضحيات من الطرفين لكن المهم ماتأثر عليك بشكل اساسي .... وماكثرت الأمراض في النساء الا لأنها تقدم زوجها أو عيالها على نفسها وبالأخير اذا تخلى الزوج أو ابتعدوا العيال صارت فريسه للوساوس هذولا اللي قدمتهم على نفسي ....... ونست قوله عليه الصلاة والسلام ....... "وإن لنفسك عليك حقا "............ بارك الله فيك اختي وأبعد عنا الكدر والظلم ..... |
أختي ووفقك الله لمايحبه ويرضااااه......
وأعانك الله على طاعته.......... وحمعك الله بزووجك على الطاعة والخير انا عن نفسي بنت لم أتزووج ولكن أستفدت من قصتك كثيراً.... وفعلاً الحياة تريد منا صبراً وحلماً.......... سلمت يداااك.......... تقبلي مروووري |
سبحان الله العظيم
الله يوفقك ويرزقك وكل مسلمه |
بنت القريه الوعد قدام ضياء القمر أمل البارقي بارك الله فيكم ونفع بكم الإسلام والمسلمين مروركم أضاء متصفحي جوزيتم خيراً وكفيتم شراً |
كيف تعاملك معه وكيف تجذبينه ؟
تعاملي معه بأسلوب راقي فأنا دائما أتخيل زوجي هو ضيف عندي وبالفعل هو كذلك فالزوج معك لفترة يعلمها الله أما أن يموت أو تموتين قبله هذا إن لم يفرقكم شئ غيره . هذا الاحساس يجعلني أكون رسميه معه وأتخذ معه إسلوب اللباقه والاتكيت والإحترام مو أنسى نفسي وأسوي كشه ولابسه بيجاما مفككه أزاريرها وحالتي حاله . دائما أجعل من نفسي رائعة الملمس والملبس والمشم . وأتكلم معه بإسلوب راقي بعيد عن الدفاشة والخشونة . أنظري لزوجك وهو يكلم طفلتك كيف يكلمها بهدوء!! لإنها ناعمه هادئه وحنونه . هذه المفروض تكون صفاتك أنتي وأنا وكل أنثى . كيف يمكن للمــرأة أن تجذب زوجها لها ؟ هناك عدة طرق . الطريقه المعروفه إلي تسويها كل وحده تتسبح وتلبس وتتعطر كل ليله وطول النهار اللهم يا كافي تطفش بلد ما تصير أنثى إلا بعد الساعه تسع بالليل . الطريقة الثانية إلي تخلي الزوج مثل البطاريه اللي تنشحن كل دقيقة ومن تنشحن زين تبدأ العمل كيف هالطريقة : يقوم من النوم يحصلك صاحيه قبله مجهزه الفطور وحاطه بخور بالبيت وشكلك بالبيجاما اللي الوانها زاهيه وشعرك مرفوع بطريقه حلوه وكحل خفيف قلوس ويكون فمك ريحته عطره . يروح للعمل وأنتي تدعين له بأحسن الدعوات . الله يحفظك . الله يوفقك . الله يستر عليك ويخليك . وتوصينه حبيبي ممكن تدق لي رنه من توصل أدري بيقول مو لازم قولي عندك مو لازم بس عندي ضروري يا عمري بيروح وبيطنشك قومي أنتي دقي له بعد نص ساعه لو مكان عمله قريب لو بعيد دقي بعد ساعه وقولي هاه قلبي وصلت بيقولك إيه إيه يلا مشغول عطيه ضحكه نعومه وقولي أدري إنك مشغول بس حبيت أطمن إنك وصلت ياعمري وسكري عنه وأنتي تقولي "عنبوه ما يعرف هالإنسان الحنيه " قبل لا يرد من العمل تكوني أنتي نظفتي ورتبتي وخلصتي أمورك علشان يوصل يحصل قصره الوردي وردي اللون من الروائح العطره ويحصلك يا أميرته تنتظرينه . بيفرح لشوفتك بس ما راح يعطيك وجه بعد طنشي الظاهر بطاريته ما نشحنت ولا كان طار مخه . المهم بيتغدا وبينام والعصريه جهزي له شئ يأكله والمغرب بيطلع إلين ما شاء الله يجي بالليل يشوفك شئ ثاني وبيبدأ يتذكر صورتك . الصبح نعومه بالبيجاما . الظهر بثوب خفيف نهاري . العصر بلبس غير وهادئ ممكن جلابيه بالليل بقميص نوم أحمر . هنيه بيعرف إن إلي قدامه إنسانه مهمته لنفسها وتستحق من يهتم لها . لأن الزوج يحب اللي تهتم بنفسها يعشقها ويعشق يكتشفها ويعرف خباياها . مو شرط يجذب الزوج لبس أحياناً يجذبه ريحة عطرك . ريحة شعرك ولونه . أحيانا لما يشوفك تحطين كريم الليل قبل النوم . وحده من صديقاتي تقول كانت تحط كريم الفازلين تخيلوا هالكريم كيف فضيع المهم وهي تفرك الكريم بيدينها زوجها إستثار منه ؟! وجاء لها ملهوف ..!!! ومنهم من يشوفك وأنتي تحطين غلوس بشفايفك ينجن جنونه . كل وحده تشوف زوجها شو ممكن يجذبه . وتتفنن بسحر زوجها بالحلال . نظامك مع زوجك من ناحية الجذب ؟ إني أكون جذابة بكل وقت والجاذبية ما تكون باللبس فقط الجاذبية تكون بالملس والشكل والهمس والمشم . تقول إحدى خبيرات التجميل القديرات "لا تكمل جاذبيتك إلا بنعومتك " وهي لا تقصد نعومة جسدك وللعلم نعومة الجسد مفعولها يذيب الجليد. بل يصهره إنصار في ثواني فما بالك بزوجك وهو يلمس جسدك كانه حرير .؟!! الخبيرة تقصد نعومة أفعالك وضربت مثال على النعومة إحدى الفنانات فقالت هذه الفنانة رمزاً للإنوثه طبعاً هذه الفنانة لم تولد من بطن أمها وهي تعرف كل هذه الأساليب .!!! هنا نطرح سؤال هل النعومة درس يجب أن نتعلمه الاجابة نعم يجب أن نعلمه كلنــــا فكيف يمكن أن نكون نعومات دلوعات بأفعالنا .؟ وهل هذه الصفات محصوره على الفتاة الصغيرة بالسن والكبيره ليس لها نصيب من هذا الدلع ؟ الاجابه لا. الصغيره والكبيره كلهن إناث والفرق يكمن في كيف يمكنك أن تبرزي إنوثتك أمام زوجك.؟ مثلا تدخلين عليه وهو يقرأ جريدة " الحبيب بأمانة الله جالس تجين أنتي يالدفشه بكل قواك وعضلاتك وتطبين تجلسين جمبه ومن جلستك يتحرك الكرسي يقوم يفز المسكين من مكانه يفكر دبابه ولا قذيفه طاحت جمبه ... هنيه أنتي في قمة الخشونه ونوضع على وجهك x ولكن لما تدخلين عليه وهو بنفس المشهد السابق وتجلسين بهدوء بدون لا يشعر بك وتكلمينه بصوت هامس كأنك تهمسين له بسر لا تريدين أن يسمعه غيرك ماذا برأيك سيقول هذا الرجل عنك يا زوجته الرائعه ؟ نظامي معه غيرت كثير من الامور : طريقه كلامي وأكلي وشربي ومشيتي وإستبدلت الخشونه بالنعومة والصوت العالي بالهادي . إستبدلت طريقة الطلب التي كانت مجرد أمر بطريقة طلب مؤدب بإضافة رتوش رومانسيه مثلا حبيبي ممكن تجيب لنا ...... ما عليك أمر يالغلا ؟ فديتك ممكن تمر على إخوي أبي منه هالشئ إذا ما عليك كلافه . عمري أبي جلاكسي خاطري فيه الله يخليك صرت ما أتصل فيه إلا لو فيه شئ ضروري وطبعاً من زوج لزوج يختلف لو زوجك يحبك تتصلين وتكلمينه خليك على نفس العاده أنا شفت إن هالطريقه تناسب زوجي وتناسب وضعي الجديد فأرتحت له وهو إرتاح بعد. رتب الأولويات والأوقات بحياتي وهالطريقه ريحته وريحتني لأني عطيت كل ذي حق حقه . الصمت والغموض والإحتفاظ بأموري وخصوصياتي إلي ماله شغل فيها لنفسي وهالشئ خلاه يقدرني ويقدر خصوصياتي بعد صرت ما أسال كثير في أموره ولا عن أهله ولا أصدقائه إذا حب يتكلم حياه وما يبي بعد له مطلق الحريه يتبع إن شــــــــاءالله |
ممكن تخبرينا ما هو نظامك اليومي ؟
نظامي اليوم متفرع ومتعدد وأحاول فيه أعطي كل ذي حق حقه فيه . أبدا يومي بفضل الله ومنته . قبل أذان الفجر بربع ساعه . أصلي فيها ركعتين وأجلس أدعي لأبوي الله يرحمه ولأمي الله يطول بعمرها بالرحمه والمغفرة والقبول الحسن . أدعي لي ولإخواني وأخواتي وأبنائي وجميع المؤمنين والمؤمنات الأحياء منهم والأموات فتـــلك ساعه مباركه ولا أريد أن أفوتها بدون لا أذكر أي دعوه تكون لي خيـــر في الدنيا أو رصيد في الأخــرة فكلنا نعلم إن الدعـــــــــــــاء هو مخ العباده .. فلا تتهاوني عن إستغلال أي لحظه في الدعاء دائما إجعلي لسانك يتلذذ بالدعاء في كل وقت وكل حين . لتجمعي لك رصيد لا يفنى في الأخرة ولا تجعلين دعائك فيه سب أو قطيعة رحم إدعي بالهدايه لزوجك لأبنائك لإخوانك لأخواتك ولأمك ولأبوك . ولجميع المسلمين ولا تنسين أهم دعاء اللهم أنصر الإسلام والمسلمين ودمر أعداء الدين اللهم إحفظنا بالإسلام وزينا بالإيمان وإستر عوراتنا وإحفظ بناتنا وأبنائنا . حتى اللي يؤذيك قولي الله يهديه ويصلحه وعسى يكون صلاحه بسبب دعوتك ولك الأجر. يأذن الفجر يصحى زوجي ويأخذ العيال معه أرجع أنا أصلي الصبح وقبل لا أنزل أصحي بناتي لصلاة الصبح وأروح أجهز الفطور مع الخدامه . وطبعاً قبل الصلاه أستفتح يومي بشرب كوبين ماء مضاف لهم ماء ورد . ولما أجهز فطور العيال أخلط لي تفاحه +2خياره +عصير لمونه وأشربهم قبل الفطور بساعه كامله بعدها أبخر بيتي كل فجر بحبتين لبان صغيره + كسرة عود كبيره من أجمل وأخليهم في الصاله علشان لما يرجع زوجي من الصلاة يستفتح بريحة العود . أجلس البس عيالي للمدرسه وأنا أردد معهم أذكار الصباح وأقريهم الأيات القرآنيه الكرسي وأواخر سورة البقره والمعوذات ثلاث مرات . أبخرهم أعطرهم ويطلعون العيال . يبدأ دور زوجي أرتب السفره قبل لا ينزل وأروح لمـرأية الطواري هالمرايه حاطتها عند الباب وتحتها دولاب بأدراج كثيرة الإستعمال منها للجوارب ومنها للمجلات ومنها لأي شئ نحصله طاير بالصاله نخليه إلين يسألون عنه أمي وين قلمي البنفسجي نقول بالدرج أمي وين برايتي هناك بالدرج مبرمج فمي على هالإجابه وضمن الأشياء فيه شنطه صغننه مثل المقلمه فيها غلوسين واحد وردي والثاني لحمي وتر بروف + قلمين كحل للعيون أسود وبني + مسكارا سوداء + بلاشر وردي ومسك العروسه . جمبهم مشط صغيير . قبل لا ينزل أمشط شعري وأحط غلوس خفيف وكحلت عيوني ورسمة حواجبي حطيت مسكارا وخليت لمسه من بلاشر وردي ورشت عطر خفيفه وحطيت عود علشان يتبخر الجو. ينزل زوجي ما يتكلم عادي تعودت على إنه ينظر إلي بصمت كل صباح . أساله أصب شاي يرد بالإشاره لا لا يفطر وهو صامت ولا نفس اللهم يا كافي هههههه ولما تنفك أساريره يقول هاتي الحذاء الله يكرمكم أروح أجيبه له . أبخر زوجي وأعطره وأعطيه كوب شاي ويطلع بحفظ الله لدوامه وطبعاً نسمعه من هالادعية وهو فرحان وأكثر ما يسعد زوجي لما أذكره بدعاء خروج المنزل أقوله مثل العيال يلا قول بسم الله توكلت ...... وهم يكملون علشان أشوف حفظهم وأذكرهم وهالطريقه تفرحه فيكمل وهو يضحك . للحذاء في بيتنا قصه رائعه . تعلمون ما هي ؟ من خمس سنوات أذكر هذاك اليوم كان يوم ماطر وكان ولدي يلعب ولابس حذاء المدرسه وكنت مريضه ما أقدرة أهتم له ... ثاني يوم لما صحى للمدرسه الخدامه لبسته نفس الحذاء وكان مبلول لما رجع ولدي من المدرسه رجع مسخن والسبب الحذاء المبلول ورجوله تشققة بسبب تجمع الماء والرمل ومن يومها صار عندي وسوسه نظافه مو طبيعيه حتى زوجي يقول أنتي لما بندفنك بندفن معك ثلاث أشياء . الديتول واللبنان والفوطه . الصراحه صرت أهتم بأحذية أبنائي دائما فكل ثلاث أيام أحذية الرياضة لها غسيل أحطهم بداخل كيس مخده وارميهم في الغساله يتغسلون ونفس الحاله لبقية الاحذيه اللي تتحمل غسيل واللي ما تتحمل وتنمسح فقط أمسحها مسح مضبوط وأركز على داخل الحذاء . أخلط بوردة جونسن مع مسك مطحون وورق شاي ناعم مطحون ونعناع مجفف مطحون وأرش داخل الحذاء يعطره ويمنع التخمر داخله وقبل لا يلبسون عيالي الأحذيه وأبوهم أبخرها بلبان لما يلبسونها يحسون بإنتعاش خيالي وتدفيهم بالبرد . وأيام الصيف من الليل أبخرها لهم . يقول زوجي كل ما أفسخ الحذاء لما أبي أصلي الظهر بالعمل ريحة جواربي مسويه ضجه في المسجد . بعد خروج الجميع من المنزل يكون الوقت لي . ويكون الوقت تقريبا ثمانيه ونص . ولحظتها يبداء يومي السعيد .. أروح لغرفتي أغسل وجهي من أثار الماكياج . أمسح وجهي وأرش ماء ورد عليه أفتح الشبابيك أنظف غرفتي وارتب السرير وأحط لبان وعود علشان تتبخر أمسك حبل أنط 50 نطه بالحبل أجهز ماسك لبشرتي هالماسك مهم لكل وحده تبي تظل عمرها ببشره مشدوده ومتماسكه إحفظي مكونات هالماسك مثل إسمك . وعلميه بناتك لما يصيرون بسن 16 ... يتبع |
أجهز ماسك لبشرتي هالماسك مهم لكل وحده تبي تظل عمرها ببشره مشدوده ومتماسكه إحفظي مكونات هالماسك مثل إسمك . وعلميه بناتك لما يصيرون بسن 16 سنه . حبة أفوكادو بقشورها ملعقة عسل صغيره نصف ملعقة زيت زيتون عصير ربع خياره طازجه عصير نصف تفاحه طازجه زلال بيضه ملعقة طحين أبيض أسمرأي نوع حطيه ملعقة لبن ملعقتين من ماء رز مسلوق بالإضافه لملعقتين رز مهروسه . نخلط ما سبق ونحطه على الوجه من 5 دقائق لـ 15 دقيقه هالماسك يساعد على تماسك البشره ويخليها مشدوده منفوخه ومورده إلي بشرتها تعبانه مره وهي فوق الثلاثين تستخدم هالماسك كل إسبوع مره . إلي بشرتها جيده وهي فوق الثلاثين تستخدمه كل عشر أيام يكون لك بالشهر 3 مرات تستخدمينه للي تحت تحت الثلاثين إلين عشرين سنه تستخدمه كل 15 يوم ويكون لك مرتين بالشهر . أجهز كميات متساويه من زيت الزيتون + زيت السمسم+زيت اللوز+ نصف ليمون أخلطهم بالخلاطه وأمسح جسمي كامل فيه. ولشعري نفس الزيوت والليمون بالإضافه لصفار بيضه وملعقة عسل ونقطتين فانيلا وأخليهم بشعري وأحط كيس والبس الكاب الكهربائي علشان يتخس ويمتص شعري الفوائد بسرعه . وأحط الماسك بوجهي أدهن رجولي بكميه وفيره من الفازلين المخفف بالليمون . البس جوارب والبس قفازتين وأجلس أقراء كتاب أو أجلس على النت لمدة ساعه وبعدها أقوم أتغسل . البس ملابس نظيفة أصلي الضحى واروح أقول شوغدانا للخدامه أرجع أجهز أورراق عمل لعيالي علشان دروسهم وأنظم قائمة واجباتهم . يأذن الظهر أصلي الظهر أروح ألبس وأتزين لأن أبو العيال أول واحد يرجع أجهز له سفرته يرجع يتغدا ويطلع ينام ويرجعون العيال أغديهم ونجلس نتكلم شويه أستاذن منهم أنام نص ساعه أنام وأصحى على صلاة العصر وتبدأ رحلة التدريس وااه منها لا أعلم مع من أبدأ وبمن سأنتهي . المهم تصير عندنا عمليات مد وجزر وإلي يخلص يروح يلعب بدون أي صوت وما يريحنا من الكتب إلا صلاة المغرب والعشاء والوقت اللي يكون فيه شرب شئ للنشاط الساعه الثامنه والنصف وبعدها نقول ستووووووب كلن يحط أغراضه بمكانها يرتب كتبه ويرتب مكانه . ويلا تغيير ملابس للنوم نحط عشاهم يتعشون يفرشون أسنانهم يرددون أدعية النوم وينامون بسم الله عليهم أشغل في البيت سورة البقره وينامون عيالي فديت قلبهم والله إنهم أروع نعمه والله عوضني فيهم الحمد لك يا رب . أحيانا أقول ليش جبتهم وراء بعض تعبوني ولكن لما أتذكر إن في ناس تتمنى واحد بس أقول الحمــــــــــــــــــد لك يارب عطيتني كل شئ وأنا الظالمه المقصره بشكرك. أسأل الله العظيم رب العرش العظيم أن يرزق كل محرومه عاجل غير آجل اللهم آمين . بعد نوم عيالي عندي ساعه ونصف أرتب فيها البيت مع الخدامه وأطلع أخذ لي أروع دش في التاريخ . أحط بالبانيو ملح خشن وارمي كل التعب داخل البانيو الحمد لله مر اليوم برغم تعبه بسلام وأحس إني أنجزة كل حق علي وأحيانا أتذكر وأنا بالبانيو إني ما إتصلت بأمي فقول من أخلص بتصل فيها . أطلع البس وأبخر غرفتي وأتصل بأمي أمسي عليها وهي متعوده أتصل فيها على تسعه ونص أسولف معها ربع ساعه وقبل لا يجي زوجي أركض للنت أشوف شو فيه وأول ما أسمع باب البيت فتح أسكر الجهاز وأروح بوصوله يكون خلص يومنا نتعشى ونام . هذا نظامي اليومي يطرأ عليه تغيير في أيام العطل والإجازات طبعاً للزيارات أو إستقبال الضيوف . الشئ اللي معروف عني إني خلال الإسبوع ما أستقبل أي إتصال من أحد الإ بأيام الإجازات وكذلك الضيوف وما أطلع لأحد خلال هالإسبوع إلا لو فيه شئ طاري الإسبوع كامل لبيتي وأسرتي وعيالي . وأيام الإجازات اللي بيزورني حياه . يمكن هالنظام سوى ضجه بالذات بالإتصالات إلي ما كنت أرد عليها ولكن يا أخواتي التيلفونات سوالف بس ومضيعه وقت وعيالي أولى بهذا الوقت إلي نحن محاسبين عليه فليش أضيعه فسوالف فاضيه . إلي المفروض أكلمه وأطمن عليه هم أهلي وهذا أنا كل يوم أكلم أمي أما إخواني وأخواتي وباقي العائله كل إسبوع نتلاقى سواء يجوني ولا أنا أروح لهم ببيت العائله . يتبع |
مشاء الله تبارك الله اختي انتي مررره رايقه الله يبارك لك بصحتك وزوجك واولادك
نصايحك زينه بس للاسف مو كل امرأه قادره انها تسويها الله يعطيك العافيه ويجعل زوجك يقدر تعبك له :) |
كيف تواجهين مشاكلك ؟
ما أحب المشاكل وضيقة البال تبون الصدق بس لما تصير ما في مفر منها . والله على حسب المشكله مشاكلي مع زوجي بديت أسيطر عليها بهدوئي معه والتزامي للصمت بوقت الغضب وبدال الصراخ الدموع الصامته تلعب دور قوي . تخليه يحس بتأنيب الضمير . والهدوء والبعد عن خصوصيات الزوج وعدم التفتيش والشك الدائم ريحت بالي وخلتني ارتاح معه . واريح نفسي وعرفت كيف أعيش حياتي مشاكل الاولاد هي إلي ترفع ضغطي وبالذات لما يصير حرب على قلم وكلن يقول هذا لي وأخر المطاف ينحرمون منه الإثنين طبعاً ما ينظلم فيها إلا صاحب القلم الأصلي هذي الطريقه علمتني أنا شئ وعلمت العيال شئ . علمتني إني أتأدب وماأشتري شئ متشابهه للعيال صايره حياتنا الحين كوكتيل الوان. علمت الاولاد إنهم يهتمون بأشيائهم وما يضيعونها وبالذات لما يشوفون أصعب دمعه دمعة للي إنحرم من قلمه مثلاً لأنه هو صاحب الشئ اللي صارت عليه حرب . فيقومون كلهم يدورون قلم الثاني ويجيبوه لي أمي حصلنا القلم فأسال هذا لمن فيقوم إلي كان يهواش ويقول إنه لي وقبل القلم يقول لي . أقرصه من إذنه علشان مايضيعه ولأنه السبب بحزن أخوه وأخليه يعتذر له ونعطي المحروم قلمه . مشاكلهم لو إنها سهله بس مؤلمه لأنك تخافين تظلمين أحد منهم فيشيل الحزن بقلبه ويفكرك تكرهينه . صارت عندي مشكلتين كبارالاوليه عند بنتي وكانت بصف ثالث إبتدائي هالبنت فجأه بدأت تسرق لاحظة هالشئ عليها وراقبتها من بعيد لبعيد وشفتها بعيوني تسرق ولكني ما مسكتها بلحظتها لأني خفت إنها تنحرج وبنفس الوقت خفت على نفسيتها لا تدهور . لما رجعت من المدرسه جلست أحكي لها قصص السرقه وشو عقابها وهي ما شاء الله فهمت القصد . جلست أحكي لها هالقصص لها ولإخوانها إسبوعين وجات البنت تعترف لي عن فعلتها وما تدري إني أعرف إنها سرقت ولما قلت لها أنا أدري إنك كنتي تأخذين فلوس من الدولاب وسكت عنك أبيك تتركين هالفعله عن قناعه مو بالضرب والتهديد . فسألتها ليش كنتي تأخذين فلوس وأنا أعطيك مثل إخوانك وأدري إن المبلغ إلي أعطيه لك يكفيك لوجبتك بالمدرسه . قالت لأني أبي أشتري مجلة ماجد وأنتي كنتي تعطيني وفجأه ما صرتي تعطيني فلوس لها . قلت لها أنا قلت لك لو هالمجله ما راح يكون مصيرها تقصيص صور بعطيك ثمنها وإذا أنتي تبين تقصصين صورإرسمي أي رسمه تحبينها وقصيها المجلات فيها مواضيع هامه ومفيده وقيمه ومو للتقطيع . يعني فهمتك سبب عدم إعطائي لك لقيمة المجله صح ولا لا. قالت إيوه ولكني أبيها وأوعدك ما أقطعها أبداً . قلت برجع أعطيك قيمة المجله ولكن لو شفتك ما إهتميتي فيها بمنعك من الفلوس . للعلم مجلة ماجد كانت ما تتجاوز الثلاث دراهم ولكن هذي الحركه علمت بنتي إن الفلوس مو لعبه الفلوس نعمه ولازم نحافظ عليها . الشئ الثاني تعلمت البنت قيمة المجلات والكتب وإنها للفائده وللتزود بالعلم فصارت تحافظ عليهم والحين عندي نسخ قديمه عادي إلي يبي يشتري المجال مفتوح . يتبع |
المشكله الثانيه في ولدي الكبير .
ولدي الكبير إنسان حساس جداً وما يتحمل أي كلمه وكل يوم مسوي البيت حلبة مصارعه وكل ما أكلمه يقول لي هم ما يحترموني . فأقوم وأقولهم إحترموه وأنت لا تضرب إخوانك وأذكره بحديث الرسول صلى الله عليه وسلم عن إحترام الكبير ورحمة الصغير فيسكتون وفجأه ترجع الحرب الضروس في البيت قلت الظاهر لازم نجلس نتعمق في هالمشكله ونقلعها من جذورها أحسن هذاك اليوم قلت لولدي الحبيب شو رايك نتمشى برا البيت خاطري أغير جو قال تم فالج طيب ياأمي يا زينه هالي مفكر نفسه صاررجال قلت فالك ما يخيب يا أأسد البيت إنتفخ صار كبر البيت ههههه ورحنا نمشي أنا وهو وكل مره موضوع نتكلم فيه إلين طحنا بالموضوع المهم . قلت ليش دايم تتهاوش مع إخوانك . قال ما يحترموني قلت كيف ما يحترمونك قال ما يسمعون الكلام وبدأ يسرد قصص كانت قصص عاديه جداً وتصير بكل بيت قلت له عادي هالامور تصيير بكل بيت قال بس هم ما يحترموني رجعنا لنفس الكلمه قلت من ما يحترمك قال إخواني قلت طيب خبرني وأنا بتصرف معهم قال أنتي لو ضربتهم تهاوشيني قلت لا تضربهم خبرني وانا بتصرف معهم وبجذيه ما أهاوشك . قال لكنك ما راح تطلعين حقي قلت أي حق قال حقي هم يجرحوني قلت أنا بوقفهم عند حدهم ما عليك قال أخوي ما يحترمني ومسويني مهزله قلت أخوك صغير ولازم يحترمك أنت الكبير وإحترامك واجب سكت . حسيت إن سكوته مريب وصار يمشي وهو ساكت قلت ليش سكتت قال خلاص غيري الموضوع مب لازم نتكلم فيه كان حزين وماسك عبرته والحمد لله كنا قريب من البيت قلت تعال ندخل دخلنا وجلسنا بالحوش وبعد ظل ساكت وماسك دموعه قلت تعال ندخل المجلس دخلنا المجلس وخليت الإضاءه مطفيه قلت يلا تكلم قال شو أقول قلت تكلم وإبك بس طلع إلي بخاطرك ولأن المكان مظلم بكاء براحته وبدون لا يحس بإحراج قدامي وأنا سجلت كلامه كله بالموبايل علشان بعدين أركز بالمشكله وأشوف شو عنده بالضبط . وعرفت مشكلة الولد . ولدي الحبيب كان حاس بجرح من أبوه إلي كان هو يشد عليه لأنه الكبير وهذا غلط ويحن على الصغير لأن صغيره وبعد هذا غلط . يقول أبوي يسبني وأحيانا يناديني غبي وجلس يصرخ أنا موووووووووووووووووووووغبي قلت أنت أكيد موغبي وقال لما أقول لأبوي لا تقول أنا غبي أنا موغبي يقول لي اُسكت لا ترد علي وكان بيضربني وجلس ولدي الحبيب يبكي بحرقه . قلت خلصت قال إيوه قلت ولدي أبوك يحبك واايد صدقني ولكن يمكن ماعرف يوصل لك حبه يمكن يفكرهالطريقه تخليك حازم قال ما أبي هالاسلوب قلت خلاص أنا أعتذرلك نيابه عن أبوك وأقولك أسفه ما كنت أدري هالطريقه تضايقك وأوعدك إنا نغيرها وما نخليك تتضايق منا أبداً . قال أنتي تضايقني لما تقولين لي لا تضرب إخوانك قلت لانهم صغار قال هم ما يحترموني وقمت أبين له إنك أنت الحين على بدايه سن المراهقه وهالسن حساس ويفكر كل شخص إن أي كلمه القصد فيها إهانته لو تفكرأنت شوي بتشوف إنهم ما يفهمون وموقصدهم شئ ومن يومها الحمد لله الولد تضبط مع إخوانه . وأبوه سمعته التسجيل وبينت له سبب حزن الولد وتفاهموا مع بعض . مشاكلي مع زوجي بديت أسيطر عليها بهدوئي معه والتزامي للصمت بوقت الغضب وبدال الصراخ الدموع الصامته تلعب دور قوي . تخليه يحس بتأنيب الضمير . والهدوء والبعد عن خصوصيات الزوج وعدم التفتيش والشك الدائم ريحت بالي وخلتني ارتاح معه . واريح نفسي وعرفت كيف أعيش حياتي يتبع |
أنا وايد أطبق نظامج مع إنه واايد واايد ممتاز ورائع وأنا أم لثلاثه وحامل وعندي بنت ما كملت السنه وماعندي خدامه حاسه إني بنفجر شغل البيت كله علي والاولاد والحمل ماني قادره أحط حنا بشعري ولا ماسك بوجهي ما عندي وقت أبداً أبي طريقه أشوف نفسي والبس أبي أطلع
يالله بنتي الصغيره نامت أطل عالنت مو عارفه وين الحل ؟؟؟؟؟؟؟؟؟ هوني على نفسك عزيزتي هوني . خذي نفس عميق وإسترخي يا حبيبتي ، كل ما تتضايقين تذكري وصية النبي صلى الله عليه وسلم لإبنته الزهراء عندما إشتكت يدها من الرحى، كبري أربعاً وثلاثين ، وسبحي ثلاثاً وثلاثين ، وإحمدي ثلاثاً وثلاثين . عزيزتي أهم شئ في هذي الدنيا الوقت ... عندما ترتبين وقتك وأولوياتك يكون كل شئ سهل وعندما تنظمين عاداتك وأغراضك يكون الامر سهل جداً.. ستجدين مع التنظيم حياتك سلسله . حددي لنفسك نظام للعناية لا يتغير أبداَ حددي لابنائك مواعيد نوم ثابته ، مواعيد أكل ثابته ؛ مواعيد لعب ثابته . إذا كان زوجك غير قادر أن يجلب لك خادمة نظمي عمل بيتك بحيث يكون سلسل ومريح . إلجئي للتصنيف . وإعملي لنفسك جدول أعمال مرتب ومنظم وغير قابل للتغيير من أهم مقومات النجاح في الحياة الالتزام بنفس النظام . عنايتك بنفسك لا تريد منك كل هذا التفكير الصعب والحزن لو قلنا كل سبت وثلاثاء هذا يومين بالإسبوع لزيت الشعر من يطلع زوجك للعمل إدهني شعرك إلين موعد صلاة الظهر غسليه وصلي الظهر . نقول كل خميس حنا للشعر من اليل وأنتي تنظفين المطبخ إعجنيه بمغلي البابونج أوالزعتر أوالشاي وفي الصباح بعد ما يطلع زوجك للعمل أضيفي بيضه للحنا وحركيه وحطيه بشعرك إلين قبل صلاة الظهر وغسليه وهذي مره بالاسبوع . ماسك للوجه على حسب نوع بشرتك إختاري أي نوع يناسبك مره بالإسبوع وخليها يوم الخميس بما إنه يوم الخلطات جسمك بنفس اليوم اللي تدهنين به شعرك إدهني جسمك بالمره ولما تستحمين سوي له سكراب . يدينك قبل ما تغسلين وتنظفين إدهنيا بزيت اللوز أو زيت الزيتون والبسي قفازات وإشتغلي تنظيف ولما تخلصين خذي شوية سكراب وأفكري يدك وإدهنيها بكريم مرطب "حطي سله صغيره بمطبخك فيها سكراب واحد وكريم مرطب أي نوع مثل دوف أو نيفيا أو كاميل العبوات الصغيره " الأفضل توزعين هالعبوات الصغار من الكريم بكل مكان تحصلينه فيه "بشنطة اليد ، عند الكمبيوتر، عند التلفزيون ، بالحمام أكرمك الله ، في المطبخ ، فوق الكمندينوالطاوله الصغيره اللي جمب سريرك" وبجذيه تشوفينه قدامك جمب سريرك خلي سله صغيره فيها كريم الليل للوجه وفازلين للرجول ومجموعه من الجوارب وكريم لليد ومرطب للشفايف وكريم لمحيط العيون "وقبل النوم إستخدميهم في الحمام أعزك الله حطي سله صغيره فيها " كريم النهار علشان لما تغسلين وجهك الصبح تستخدمينه على طول ،غسول الإستخدام اليومي للوجه فرشاتك والملعقه المنظفه للسان إستخدميها كل ليله تشيل تراكمات الاكل اللي طوال اليوم " فوق تسريحتك حطي صينية فيها ماء + كوب + علبة الفيتامينات الخاصه بك كل صباح ومساء تشربين ماء وفيتاميناتك كل صباح . الموضوع سهل جداً بس أنتي خليك هاديه جداً ومتفائله وبإذن الله تكونين بقمة تألقك يتبع |
السؤال الي يخطر في بالي الحين هو
أنا عندي طفلين الأول سنتين والثانيه ما كملت شهر سؤالي كيف ممكن أنظم حياتي بوجود هالضيفه الجديده الي نومها أبداً مش منتظم وكل شوي تقعد تصيح وما ترتاح وتسكت إلا لما أهزها بحضني يعني بعد شهر أو شهر ونص لو رجعت لبيتي ما أدري كيف أبا تصرف ؟؟ أحس حياتي بتنقلب كلها فوق تحت وخاااااايفه كثير من هالشي خصوصاً إن زوجي ما يحب الفوضى الي مهون علي إن أخوها ينام بوقت محدد لكن هي وش أسوي معها أفيديني الله يجزاك خير؟؟؟؟؟؟ أختي أتمنى إنك تستفيدين بالي أكتبه وأتمنى من الله أن ينفعك به . بنتك الله يبارك لك فيها ويخليها لك ويبارك لك في أخواها بنتك يا حبيبتي لسه توك ولادتيها وهي محتاجه لحضنك لأنك عالمها بعد ما خرجت من بطنك اللي كان محتويها فهي تحس بغربه فحضنك يعتبر ملاذها من هالعالم إلي يخوفها باتساعه . عموما هي الحين صغيره ومن تكملين الأربعين بيتعدل نومها وبيصير كل ثلاث ساعات تصحى وهي أكيد الحين كل ثلاث ساعات تصحى لو دققتي على تواقيت نومها لو ما في شئ يبكيها مثلا مغص أو صداع برأسها . لو فيها مغص شربيها هالمشروب المتكون من ملعقه صغيره ينسون + شمر + حبة البركه + حلبه صفراء "الحلبه علشان ما تكون فيها مراره من الليل نقعيها في كوب ماء والصبح فوريها مع البقيه وحطي لها المشروب بكميات قليله ما دامها صغيره يعني إلين الربع وحليه لها بعسل طبيعي أو سكر نبات مطحون . هالمشروب بينظف بطنها من الأوساخ والغازات وبيهديها وبيخليها تنام بإسترخاء .. لو فيها صداع . "علشان تعرفين فيها صداع حطي يدك الثنتين بحنيه على جوانب رأسها وشوفي النبض لو شفتيه سريع وقوي معناتها البنت مصدعه . ذوبي قطعة مر صغيره بماء دافي وإدهني رأسها فيه وخلف الإذن ورقبتها من خلف وإنتظري شويه يجف . لا تفكرين إنه بيوسخ ملابسها ولكن فكري إنها صغيره وما تتحمل الصداع وللعلم هذي الطريقه سواء الطفل فيه صداع ولا ما فيه نحطها له علشان يرتاح وتخف عنه روائح العطور الفرنسيه والبخور القوي على الأطفال . من يتعدل نومها بيتعدل وقتك ولا تشغلين بالك بالكركبه اللي بتحصل بحياتك شهرين أو ثلاث شهور كل شئ بيرجع لوضعه . أنتي حاولي تكون مواعيد نومك أنتي وزوجك وعيالك مضبوطه . إنضابط مواعيد النوم تخليك تتحكمين بحياتك ومن يطلع زوجك للعمل نامي ساعتين أو ثلاث ترتاحين فيها من عناء سهرك بالليل . شغل بيتك خلصيه أول بأول تغسلين الملابس الصبح المغرب تكوني كويتهم ورصيتهم بالدولاب . نفس الشئ شغل المطبخ خلصي أول بأول وما دامكم اُسره صغيره فالموضوع سهل هوني الموضوع أنتي ولا تقلقين فكري بصحتك الحين وصحة بنتك وشغل البيت ملحوق عليه . وبعدين إتفقي مع زوجك يساعدك ويمسك معك البنت الين تخلصين شغلك . لا تنسين شرب الحليب والسوائل بكثره والفاكهه الطازجه وأخذ فيتاميناتك إلي بتساعدك على تحسين مزاجك |
| الساعة الآن 8:06 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.
TranZ By World 4Arab